Faaleleia o o Tatou Tomai i le Faiva—Ia Avea Oe o se Paga Lelei

Māfuaaga e Tāua Ai: Na silafia lelei e Iesu le tāua o le galulue taʻitoʻalua. O lea, ina ua ia auina atu ona soo e toʻa 70 e talaʻi, na ia tofia i latou e galulue taʻitoʻalua. (Luka 10:1) Pe a feagai se tagata talaʻi ma se faafitauli i le fanua pe ua lē mautinoa foʻi i sana tali e fai atu i lē e ana le fale, e mafai e oe o loo avea ma paga a lenā tagata ona fesoasoani atu iā te ia. (Fai. 4:9, 10) E mafai foʻi ona e avatu i nisi taimi ni fautuaga i lē o loo lua galulue, ina ia faaleleia ai pea le auala e aʻoaʻo ma talaʻi atu ai. (Faata. 27:17) E mafai foʻi ona e avatu iā te ia ni faalaeiauga a o lua talaʻi mai i lea fale i lea fale.—Fili. 4:8.

Le Auala e Fai Ai:

Ia faalogologo lelei a o talaʻi atu lē o loo lua galulue faatasi. (Iako. 1:19) Ia mulimuli i lau Tusi Paia pe a faitau se mau. O le faia faapea, o le a e iloa ai le auala e te tali atu ai pe a manaʻomia ona faaali atu sou manatu.
Ia iai le faautautaga mamao, ina ia iloa ai pe e tatau ona fai atu sou manatu ma po o le ā le taimi e faia ai faapea. (Faata. 25:11) Pe a lua ō ma se isi tagata talaʻi e faia sana suʻesuʻega faale-Tusi Paia, e lelei pe a fai atu sau faaopoopoga i nisi taimi. Peitaʻi, pe a talaʻi mai i lea fale i lea fale, atonu e manaʻo lē o loo lua galulue e faia e ia lana fale e aunoa ma lou faasalavei atu. Ae afai o ia o se tagata talaʻi fou, pe ua lē mautonu foʻi lē o loo oulua galulue i se manatu, e mautinoa la o le a ia talisapaia lau fesoasoani. E tusa lava po o loo lua galulue i le talaʻiga, fai toe asiga pe fai suʻesuʻega foʻi, e lē tatau lava ona e faasalavei atu, suia le mataupu pe taumafai foʻi e faoa le talanoaga.
Faasoa atu ou tomai. E iai taimi e mafai ona e avatu ai se fautuaga i lē o loo lua galulue ina ia uigā ai le auala e talaʻi atu ai. (Faata. 3:27) Pe a talafeagai le taimi, atonu e mafai ona e faapea atu: “O le ā sou manatu, na e fiafia i lau taulimaga?” pe “E mafai ona fai atu sina aʻu fautuaga?” po o le “O le auala lea na ou faataʻitaʻia.” Ia manatua, e ui e talisapaia e i latou na a tatou fautuaga mai i lea taimi i lea taimi, peitaʻi e faavaivaia i latou pe a tatou faailoa atu pea itu e latou te lē o taulau ai.

Faataʻitaʻi a o Faagasolo le Masina:

Pe a uma le talaʻiga, ia taʻu atu i lau paga sana faamatalaga po o sana gaoioiga na fai na avea ai o ia o se paga lelei.