E Aogā le Afioga a le Atua e Aʻoaʻo Ai

1. O le ā le matua o le fonotaga matagaluega i le tausaga faaleauaunaga 2014, ma o le ā le fesili o le a taliina ai?

¹ O Ieova o lo tatou “Aʻoaʻo Sili”, o ia o le faiaʻoga sili i le aoao o mea. (Isa. 30:20, 21) E faapefea ona aʻoaʻo i tatou e Ieova? Ua ia saunia se tusi e sili atu i lo o se isi lava tusi, o lana Afioga faagaeeina, le Tusi Paia. E faapefea i aʻoaʻoga a le Atua ona tatou maua ai aogā i le itu faaletino, mafaufau, faalogona ma le faaleagaga? O le a talanoaina le tali o lenei fesili i le polokalame o le fonotaga matagaluega i le tausaga faaleauaunaga 2014. O le matua o le polokalame, “E Aogā le Afioga a le Atua e Aʻoaʻo Ai,” e faavae mai i le 2 Timoteo 3:16.

2. O ā fesili o le a taliina lea e faamatilatila mai ai manatu autū?

² Mātau Manatu Autū Nei: O manatu autū o le polokalame, o le a faamatilatila i tali o fesili o loo mulimuli mai:

• O ā aogā o aʻoaʻoga a le Atua i o tatou olaga? (Isa. 48:17, 18)

• O le ā le faamautinoaga e tatou te maua, pe a faia ni fetuutuunaʻiga i o tatou tulaga ina ia auauna ai iā Ieova faataimi atoa? (Mala. 3:10)

• O le ā e ao ona tatou faia pe a fesagaʻia ma ni “aʻoaʻoga sesē”? (Epe. 13:9)

• E faapefea ona tatou faaaʻoaʻo i le auala na “aʻoaʻo atu” ai Iesu? (Mata. 7:28, 29)

• Aiseā e tatau ai i ē e aʻoaʻo atu ona aʻoaʻoina muamua i latou? (Roma 2:21)

• O ā aogā o le Afioga a le Atua? (2 Timo. 3:16)

• E faapefea ona aafia tagata pe a “lūlūina” atunuu? (Ha. 2:6, 7)

• Aiseā ua maufaatuatuaina ai e Ieova i tatou? (Efe. 5:1)

• Aiseā e tatau ai ona tatou taumafai malosi e tumau i aʻoaʻoga a Ieova? (Luka 13:24)

3. Aiseā e tāua ai ona tatou auai ma uaʻi totoʻa atu i le polokalame lea ua saunia mo le taimi tatau?

³ I le amataga o le 2 Timoteo mataupu 3, a o leʻi tusiaina upu lea e faavae mai ai le matua o le polokalame, na faamatala mai ai e Paulo taimi faigatā lea e mātaulia ai aso e gata ai. Na ia tusi e faapea: “O tagata amioleaga ma ē taufaasesē, e faateteleina pea lo latou leaga, o loo faasesē atu i nisi ma ua faasesēina foʻi i latou.” (2 Timo. 3:13) E lē tatau la ona faasesēina i tatou. Maʻeu le tāua o lo tatou faalogo ma faatatauina aʻoaʻoga a le Atua! O lea, seʻi o tatou maumauaʻi ina ia auai ma uaʻi totoʻa atu i lenei polokalame ua saunia mo le taimi tatau.