O le Tatalo ma le Manatunatu Loloto—E Tāua mo Faifeʻau Maelega
1. O le ā sa fesoasoani iā Iesu e ʻalofia ai lona tosina ese mai le uaʻi atu i lana galuega sili ona tāua?
1 Sa faaalu e Iesu le afiafi atoa e faamālōlō ai maʻi ma tutuli ese temoni mai tagata. Ina ua maua o ia e ona soo i le aso na sosoo ai, ona latou faapea atu lea: “O loo saʻili tagata uma iā te oe,” ma faalaeiau atu ia faaauau pea ana galuega mamana. Peitaʻi, e leʻi mafai ona tosina ese ai Iesu mai le faia o lana galuega autū o le talaʻia lea o le tala lelei. Na ia tali atu: “Seʻi tatou ō atu ia i se isi nofoaga, i aai o loo latalata mai, ina ia ou talaʻi atu ai, auā o le mea lea na ou sau ai.” O le ā sa fesoasoani iā Iesu ia taulaʻi atu ai pea i lana galuega? Sa ala pō Iesu e tatalo ma manatunatu loloto. (Mare. 1:32-39) E faapefea ona fesoasoani iā i tatou le tatalo ma le manatunatu loloto ina ia avea ai ma tagata talaʻi maelega?
2. O ā mea tatou te manatunatu loloto i ai ina ia fesoasoani e faatumauina ai lo tatou maelega i le faiva?
2 O ā Mea e Manatunatu Loloto i Ai? Sa mātauina e Iesu tagata “ua pei i latou o mamoe ua faamanuʻalia ma agaleagaina, ua leai so latou leoleo mamoe.” (Mata. 9:36) O le mea foʻi lenā e mafai ona tatou fai, tatou te manatunatu loloto i le matuā manaʻomia lava e tagata o le tala lelei. E mafai ona tatou manatunatu loloto i le faanatinati o le taimi ua iai. (1 Kori. 7:29) E mafai foʻi ona tatou manatunatu loloto i galuega a Ieova ma ona uiga, lo tatou faaeaga o le avea ma Molimau a Ieova, atoa ai ma ʻoa tautele faaleagaga ua tatou aʻoaʻoina mai le Afioga a le Atua ae e lē o iloa e tagata i la tatou oganuu.—Sala. 77:11-13; Isa. 43:10-12; Mata. 13:52.
3. O ā taimi tatou te ono manatunatu loloto ai?
3 O ā Taimi Tatou te Manatunatu Loloto Ai? Faapei ona fai e Iesu, o nisi e ala pō a o toʻafimālie mea. O isi e sili ona lelei le manatunatu loloto i le afiafipō a o leʻi momoe. (Kene. 24:63) E tusa lava pe tatou te pisi i mea e fai, e mafai lava ona maua taimi e manatunatu loloto ai. O nisi e fai a o malaga i auala o femalagaaʻiga a le lautele. O isi e faaaogā taimi e mālōlō ai mo taumafataga i le aoauli. Ua iloa foʻi e le toʻatele le lelei o le manatunatu loloto a o leʻi auai i le talaʻiga, e tusa lava pe mo sina taimi puupuu, e fesoasoani iā i latou e talaʻi ai ma le lototele ma le maelega.
4. Aiseā e ao ai ona tatou manatunatu loloto?
4 O le tatalo ma manatunatu loloto e faalolotoina ai lo tatou faanaunauga e auauna iā Ieova, e fesoasoani iā i tatou ia manatu i la tatou tapuaʻiga o se mea sili lea i o tatou olaga, ma faamalosia ai lo tatou maumauaʻi e faaauau ona talaʻi. Sa aogā i le Faifeʻau Sili a le Atua, o Iesu le manatunatu loloto, e faapena foʻi ona aogā iā i tatou.