E Tatau Ona Tatou Nofosauni i Taimi Uma e Talaʻi Atu
1. E faapefea ona tatou iloa sa manatu faievagelia i le uluaʻi senituri, e tatau ona latou nofosauni i taimi uma e talaʻi atu?
1 Na folafola e “lē aunoa” e faievagelia maelega i le uluaʻi senituri, le tala lelei i so o se mea na maua ai tagata. (Galu. 5:42) E faigatā la ona tatou manatu e faapea ina ua ō atu mai i lea fale i lea fale, na latou pāsia tagata i le auala tele e aunoa ma le talaʻi atu i ai. E latou te leʻi misia foʻi se avanoa e molimau lē fuafuaina atu ai, a o faia faatauga i le maketi ina ua māeʻa le talaʻiga. I le pei o Iesu, sa latou manatu e tatau ona latou nofosauni i taimi uma e talaʻi atu.—Mare. 6:31-34.
2. O le ā e aofia ai i le ola e tusa ma lo tatou igoa?
2 Ia Nofosauni Pea: O lo tatou igoa o Molimau a Ieova, e lē o tau ina faamatala atu ai le galuega o loo tatou faia: o loo faamatala atu ai foʻi po o ai i tatou. (Isa. 43:10-12) O lea la, e tatou te nofosauni pea e tali atu e uiga i lo tatou faamoemoe, e tusa lava pe e tatou te lē o talaʻi atu mai i lea fale i lea fale. (1 Pete. 3:15) Po o e mafaufau muamua i ni tulaga e ono mafai ona e molimau lē fuafuaina atu ai, ona mafaufau lea i sau tala atonu e fai atu? Pe e te ave i taimi uma ni lomiga ina ia tufa atu i ē e faaalia le fiafia? (Faata. 21:5) Pe e na o le talaʻiga mai i lea fale i lea fale e te auai ai, pe o e folafola atu foʻi le tala lelei i tagata i isi nofoaga pe a talafeagai ai?
3. Aiseā e lē tatau ai ona tatou manatu māmā i le talaʻiga i alatetele ma mea e paka ai taavale, paka, nofoaga o pisinisi ma isi nofoaga?
3 Molimau Atu i “Nofoaga Faitele”: E tatou te talaʻi atu i alatetele ma mea e paka ai taavale, paka, nofoaga o pisinisi ma isi nofoaga. Po o na taumafaiga o ni mea e lē masani ona fai, pe e tuu foʻi i le faitalia o le tagata pe e fai pe leai? Na taʻua e le aposetolo o Paulo, sa ia talaʻi atu “i luma o le lautele” ma mai i lea fale i lea fale. (Galu. 20:20) O le talaʻiga mai i lea fale i lea fale, o le auala autū lea ma sili ona aogā e tatou te oo atu ai i tagata ma faailoa atu i ai le feʻau o le Malo. Peitaʻi, sa taulaʻi atu faievagelia i le uluaʻi senituri i tagata, ae e lē o fale. Sa latou faaaogā avanoa uma e talanoa atu ai e faatatau i le upu moni—i luma o le lautele, lē fuafuaina, ma mai i lea fale i lea fale. Tau ina ia tatou taulaʻi atu foʻi i tagata ina ia faataunuu atoatoa ai la tatou faiva.—2 Timo. 4:5.