Ia Faautauta a o Auai i le Talaʻiga
1. Aiseā e tāua ai ona tatou faaeteete a o auai i le talaʻiga?
1 “E pei o mamoe i le lotolotoi o luko,” o loo talaʻi auauna a le Atua i totonu o “le tupulaga faapiʻopiʻo ma le taufaasesē.” (Mata. 10:16; Fili. 2:15) O lipoti e faateʻia ai o feteenaʻiga i le va o tagata o atunuu, le ʻaufaatupu vevesi, ma le ave faamalosia ma le lē alofa o tagata, ua matuā taatele i le lalolagi ma ua faamaonia ai le “faateteleina pea [o le] leaga” o tagata amioleaga. (2 Timo. 3:13) O ā mataupu silisili o le Tusi Paia e mafai ona tatou faatatauina, e fesoasoani ina ia ʻtatou faaeteete’ ai a o auai i le talaʻiga?—Mata. 10:16.
2. O ā tulaga atonu e atamai ai le tuua o le oganuu ae talaʻi i se isi vaipanoa?
2 Gaoioi ma le Poto: Ua faamamafa mai i le Faataoto 22:3 le atamai o le “lafi” mai i mala. Ia mataala! E mafai ona suia tulaga o mea i se nofoaga sa sologa lelei e aunoa ma le faatalitalia. E te ono vaaia le faateteleina o gaoioiga a leoleo, pe amata foʻi ona tumutumu ni tagata i se magāala. I nisi taimi o le a aumaia ai e se tagata alofa o le aiga se lapataʻiga. Nai lo o le alu i fafo e fia iloa le mea o loo tupu, e atamai ona vave alu ese loa ma alu atu i se isi nofoaga.—Faata. 17:14; Ioa. 8:59; 1 Tesa. 4:11.
3. E faapefea ona faatatau le mataupu silisili o loo i le Failauga 4:9 i la tatou faiva?
3 Galulue Faatasi: Ua faapea mai le Failauga 4:9: “E sili ona lelei o le toʻalua nai lo o le toʻatasi.” E ui atonu ua e masani e galue toʻatasi ma le saogalemu i le faiva, ae po o toe saogalemu ona faia faapea i aso nei? O nisi nofoaga o loo mafai. Ae o isi, e lē saogalemu mo se tuafafine po o se talavou ona galue toʻatasi mai i lea fale i lea fale, aemaise lava pe a mavae le goto o le lā. Ua faamaonia mai i mea na tutupu le atamai o le iai o se isi e galulue faatasi. (Fai. 4:10,12) E ao i tagata taʻitoʻatasi o loo iai i le ʻautalaʻi ona mataalia mo le saogalemu o isi o le ʻautalaʻi. Ia fai ma au masani le faailoa atu i isi o lea o le a e tuua le oganuu.
4. E mafai faapefea ona tatou galulue e puipuia tagata uma i le faapotopotoga?
4 I le avea ai o ni ē e ʻleoleoina o tatou ola,’ o le matafaioi a toeaina le saunia o taʻiala aogā e tusa ai ma tulaga i lenā vaipanoa. (Epe. 13:17) E mautinoa e faamanuia mai Ieova a o tatou faaalia le lotomaulalo faa-Kerisiano ma galulue faatasi ma le ʻautoeaina. (Mika 6:8; 1 Kori. 10:12) Tau ina ia saosaolaumea auauna uma a Ieova e avatu se molimau aogā i a tatou oganuu, ae ia faautauta i taimi uma.