Ia Fesoasoani o se Faapotopotoga i le Tagata Aʻoga e Agavaa mo le Papatisoga

1-2. O ai e mafai ona fesoasoani i se tagata aʻoga ina ia agaʻigaʻi i luma e agavaa mo le papatisoga?

NA FAAPEA mai Amy e nofo i Fiti: “E ese loʻu fiafia i mea na ou aʻoaʻoina mai i laʻu suʻesuʻega faale-Tusi Paia. Na ou iloa o le upu moni lea. Ae na fesoasoani loʻu faatasitasi ma uso ma tuafāfine, e fai ai suiga na manaʻomia ma agavaa ai mo le papatisoga.” Ua faamatilatila mai e le mea na tupu iā Amy le manatu tāua lenei: E agaʻigaʻi i luma se tagata aʻoga o le Tusi Paia ma agavaa e papatiso, pe a maua le fesoasoani mai i isi o le faapotopotoga.

² E felagolagomaʻi tagata talaʻi taʻitoʻatasi i le faatuputeleina o le faapotopotoga. (Efe. 4:16) Na faapea mai Leilani o se paeonia e nofo i Vanuatu: “E iai se faaupuga faapea e manaʻomia le fesoasoani a tagata uma i se nuu e tausia se tamaitiiti. E moni lenā manatu i le faia o isi ma soo. E manaʻomia le fesoasoani a le faapotopotoga atoa i le faia o se soo.” E fesoasoani tagata uma o le aiga, uō ma faiaʻoga i le agaʻigaʻi i luma o se tamaitiiti e avea ma tagata matua. E latou te faia faapea e ala i le faalaeiau ma aʻoaʻo ni lesona tāua i le tamaitiiti. E mafai foʻi e tagata talaʻi ona avatu ni fautuaga, faalaeiauga ma fai se faaaʻoaʻoga lelei mo le tagata aʻoga, ina ia agaʻigaʻi i luma e agavaa mo le papatisoga.—Faata. 15:22.

3. O le ā e te aʻoaʻoina mai i faamatalaga a Ana, Dorin, ma Leilani?

³ Aiseā e tatau ai i se tagata talaʻi o loo faia se suʻesuʻega faale-Tusi Paia, ona talia le fesoasoani a isi tagata talaʻi mo lana tagata aʻoga? Seʻi mātau le faamatalaga a se tuafafine e igoa iā Ana o se paeonia faapito mai i Moldova: “E matuā faigatā lava i se tagata e toʻatasi ona fesoasoani i manaʻoga uma o se tagata aʻoga a o amata ona agaʻigaʻi i luma.” Na mātauina foʻi e Dorin o se paeonia faapito o loo auauna i lenā atunuu: “Ou te leʻi iloa muamua e mafai ona pāʻia le loto o le tagata aʻoga i se faamatalaga a se isi tagata talaʻi.” Na taʻua foʻi e Leilani se isi māfuaaga: “O le alofa māfana e faaalia i le tagata aʻoga, e fesoasoani iā te ia e iloa ai tagata o Ieova.”—Ioa. 13:35.

4. O le ā o le a tatou talanoaina i lenei suʻesuʻega?

⁴ Atonu e te manatu, e faapefea ona ou fesoasoani i se tagata aʻoga e agaʻigaʻi i luma ae ou te lē o faia le suʻesuʻega? Seʻi o tatou talanoaina mea e mafai ona tatou faia, pe a valaaulia i tatou i se suʻesuʻega faale-Tusi Paia ma pe a auai le tagata aʻoga i sauniga. O le a tatou iloa ai foʻi pe faapefea ona fesoasoani toeaina i tagata aʻoga e agaʻigaʻi i luma ma agavaa mo le papatisoga.

PE A VALAAULIA OE I SE SUʻESUʻEGA FAALE-TUSI PAIA

5. O le ā lau matafaioi pe a valaaulia oe i se suʻesuʻega faale-Tusi Paia?

⁵ O le tiute tauave patino a le faiaʻoga, o le fesoasoani i le tagata aʻoga ia malamalama i le Afioga a le Atua. Pe a valaaulia oe i se suʻesuʻega, ia manatua, o oe o le fesoasoani. O lau matafaioi o le lagolagosua i le faiaʻoga. (Fai. 4:9, 10) E faapefea ona avea oe o se fesoasoani lelei i le faiaʻoga?

