Fesoasoani i Lē e Ona le Fale ia Fetuutuunaʻi
1. O lē fea le faafeiloaʻiga e sili ona aogā?
1 O lē fea le faafeiloaʻiga i le faiva e sili ona aogā—o le auala tuusaʻo e aunoa ma le fefulifulisaʻi, po o le auala e fesoasoani i lē e ona le fale ia fetuutuunaʻi ma iʻu ai i se taunuuga saʻo? Sa faaaogā e le aposetolo o Paulo le auala fetuutuunaʻi a o talanoa atu i tagata Iutaia i Tesalonia, ma o le iʻuga na ʻtalitonu ai nisi o i latou.’ (Galu. 17:2-4) O le ā e aofia ai i le fetuutuunaʻi?
2. E faapefea ona tatou faataʻitaʻi i le faaaʻoaʻoga a Paulo?
2 Manatunatu i Faalogona ma le Talaaga: E mafai ona aogā se faafeiloaʻiga pe a manatunatu i faalogona o tagata i la tatou oganuu. Na amata le lauga a Paulo i Areopako i tagata Eleni e lē talitonu, e ala i le taʻua o mea ua latou iloa ma taliaina. (Galu. 17:22-31) O lea la, pe a sauniuni lau taulimaga, ia manatunatu i talitonuga masani ma mea e lē fiafia i ai tagata i lau oganuu. (1 Kori. 9:19-22) Afai e lāgā e lē e ona le fale se mataupu e tetee ai, taumafai e saʻili se manatu e lua te ioe faatasi i ai, ma amata ai i inā le talanoaga.
3. E faapefea i le faaaogāina ma le atamai o fesili ona fesoasoani e fetuutuunaʻi ai ma isi?
3 Faaaogā ma le Atamai Fesili: E lē mafai ona tatou avatu i se tagata malaga ni taʻiala e faatatau i le mea e taunuu i ai, seʻiloga ua tatou iloa le mea o iai o ia i le taimi lenā. I se tulaga talitutusa, e lē mafai ona tatou fesoasoani i le e ona le fale ina ia taunuu i se taunuuga lelei, seʻi vaganā ua tatou iloa ona manatu i le taimi lenā. A o talanoa ma se tagata, sa masani ona faaaogā e Iesu fesili ina ia iloa ai manatu o na tagata. O se faaaʻoaʻoga, na fesili se tasi tagata iā Iesu, “O ā ni mea e tatau ona ou faia ina ia ou maua ai le ola e faavavau?” Na silafia e Iesu manatu o le tamāloa a o leʻi tali atu. (Luka 10:25-28) Ae i le isi itu, ina ua sesē le tali atu a Peteru, na faaaogā foʻi ma le atamai e Iesu fesili e faasaʻo ai ona manatu. (Mata. 17:24-26) O lea la, pe afai e fesili mai pe faaalia foʻi e lē e ona le fale manatu sesē, e mafai foʻi ona tatou faaaogā fesili, e fesoasoani ai iā te ia e fetuutuunaʻi i le mataupu.
4. Aiseā e tatau ai ona tatou taumafai e fesoasoani i lē e ona le fale ia fetuutuunaʻi?
4 A o fesoasoani i isi ina ia fetuutuunaʻi, ua tatou faaaʻoaʻo ai i lo tatou Faiaʻoga Sili o Iesu, ma isi faievagelia tomai i le uluaʻi senituri. E lē gata i lea, ua tatou faaalia ai foʻi le faaaloalo i lē e ona le fale. (1 Pete. 3:15) I le iʻuga, atonu o le a ia faatagaina i tatou e toe asiasi atu.