Ia Faaaʻoaʻo i le ʻAuperofeta—Mika
1. O le ā le fesili na tuufesili ai Mika, ma aiseā e leʻi iʻuvale ai le feʻau na ia folafolaina?
1 O afea e oo mai ai le faaumatiaga o lenei faiga o mea amioleaga? O le fesili lenā na tuufesili ai foʻi le perofeta o Mika, a o ia faalauiloa atu le feʻau faafaamasinoga a Ieova i le malo o Isaraelu ma Iuta. E leʻi iʻuvale le feʻau na ia folafolaina. I le 740 T.L.M., a o soifua pea Mika, na faataunuuina ai le valoaga a Ieova e faatatau iā Samaria. (Mika 1:6, 7) Mulimuli ane i le 607 T.L.M., na faaumatia ai Ierusalema. (Mika 3:12) E faapefea ona tatou faaaʻoaʻo iā Mika, a o tatou faatalitali le oo mai o le aso faamasino o Ieova?
2. E faapefea ma aiseā e tatau ai ona tatou faaalia le onosaʻi, a o faatalitali le oo mai o le aso o Ieova?
2 Ia Onosaʻi: Na tusi Mika e faapea: “A o aʻu, ou te vaai atu pea iā Ieova. Ou te faatalitali ma le onosaʻi i le Atua o loʻu faaolataga.” (Mika 7:7) E leʻi faapea na tau ina faatalitali Mika i le taimi e oo mai ai le iʻuga. Nai lo o lea, na pisi pea o ia o se perofeta a Ieova. A o tatou faatalitalia le oo mai o le aso o Ieova, e tatau foʻi ona tatou gaoioi “e tusa ma amioga paia ma galuega o le faamaoni i le Atua.” (2 Pete. 3:11, 12) O le onosaʻi o Ieova ua maua ai e tagata taʻitoʻatasi le avanoa e salamō ai. (2 Pete. 3:9) O lea la, e tatou te mulimuli i fautuaga faale-Tusi Paia ina ia faaaʻoaʻo ai i le onosaʻi o perofeta.—Iako. 5:10.
3. Aiseā e tatau ai ona tatou ōle atu iā Ieova mo lona agaga paia?
3 Faalagolago Atu i le Malosi o Ieova: E ui i le faigatā o le tofiga na feagai ma Mika, ae na ia faalagolago atu iā Ieova mo le malosi e faatinoina ai. (Mika 3:8) Ua uunaʻia i tatou e le Afioga a le Atua ina ia faalagolago atu i le malosi mai i le Atua. E na te foaʻi mai le malosi i ē vaivai ina ia mafai ona faatinoina ai o latou tiute tauave faaleagaga. (Sala. 84:5, 7; Isa. 40:28-31) Pe sa e lagona le fesoasoani a Ieova i lau auaunaga? Pe e fai ma au masani le ōle atu iā Ieova mo le fesoasoani a lona agaga paia?—Luka 11:13.
4. O le ā le faaaʻoaʻoga ua faataatia e Mika mo i tatou i aso nei?
4 Sa sili ona faatāua e Mika i lona olaga le faia o le finagalo o le Atua. Na ia filifili e tumau ma le faamaoni e ui i le faateteleina o amioga leaga. I se tulaga talitutusa, ua tofotofoina foʻi lo tatou faamaoni i aso taʻitasi. O lea, ia tatou tumau ma le faamaoni, ma ia “savavali i le suafa o Ieova lo tatou Atua i aso uma lava, e oo i le faavavau.”—Mika 4:5.