6. Pe a valaaulia oe i se suʻesuʻega faale-Tusi Paia, e faapefea ona e faatatauina le mataupu silisili i le Faataoto 20:18?

⁶ Ia sauniuni mo le suʻesuʻega. Muamua, fesili i le faiaʻoga e faatatau i le tagata aʻoga. (Faitau le Faataoto 20:18.) E mafai ona e fesili i ai: “O ā mea e fiafia ai lau tagata aʻoga? O le ā le mataupu lea e suʻesuʻe? O le ā se lesona e te manaʻo e faamatilatila i le mataupu lea? E iai se gaoioiga po o se tala e tatau ona ou faia pe lē faia foʻi i le suʻesuʻega? O le ā se vala ou te faalaeiau ai i le tagata aʻoga ina ia agaʻigaʻi ai i luma?” E ui e lē faailoa mai e le faiaʻoga ni mataupu e lē faalauaʻiteleina e uiga i le tagata aʻoga, ae e aogā mea e na te faamatalaina mai e fesoasoani ai i le tagata aʻoga. Na faamatala e se misionare e igoa iā Joy ni talanoaga ma i latou na ia valaaulia i ana suʻesuʻega faale-Tusi Paia: “O talanoaga faapena na fesoasoani i le tuafafine na ma ō, e faaalia ai le naunau moni i le tagata aʻoga ma iloa le auala e fai ai ona sao i le suʻesuʻega.”

7. Pe a valaaulia oe i se suʻesuʻega, aiseā e tāua ai lou sauniuni lelei?

⁷ Pe a valaaulia oe i se suʻesuʻega, e lelei ona e muaʻi sauniuni lelei mo le suʻesuʻega. (Esera 7:10) Na taʻua e le uso o Dorin lea na taʻua muamua: “E ese loʻu talisapaia o sauniuniga lelei a laʻu paga mo le suʻesuʻega ma e mafai ai ona faia sona sao uigā.” E lē gata o le a mātauina e le tagata aʻoga lua sauniuniga lelei, ae o se faaaʻoaʻoga lelei foʻi mo ia. E tusa pe lē mafai ona e sauniuni māeʻaeʻa mo le suʻesuʻega, ae ia faaalu se taimi e iloa ai manatu autū.

8. E faapefea ona uigā lau tatalo i se suʻesuʻega faale-Tusi Paia?

⁸ O le tatalo o se vaega tāua o le suʻesuʻega. O lea, ia mafaufau muamua i mea e faaaofia i lau tatalo pe a talosagaina oe e tatalo. O le faia faapea o le a uigā ai lau tatalo. (Sala. 141:2) E manatua pea e Hanae mai i Iapani le tatalo a se tuafafine na ō atu ma lana faiaʻoga e fai lana suʻesuʻega. Na ia faapea mai: “Na ou iloa le malosi o le faauōga a le tuafafine ma Ieova ma na ou fia pei o ia. Na pāʻia loʻu loto ina ua faaaofia e le tuafafine loʻu igoa i lana tatalo.”

9. I le Iakopo 1:19, e faapefea ona lagolagosua se paga i le faia o se suʻesuʻega faale-Tusi Paia?

⁹ Ia lagolagosua i le faiaʻoga i le taimi o le suʻesuʻega. Ua faapea mai Omamuyovbi, o se paeonia faapito i Nigeria: “O se paga lelei e faalogologo lelei i le taimi o le suʻesuʻega. E fai ona sao uigā ae e lē tautala soo, auā o le matafaioi a le faiaʻoga le taʻimua i le suʻesuʻega.” O le ā le auala ma le taimi e fai ai sou sao i le suʻesuʻega? (Faata. 25:11) Ia faalogologo lelei a o talanoa le faiaʻoga ma le tagata aʻoga, ona e iloa ai lea o le taimi saʻo e faia ai sou sao i le suʻesuʻega. (Faitau le Iakopo 1:19.) O lea, e tāua le mafaufau lelei a o leʻi avatu sou manatu. O se faataʻitaʻiga, e te lē manaʻo e fāoa le talanoaga, faasalavei le faiaʻoga a o aʻoaʻo pe tataʻi le suʻesuʻega i se isi mataupu. O le fai o sina faaopoopo, se faataʻitaʻiga po o se fesili, o le a fesoasoani e faamatilatila ai manatu autū o loo talanoaina. O nisi taimi atonu e te manatu e lē o tele sou sao e fai i le suʻesuʻega, ae pe a e faamālō ma faaalia le naunau moni i le tagata aʻoga, o lenā ua e fesoasoani iā te ia e agaʻigaʻi i luma faaleagaga.

