Ia Faaaʻoaʻo i le ʻAuperofeta—Iona
1. O ā uiga lelei sa faaalia e Iona?
1 O le ā e oso aʻe i lou mafaufau pe a taʻua le perofeta o Iona? E manatu nisi o ia o sē e palaai ma lotomaaa. Peitaʻi, e mautinoa na ia faaalia le lotomaulalo, lototele ma le faataulagaina. E faapefea ona tatou “faaaʻoaʻo” i na uiga lelei o Iona?—Iako. 5:10.
2. E faapefea ona tatou faaaʻoaʻo i le lotomaulalo o Iona?
2 Lotomaulalo: I le taimi muamua, sa sola ese Iona mai i le oganuu na tofia e talaʻi ai. E lē faateʻia ai i tatou, auā sa lauiloa tagata Asuria i le sauā, ma na taʻua Nineva o “le aai o le faamasaatoto.” (Nau. 3:1-3) Peitaʻi, ina ua aʻoaʻia e Ieova Iona ma toe tuu i ai se isi avanoa, sa ia faaalia le lotomaulalo e ala i le faataunuu o lona tofiga. (Faata. 24:32; Iona 3:1-3) E ui sa sola ese i le taimi muamua, ae sa ia faia lava le finagalo o Ieova. (Mata. 21:28-31) Po o tatou maumauaʻi foʻi e talaʻi le tala lelei, e tusa pe aʻoaʻia i tatou pe faigatā le oganuu ua tofia e talaʻi ai?
3. O ā vala o lau faiva e manaʻomia ai le lototele ma le faataulaga?
3 Lototele ma Faataulaga: Sa lotomalie Iona e faataulaga lona ola mo le ʻauvaa, ina ua lamatia o latou ola i lana filifiliga sesē sa fai. (Iona 1:3, 4, 12) E lē gata i lea, sa alu atu i le totonugalemu o le aai o Nineva, atonu ina ia saʻili se nofoaga lelei e faalauiloa atu ai le faamasinoga a Ieova. O gaoioiga na a se perofeta lototele a le Atua, ae lē o se tagata palaai! (Iona 3:3, 4) E tatou te manaʻomia foʻi le lototele mai i le Atua, ina ia talaʻi ai ma le maelega e ui i teteega. (Galu. 4:29, 31) O le faataulagaina e manaʻomia ai ona faaaogā lo tatou taimi ma meafaitino i le faiva.—Galu. 20:24.
4. Aiseā e tatau ai ona faaalu se taimi e mafaufau ai i faaaʻoaʻoga lelei a perofeta a Ieova?
4 Pe a e faitau i se tala e uiga i se perofeta a Ieova, e te maua aogā pe a faaāta i le mafaufau o loo tutupu na mea iā te oe. Ia fesili ifo: O le a faapefea ona ou tali atu? E faapefea ona ou faaaʻoaʻo i ona uiga lelei? (Epe. 6:11, 12) I La Tatou Faiva o le Malo i le lumanaʻi, o le a iai isi mataupu e iloiloina ai nisi o lesona tāua mai i isi perofeta a Ieova.