Faaleleia o ō Tatou Tomai i le Faiva—Ofo le Tusi Aʻoaʻoga Moni

Māfuaaga e Tāua Ai: O le tusi Aʻoaʻoga Moni o se tasi o meafaigaluega tāua e faaaogā i la tatou aʻoaʻo atu. Peitaʻi, a o leʻi faaaogā lenei tusi e amata ai se suʻesuʻega ma se tasi, e tatau ona tatou ofo muamua atu iā te ia. O lea, e tatau ona tatou taumafai ia iai ni tomai i le auala e ofo ai le tusi Aʻoaʻoga Moni i le faiva. (Faata. 22:29) E tele auala e mafai ona ofo ai lenei tusi, ma e tatau i tagata talaʻi ona faaaogā le auala e latou te maua ai aogā.

Le Auala e Fai Ai:

Ia lāgā se fesili faatupu manatu, lea e tataʻi ai le tagata i se mataupu patino i le tusi. Atonu foʻi e mafai ona faaaogā se tasi o fesili o loo i le amataga o mataupu taʻitasi. Pe a uma ona e faalogo atu i le tali a le tagata, ia faitau se mau talafeagai ona faasino lea i ai o le palakalafa o loo taʻua ai lenā manatu, ma atonu e mafai ona oulua talanoaina puupuu le palakalafa.
O se isi auala, o le faaaogā lea o itulau amata e faaosofia ai le naunau o le tagata, ona faasino lea o ia i le vaega o le tusi o loo maua ai le tali faale-Tusi Paia. O se faataʻitaʻiga, e te ono taʻua se faalavelave mataʻutia na taʻua i tala fou, ma faamatala i ai e toʻatele tagata e tomānatu po o ā tali i fesili o loo lāgā i le itulau e 3. E te ono fai atu foʻi o loo e asiasi i aiga taʻitasi e faailoa i ai se tala lelei e faatatau i le lumanaʻi, ona faasino lea i ata i le itulau e 4-5 ma fesili i ai, “O lē fea o nei folafolaga e te manaʻo e faataunuu?” O se isi auala o lou faapea atu lea, o loo e asia puupuu tagata ina ia fesoasoani i ai e iloa tali o fesili e sili ona tāua i le olaga. Ia faasino o ia i fesili o loo i le pito i lalo o le itulau e 6, ma fesili i ai po o lē fea o nei fesili e na te fia maua i ai se tali.
Ia ofo tuusaʻo atu le faia o se suʻesuʻega faale-Tusi Paia. E te ono faapea atu: “O loo matou tuuina atu i tagata lenei tusi m suʻesuʻega faale-Tusi Paia. Pe na e vaai muamua i lenei tusi? [Faatali mo se tali.] Pe afai e fetaui ma oe, ou te fiafia e faaalu ni nai minute e faataʻitaʻi atu ai le auala e faaaogā ai lenei tusi faatasi ma lau kopi o le Tusi Paia.”

Faataʻitaʻi a o Faagasolo le Masina:

Ia fai ni faataʻitaʻiga i taimi o a outou tapuaʻiga a le aiga.
I le faiva, ia faailoa atu i isi tagata talaʻi lau tala o loo fuafua e fai atu i tagata. (Faata. 27:17) Ia sui lau taulimaga pe afai e lē o maua ai ni aogā.