10. E faapefea ona fesoasoani i se tagata aʻoga ni mea na tutupu iā te oe?

¹⁰ Ia faamatala ni mea na tutupu. Pe a talafeagai, faamatala puupuu i le tagata aʻoga le auala na e maua ai le upu moni, fesagaʻia ai se luʻi ma na faapefea ona fesoasoani Ieova iā te oe. (Sala. 78:4, 7) Atonu o mea tonu na o loo ia manaʻomia. E ono faamalosia ai lona faatuatua ma faalaeiauina ai o ia e agaʻigaʻi i luma mo le papatisoga. E fesoasoani foʻi iā te ia e manumalo ai i se tofotofoga o loo ia fesagaʻia. (1 Pete. 5:9) E manatua e Gabriel o se paeonia mai i Pasili aogā na ia maua, a o fai lana suʻesuʻega faale-Tusi Paia. Na ia faapea mai: “Ina ua faamatala e uso mea na tutupu iā i latou, na ou iloa ai e silafia e Ieova luʻi o loo tatou fesagaʻia. Pe afai na latou manumalo mai i na luʻi, e mafai foʻi ona ou manumalo ai.”

PE A AUAI LE TAGATA AʻOGA I SAUNIGA

11-12. Aiseā e tatau ai ona tatou faafeiloaʻi ma le māfana se tagata aʻoga i sauniga?

¹¹ Ina ia agaʻigaʻi i luma le tagata aʻoga ma agavaa mo le papatisoga, e tatau ona ia auai e lē aunoa i sauniga a le faapotopotoga ma maua ai aogā. (Epe. 10:24, 25) Atonu e valaaulia o ia e le faiaʻoga e auai i lana sauniga muamua. Pe a auai le tagata aʻoga i le sauniga, e mafai e tagata uma o le faapotopotoga ona faalaeiau o ia, ina ia auai e lē aunoa i le sauniga. O ā auala e tatou te faia ai faapea?

¹² Ia faafeiloaʻi ma le māfana le tagata aʻoga. (Roma 15:7) Pe a tatou faafeiloaʻi ma le māfana se tagata aʻoga i sauniga, o le a uunaʻia ai o ia e auai pea i sauniga. Nai lo o le faia o ni fesili e faamāsiasi ai, ia faafeiloaʻi ma le māfana le tagata aʻoga ma faamasani atu i isi uso ma tuafāfine. Aua le manatu o le tiute tauave a le faiaʻoga lana tagata aʻoga, ona o nisi taimi e ono tuai mai le faiaʻoga pe fai foʻi ni ona tiute i le Maota o Sauniga. Ia uaʻi atu i mea o loo talanoa mai ai le tagata aʻoga ma faaalia le naunau moni. O ā aafiaga lelei o le faafeiloaʻi ma le māfana o se tagata aʻoga? Seʻi manatu i le mea na tupu iā Dmitrii. Na papatiso o ia i ni nai tausaga ua mavae ma ua avea nei ma auauna o le faiva. E na te manatuaina lana sauniga muamua, na faapea mai: “Na iloa mai e se uso loʻu lē mautonu a o oʻu faatalitali i fafo o le Maota mo Sauniga. O lea, na ia agalelei mai ma ave aʻu i totonu o le Maota. Na faateʻia aʻu i le toʻatele o i latou na faafeiloaʻia aʻu. Na matuā ou fiafia lava, maʻimau pe ana fai ni sauniga i aso uma. E leʻi oo muamua iā te aʻu nei faalogona.”

