E Matuā Malosi le Afioga a le Atua
1. O le ā le matua o le aso faapitoa o fonotaga mo le tausaga faaleauaunaga 2014?
1 E ese mai i so o se mea e faia pe faapogaia e tagata lē lelei atoatoa, e iai i le Tusi Paia le malosi e suia ai o tatou olaga, ina ia ōgatusa o tatou ala, mafaufauga ma le finagalo o Ieova. O le ā le malosi o le Afioga a le Atua? E faapefea ona tatou faatatauina atoatoa le Tusi Paia i o tatou olaga? E faapefea ona tatou faaaogāina e fesoasoani ai i isi? E mautinoa o le a faamalosia faaleagaga i tatou uma, a o talanoaina nei vala i le polokalame o le aso faapitoa o fonotaga, mo le tausaga faaleauaunaga 2014. O le matua, “E Matuā Malosi le Afioga a le Atua” e faavae mai i le Eperu 4:12.
2. O ā fesili o le a taliina i lea aso faapitoa o fonotaga?
2 Saʻili Tali o Fesili Nei: A o e faalogologo i le polokalame, ia fai ni au faamaumauga o tali mo fesili o loo mulimuli mai.
• Aiseā e tatau ai ona tatou maufaatuatuaina le Afioga a Ieova? (Sala. 29:4)
• E faapefea ona tatou tofo i aogā o le malosi o le Afioga a le Atua? (Sala. 34:8)
• E faapefea ona e faailoa atu le mana o le Afioga a le Atua i lau faiva? (2 Timo. 3:16, 17)
• E faapefea ona tatou ʻalofia le maileia i le malosi taufaasesē o le lalolagi a Satani? (1 Ioa. 5:19)
• E faapefea iā te oe o se talavou ona taulau manuia i le itu faaleagaga? (Iere. 17:7)
• E faapefea ona tatou maua le malosi e ui ina tatou vaivai? (2 Kori. 12:10)
• O le ā e manaʻomia ina ia faaauau ai ona faia suiga i o tatou olaga, e tusa po ua leva ona tatou faia ni masaniga ma ni uiga leaga? (Efe. 4:23)
3. E ese mai le faalogologo i le polokalame, o ā nisi auala e tatou te maua ai aogā mai i le aso faapitoa o fonotaga?
3 E tele ni aogā e tatou te maua mai i nei faamatalaga tāua. E lē gata i lea, o le aso faapitoa o fonotaga, fonotaga matagaluega ma le tauaofiaga itumalo, e tatou te maua ai avanoa e faalautele atu ai lo tatou alofa mo isi, ma feiloaʻi ai ma uso ma tuafāfine mai i isi faapotopotoga. (Sala. 133:1-3; 2 Kori. 6:11-13) O lea, ia faaalu le taimi e talatalanoa ai ma uō ua leva ona masani, ma saʻili nisi uō fou. Afai o loo iai se failauga asiasi i la outou aso faapitoa o fonotaga, e pei o le ovasia itumalo po o se uso mai i le Peteli, aiseā e lē faaaogā ai lenā avanoa e faafeiloaʻi ai o ia ma lana avā? Ioe, e tele māfuaaga e tatou te tulimataʻia ai le aso faapitoa o fonotaga o loo loma nei!