Ia Faaaʻoaʻo i le ʻAuperofeta—Sapakuka
1. Aiseā e ono oo ai iā i tatou faalogona sa i le perofeta o Sapakuka?
1 A o tatou ola i lenei lalolagi ua faateteleina le amioleaga, e ono oo iā i tatou faalogona sa iā Sapakuka, o lē na fesili atu iā Ieova: “Aiseā ea ua e faaali mai ai iā te aʻu o mea tigā ma ua e silasila mai ai pea i puapuaga?” (Sapa. 1:3; 2 Timo. 3:1, 13) O lo tatou manatunatu loloto i le feʻau na talaʻia e Sapakuka ma lana faaaʻoaʻoga o le faamaoni, o le a fesoasoani iā i tatou e tumau ai a o faatalitali atu i le oo mai o le aso faamasino o Ieova.—2 Pete. 3:7.
2. E faapefea ona faaalia o loo tatou ola e tusa ai ma le faatuatua i aso nei?
2 Ola e Tusa ai ma le Faatuatua: Nai lo o le lofitūina o Sapakuka i le tulaga leaga na siʻomia ai o ia, sa tumau pea ona ia mataala ma mataalia faaleagaga. (Sapa. 2:1) Sa faamautinoa atu e Ieova i lenei perofeta o le a faataunuuina Lana afioga i lana taimi atofaina ma “o lē e amiotonu, e ola pea o ia i lona faatuatua.” (Sapa. 2:2-4) O le ā le uiga o lenei mea mo Kerisiano o loo ola i siʻui o lenei taimi o le iʻuga? E tāua lo tatou iloa po o afea o le a oo mai ai le iʻuga, ae e sili atu ona tāua lo tatou mautinoa o le a oo moni mai lava. O le faatuatua e uunaʻia ai i tatou e mataala pea ma faamuamua le faiva i o tatou olaga.—Epe. 10:38, 39.
3. Aiseā e tatau ai ona faatumauina lo tatou olioli i le auaunaga iā Ieova?
3 Olioli iā Ieova: O le a tofotofoina lo tatou faatuatua pe a osofaʻia e Koku mai i Makoku tagata o Ieova. (Ese. 38:2, 10-12) O lenei osofaʻiga o le a faateteleina ai faigatā, e oo lava i tagata o Ieova. O le a lē lava meaʻai, paʻū maualalo le tau o le soifuaga, ma atonu o le a leiloloa meatotino a tagata. O le a faapefea ona tatou tali atu pe a tulaʻi mai faigatā? Sa faatalitalia e Sapakuka o le a iai tulaga faigatā, o lea na ia maumauaʻi ai e faatumauina lona olioli i le auaunaga iā Ieova. (Sapa. 3: 16-19) O le a fesoasoani foʻi le “olioli mai iā Ieova” iā i tatou ina ia tumau ai i tofotofoga i le lumanaʻi.—Nee. 8:10; Epe. 12:2.
4. O le ā o loo tatou olioli ai i le taimi lenei ma le lumanaʻi?
4 O i latou o le a faasaoina i le aso faamasino o Ieova, o le a faaauau ona aʻoaʻoina ona ala. (Sapa. 2:14) O le a aʻoaʻoina foʻi i latou o le a toe faatutūina mai e faatatau iā Ieova. O lea, sei o tatou faaaogā avanoa uma i le taimi lenei, e faailoa atu ai i isi Ieova ma ana galuega ofoofogia!—Sala. 34:1; 71:17.