Faateleina Galuega e Viia ai Ieova
1. O le ā le faatulagaga fou ua fesoasoani iā i tatou e “matuā faaneenee” atu ai iā Ieova?
1 Iā Mati ua mavae atu nei, na amata ai se faatulagaga fou e paeonia lagolago ai mo le 30 itula i masina o Mati ma Aperila, ma masina e lua o le tausaga ia e faia ai le asiasiga a le ovasia matagaluega. Pe afai e amata le asiasiga i le faaiʻuga o le isi masina ae māeʻa i le amataga o le isi masina, e mafai la ona e filifili po o lē fea o na masina e te fia paeonia lagolago ai mo le 30 itula. Ua mafai foʻi ona auai paeonia lagolago i le fono atoa a le ovasia ma paeonia sauatoa ma paeonia faapito. O lea, e tusa pe e tatou te lē ausia le faatulagaga mo le 50 itula, ae e mafai lava ona tatou “matuā faaneenee atu iā Ieova,” e ala i le paeonia lagolago faafā i le tausaga mo le faatulagaga e 30 itula!—Sala. 109:30; 119:171.
2. O ā vala o le a olioli ai paeonia lagolago i le taimi o le asiasiga?
2 Asiasiga a le Ovasia Matagaluega: Ua mafai nei e le toʻatele ona paeonia lagolago i le taimi o le asiasiga a le ovasia matagaluega, ma olioli i le tele o faalaeiauga a o galulue faatasi ma ia i le talaʻiga. (Roma 1:11, 12) E toʻatele paeonia lagolago o le a taumafai e maua se aso mālōlō mai i galuega a o faagasolo le vaiaso, ina ia mafai ai ona galulue ma le ovasia. O ē e faigaluega i aso o le vaiaso, e mafai ona talosaga atu i le ovasia e latou te galulue i le Aso Toonaʻi po o le Aso Sa. O se matuā faaeaga foʻi mo paeonia lagolago le auai i le fono paeonia, faatasi ma paeonia sauatoa ma paeonia faapito.
3. Aiseā e avea ai le vaitaimi o le Faamanatuga o se taimi sili ona lelei e paeonia lagolago ai?
3 Iā Mati ma Aperila: Ua mafai nei e i latou sa masani ona paeonia lagolago mo le 30 itula i le masina o le Faamanatuga, ona faaluaina la latou “taulaga o viiga.” (Epe. 13:15) O le masina o Mati ma Aperila o ni masina lelei ia e faalautele ai la tatou faiva, i le avea ma ni paeonia lagolago. I na masina i tausaga taʻitasi, e tatou te auai ai i se tauiviga tāua e valaaulia isi e auai i le Faamanatuga. Ona e toʻatele i latou o le a paeonia i lenā vaitaimi, o le a tatou maua foʻi le avanoa e galulue ai ma tagata talaʻi eseese. Pe a uma le Faamanatuga, e mafai ona tatou toe asia ē na faaalia le fiafia, ma faalaeiau i latou e auai i le lauga faapitoa i le lautele. Po o le a uunaʻia oe e lou loto ia faaaogā tatau nei avanoa faaopoopo e paeonia lagolago ai?—Luka 6:45.