13. O ā aafiaga o ou uiga i se tagata aʻoga o le Tusi Paia?

¹³ Ia fai ni faaaʻoaʻoga lelei. O ou uiga e faamautinoa ai i le tagata aʻoga ua ia maua le upu moni. (Mata. 5:16) Ua faapea mai Vitalii o loo auauna o se paeonia i Moldova: “Na ou mātauina uiga o uso ma tuafāfine i le faapotopotoga ma le auala e ola ma mafaufau ai. O lenā mea na ou mautinoa ai, o Molimau a Ieova o le tapuaʻiga moni.”

14. E ono faapefea ona fesoasoani lau faaaʻoaʻoga i se tagata aʻoga e agaʻigaʻi ai i luma?

¹⁴ Ina ia agavaa le tagata aʻoga mo le papatisoga, e tatau ona ia faatatau mea ua ia aʻoaʻoina. E lē faigofie lenā mea, ae pe a mātauina e le tagata aʻoga le aogā iā te oe o le faatatauina o mataupu silisili o le Tusi Paia, o le a uunaʻia ai o ia e faaaʻoaʻo iā te oe. (1 Kori. 11:1) Seʻi o tatou iloiloina le mea na tupu iā Hanae lea na taʻua muamua. Na ia faapea mai: “Na ola uso ma tuafāfine e tusa ma mea na ou aʻoaʻoina. Na ou iloa ai le auala e mafai ona ou faalaeiau, faamagalo ma faaalia ai le alofa. E latou te talanoa i uiga lelei o isi ma ou te manaʻo e faaaʻoaʻo iā i latou.”

15. E faapefea ona fesoasoani le Faataoto 27:17 iā i tatou, e iloa ai le tāua o le faauō i tagata aʻoga a o faaauau ona auai i sauniga?

¹⁵ Ia faauō i le tagata aʻoga. Ia faaalia pea le naunau moni i le tagata aʻoga a o auai pea i sauniga. (Fili. 2:4) E aogā foʻi lou talanoa ma faamasani atili i ai. Nai lo o le suʻesuʻe vale, ia faamālō i ai i suiga lelei ua ia faia ma fesili i ai e faatatau i lana suʻesuʻega, lana galuega ma lona aiga. O na talanoaga o le a māfana ai le lua faiā. O lou faauō i le tagata aʻoga, o le a fesoasoani iā te ia ina ia agaʻigaʻi ai i luma e agavaa mo le papatisoga. (Faitau le Faataoto 27:17.) E manatua e Hanae o loo auauna o se paeonia sauatoa lana sauniga muamua. Na ia faapea mai: “O le iai o ni aʻu uō i le faapotopotoga, na amata ai ona ou naunau e auai i sauniga e ui ina ou lēlavā. O loʻu fiafia i aʻu uō fou, na fesoasoani iā te aʻu e lē toe faauō ai iā i latou e lē tapuaʻi iā Ieova. Na ou manaʻo e māfana le matou faauōga ma Ieova, ma uso ma tuafāfine o le faapotopotoga. O lea, na ou filifili ai loa ou te papatiso.”

16. O ā nisi gaoioiga e te fesoasoani ai i le tagata aʻoga, e iloa o ia o se vaega o le faapotopotoga?

¹⁶ A o faaauau ona agaʻigaʻi i luma le tagata aʻoga ma faia suiga, ia fesoasoani i ai e iloa o ia o se vaega o le faapotopotoga. E mafai ona e faia faapea i le faaalia o le agaga talimālō. (Epe. 13:2) E manatua e Denis o loo auauna i Moldova taimi a o ia suʻesuʻeina le Tusi Paia: “E tele taimi na valaaulia ai maʻua ma laʻu avā i faatasitasiga a uso ma tuafāfine. Na latou faamatala mai le auala na fesoasoani ai Ieova iā i latou ma na faalaeiauina ai i maʻua. O na faatasitasiga na ma mautinoa ai e ma te mananaʻo e auauna iā Ieova, ma maʻeu se olaga matagofie o le a ma maua pe a auauna iā te ia.” Pe a avea se tagata aʻoga ma tagata talaʻi e leʻi papatisoina, ia valaaulia o ia e te lua galulue faatasi i le talaʻiga. Ua faapea mai Diego o se tagata talaʻi i Pasili: “E toʻatele uso na latou valaaulia aʻu e matou te galulue faatasi i le talaʻiga. O le auala sili lea na ou iloa lelei ai i latou. E tele mea na ou aʻoaʻoina mai ai, ma na ou lagona ai le māfana iā Ieova ma Iesu.”

