Aiseā e Lē Talia ai e le Atua Tatalo Uma?

E naunau ma lotomalie lo tatou Tamā i le lagi, o Ieova le Atua, e faafofoga i a tatou tatalo. Ae e iai mea e taofia ai o ia mai i le faafofoga mai i a tatou tatalo. O ā nei mea, ma o le ā e tatau ona tatou manatuaina pe a tatalo? O nisi nei o taʻiala mai i le Tusi Paia.

O se vaega o tagata i le lotu o loo latou taulotoina se tatalo mai i se tusi tatalo.

“Pe a e tatalo, aua le tautū i upu masani.”—Mataio 6:7.

E lē finagalo Ieova e aʻo faatauloto a tatou tatalo po o le faitau foʻi mai i se tusi tatalo. Nai lo o lea, e finagalo o ia e tatou te tatalo mai i le loto. O ā ni ou faalogona pe afai e tauloto mai e sau uō iā te oe upu lava e tasi i aso uma? O uō lelei e tautala saʻo ma e faamaoni. Pe a tatou tatalo i a tatou lava upu, e faailoa atu ai e tatou te vaai i lo tatou Tamā i le lagi o sa tatou uō.

Se tamāloa o loo tilotilo i luga a o valuvalu lana pepa loto.

“Pe afai foʻi e tou te ōle atu, e tou te lē mauaina auā e sesē le māfuaaga ua outou ōle atu ai.”—Iakopo 4:3.

E tatou te lē faatalitalia o le a tali mai le Atua i a tatou tatalo pe afai tatou te ōle atu i mea e lē tusa ai ma lona finagalo. O se faaaʻoaʻoga, pe afai e tatalo atu se tagata e taalo i taaloga faitupe i le Atua e fesoasoani iā te ia ia laki ma manumalo i se tupe, po o le a faafofoga Ieova i lenā tatalo? Na ia fetalai manino mai e aua le manaʻo tele ma aua le talitonu i mea e lē moni e pei o le laki. (Isaia 65:11; Luka 12:15) E tatou te lē faatalitalia Ieova e tali mai i na tatalo! Ina ia tali mai le Atua i a tatou tatalo, e ao ona faamautinoa e ōgatusa mea e tatou te tatalo atu ai ma mea o loo ia fetalai mai ai i le Tusi Paia.

“O lē e lē fia faalogo i le tulafono, e oo lava i ana tatalo, e inosia ia.”—Faataoto 28:9.

I taimi o le Tusi Paia, e leʻi faafofoga Ieova i tatalo a ē na lē usiusitaʻi i ana tulafono. (Isaia 1:15, 16) E lē sui lava le Atua. (Malaki 3:6) Pe afai e tatou te mananaʻo e talia e le Atua a tatou tatalo, e ao ona tatou usiusitaʻi i ana tulafono. Ae ā pe afai na tatou faia ni mea sesē i taimi ua teʻa? Po o lona uiga la e lē fia faafofoga mai le Atua iā i tatou? E leai! O le a faamagaloina i tatou e le Atua, pe afai e suia o tatou olaga ma faia le mea sili e faafiafia ai o ia.—Galuega 3:19.