ʻIa Teu i Lou Loto Upu Nei’

Ua pei mātua o ni leoleo mamoe. E tatau ona latou tausia lelei a latou fanau, ona e faigofie lava ona taaʻina ese ma osofaʻia fanau. (Faata. 27:23) E faapefea i mātua ona faataunuu la latou matafaioi? E tatau ona latou faaalu se taimi i aso taʻitasi e talanoa ai ma a latou fanau, ina ia iloa ai manatu ma mea o loo i loto o fanau. (Faata. 20:5) E tatau foʻi i mātua ona atiaʻe fanau i mea e lē mū i le afi, ina ia faamalosia ai le faatuatua o fanau. (1 Kori. 3:10-15) Ua faamatilatila mai i le vitiō ʻIa Teu i Lou Loto Upu Nei,’ le tāua o le faia e lē aunoa o tapuaʻiga a le aiga. Ia matamata faatasi le vitiō o se aiga ma iloilo fesili o loo mulimuli mai.

(1) O le ā le māfuaaga na amata ai ona lē toe uaʻi atu le aiga o Toma i mea faaleagaga? (2) Aiseā na lē taulau ai Toma i le taimi muamua na taumafai ai e toe fai la latou tapuaʻiga a le aiga? (3) O le ā le auala faale-Tusi Paia e sili ona aogā i le tausia aʻe o fanau? (Teu. 6:6, 7) (4) O le ā e mafai ona saosaolaumea i le lelei o fesootaʻiga i totonu o se aiga? (5) O ā faataulaga e mananaʻo le fanau ina ia faia e o latou mātua? (6) Na faapefea ona avea le uso o Matini ma lana avā o Isapela ma taaʻiga lelei i le aiga o Toma? (Faata. 27:17) (7) O ā sauniuniga e tatau ona muaʻi faia e le ulu o le aiga, ina ia taulau manuia ai le tapuaʻiga a le aiga? (8) O ā mea na faia e le uso o Toma ina ia toe faaleleia ai le tulaga o lona aiga? (9) Aiseā e tāua ai le faia e lē aunoa o le tapuaʻiga a le aiga? (Efe. 6:4) (10) O ā nisi o mea e mafai ona fai i le tapuaʻiga a le aiga? (11) Na faapefea ona faaalia e Toma le toʻa ae maumauaʻi foʻi, ina ua fesoasoani iā Mika ia iloa le tāua o le faia o le mea e saʻo? (Iere. 17:9) (12) Na faapefea ona fesoasoani Toma ma Monika iā Repeka, ina ia faia le filifiliga saʻo e tusa ai ma lana faigāuō ma Justin? (Mare. 12:30; 2 Timo. 2:22) (13) Na faapefea ona faaalia e le uso o Toma ma lana avā o Monika le faatuatua ina ua la faia suiga i o la olaga? (Mata. 6:33) (14) Ua faapefea ona faamamafa mai i lenei vitiō le manaʻoga mo ulu o aiga, ina ia tausia o latou aiga i le itu faaleagaga? (1 Timo. 5:8) (15) I le avea ai ma ulu o se aiga, o le ā ua e maumauaʻi e fai?

FAUTUAGA MO ULU O AIGA: O lenei tala faatino sa faatinoina i le tauaofiaga itumalo i le 2011. I lenā taimi, pe na e mātauina ai e manaʻomia ona faaleleia atili a outou tapuaʻiga a le aiga? Ae faapefea i le taimi lenei? Pe afai o loo manaʻomia nisi fetuunaʻiga atili, faamolemole ia tatalo atu iā Ieova ma faia ni suiga ina ia maua ai e lou aiga aogā tumau.—Efe. 5:15-17.