E FAAPEFEA ONA FESOASOANI TOEAINA?

17. E faapefea ona fesoasoani toeaina i tagata aʻoga?

¹⁷ Ia faaalu se taimi ma tagata aʻoga. O le alofa māfana ma le naunau o toeaina, o le a fesoasoani ai i tagata aʻoga e agaʻigaʻi i luma ma agavaa mo le papatisoga. Po o fai ma au masani le talanoa i tagata aʻoga i sauniga? E latou te iloa lou naunau moni iā i latou, pe a e manatua o latou igoa aemaise lava pe a fai ni o latou sao i le sauniga. Pe e mafai ona fetuunaʻi lau faasologa mai lea taimi i lea taimi, ina ia lua ō ai ma se tagata talaʻi i ana suʻesuʻega faale-Tusi Paia? Atonu o le a telē se aogā o lau fesoasoani i le tagata aʻoga. Ua faapea mai Jackie o se paeonia e nofo i Nigeria: “E toʻatele tagata aʻoga na faateʻia ina ua latou iloa, o le uso lea na ma ō atu i a latou suʻesuʻega, o se toeaina. Na faapea mai se tagata aʻoga, ʻE lē mafai ona fai e le matou faifeʻau lenā mea. E na o tagata mauʻoa e asiasi i ai auā e latou te totogia o ia.’” Ua auai lenā tagata aʻoga i le sauniga.

18. I le Galuega 20:28, e faapefea ona faataunuu e toeaina la latou matafaioi?

¹⁸ Ia toleni ma faamalosiau i faiaʻoga o le Tusi Paia. Ua iai i toeaina se tiute tauave tāua o le fesoasoani i tagata talaʻi ia uigā la latou faiva, e aofia ai ma le faia o suʻesuʻega faale-Tusi Paia. (Faitau le Galuega 20:28.) Pe a matamuli se faiaʻoga e fai le suʻesuʻega ona o lenā e te i ai, fai i ai pe mafai ona e faia le suʻesuʻega. Ua faapea mai Jackie lea na taʻua muamua: “E masani ona talanoa mai toeaina po o ā mai aʻu tagata aʻoga. Pe a iai ni luʻi i le faia o aʻu suʻesuʻega faale-Tusi Paia, e latou te aumaia ni fautuaga aogā.” E tele mea e mafai ona fai e toeaina ina ia faalaeiau ai faiaʻoga ma uunaʻia i latou ia maelega i le faia o suʻesuʻega faale-Tusi Paia. (1 Tesa. 5:11) Ua faapea atili mai Jackie: “E ese loʻu fiafia pe a faalaeiau mai toeaina ma faaalia lo latou talisapaia o aʻu galuega mamafa. O na faaupuga e faafouina ai, e pei o se vai mālū i se aso vevela. O a latou faalaeiauga, ua faamalosia ai loʻu mautinoa ma faateleina ai loʻu olioli lea ou te maua mai i le faia o suʻesuʻega faale-Tusi Paia.”—Faata. 25:25.

19. O le ā le olioli e tatou te maua uma?

¹⁹ E tusa pe tatou te lē o faia se suʻesuʻega faale-Tusi Paia i le taimi lenei, ae e mafai lava ona tatou fesoasoani i se tasi ina ia tuputupu aʻe faaleagaga. Nai lo o le fāoa o le suʻesuʻega, ae e mafai ona tatou lagolagosua i le faiaʻoga e ala i o tatou sao lava saunia. E mafai ona tatou faauō atu i tagata aʻoga pe a ō mai i sauniga, ma avea o ni faaaʻoaʻoga lelei iā i latou. E faalaeiau e toeaina tagata aʻoga, e ala i le faaavanoa o latou taimi mo i latou. E faalaeiau foʻi e toeaina faiaʻoga, e ala i le toleni ma faamālō i ai. Maʻeu le olioli e maua i le faia o se sao itiiti, e fesoasoani ai i se tasi e alofa ma auauna i lo tatou Tamā o Ieova!