Ia Faatāua Lou Faaeaga i le Auaunaga i le Atua
1. O le ā le vaaiga a le toʻatele o tagata o le lalolagi i la tatou galuega talaʻi?
1 E toʻatele tagata i le lalolagi a Satani e manatu i la tatou galuega talaʻi o se “mea valea.” (1 Kori. 1:18-21) Pe afai e tatou te lē faaeteete, o lenei vaaiga sesē e mafai ona faalotovaivaia ai ma faaitiitia ai lo tatou maelega. (Faata. 24:10; Isa. 5:20) O ā ni māfuaaga e tatau ai ona faatāua lo tatou faaeaga o ni Molimau a Ieova?—Isa. 43:10.
2. Aiseā e tatou te faapea atu ai o le faiva i le fanua o se “galuega paia”?
2 O se “Galuega Paia”: Na faasino atu le aposetolo o Paulo i le faiva o se “galuega paia.” (Roma 15:15, 16) Ua faapefea ona avea le faiva o se “galuega paia”? O le faia o so tatou sao i le faiva, ua avea ai i tatou o se “ʻaufaigaluega faatasi” ma ʻLē e Paia’ o Ieova, ma saosaolaumea ai i le faapaiaina o lona suafa. (1 Kori. 3:9; 1 Pete. 1:15) E silasila Ieova i la tatou talaʻiga o se “taulaga o viiga,” ma ua avea ai le faiva o se vala tāua o la tatou tapuaʻiga.—Epe. 13:15.
3. Aiseā e avea ai le talaʻi atu o le tala lelei o se faaeaga mamalu?
3 O le talaʻi atu o le tala lelei, o se faaeaga mamalu lea o loo olioli ai se vaega toʻaitiiti o tagata. E fiafia agelu e taʻimua i lenei tofiga, ma e mautinoa o loo matuā naunau i latou e faia lea galuega. (1 Pete. 1:12) Ae peitaʻi, ua filifilia e Ieova i tatou o tagata e lē lelei atoatoa, “o ipu omea” mo lenei faaeaga mamalu!—2 Kori. 4:7.
4. E faapefea ona faaalia e tāua iā i tatou le faiva?
4 Ia Faamuamua: Ona e tāua moni iā i tatou lenei faaeaga, o lea, e tatou te vaai ai i le faiva o se tasi “o mea e sili ona tāua” i o tatou olaga. (Fili. 1:10) O lea la, e tatou te faatulaga ai se taimi i vaiaso taʻitasi e faia ai se sao. O se faimusika, o lē e na te faatāuaina le tātā i se faaili lauiloa i le lalolagi, e sauniuni o ia i taimi taʻitasi e faafiafia ai, ma e galue foʻi ina ia faaleleia atili lana taleni. E faapena foʻi i tatou ona sauniuni a o leʻi ō atu i le faiva, ina ia mafai ona “taulimaina ma le saʻo le upu moni” ma galulue ina ia faaleleia atili lo tatou “tomai e aʻoaʻo atu.”—2 Timo. 2:15; 4:2.
5. O ai e faatāuaina la tatou faiva?
5 Aua neʻi faalotovaivaia oe i manatu o le toʻatele. Ia manatua, e toʻatele tagata i la tatou oganuu o loo talisapaia lo tatou asiasi atu. Ae peitaʻi, e tatou te lē o saʻilia le faamaoniga a tagata. Ae sili atu ona tāua le auala o loo finagalo ai Ieova, ma e matuā tāua iā te ia a tatou taumafaiga filigā.—Isa. 52:7.