Aiseā ua Faaauau ai Ona Iai le Feitagaʻi?

O le ā e Uiga i ai le Feitagaʻi?

O le ita e uiga atu i le matuā ʻinoʻino i se tagata po o se vaega o tagata. E mafai foʻi ona faasino atu le feitagaʻi i le ita faaumiumi.

AISEĀ E FEITA AI TAGATA?

E feita tagata ona o le tele o māfuaaga. E masani ona itagia isi, e lē ona o mea e latou te faia, ae ona o le ituaiga tagata e iai i latou. E ono manatu i ai o ni tagata leaga, e mananaʻo e faia mea leaga, ma e lē mafai ona faia ni suiga lelei. E ono manatu foʻi i ai o ni ē e faatauvaa, taufaamataʻu po o le pogai o faafitauli. O i latou e feita i isi, atonu na latou mafatia foʻi i faiga sauā, faiga lē tonu, po o nisi mea na tutupu ua māfua ai ona mauaa na faalogona iā i latou.

LE AUALA UA AAFIA AI TAGATA I LE FEITAGAʻI

I nisi taimi, e mafai ona ita se tagata i se tasi e leʻi feiloaʻi muamua i ai. Mo se faataʻitaʻiga, e mafai ona taaʻina manatu o se tasi i manatu faailoga tagata o ona tauaiga po o uō. O le auala faigofie lenā e atiaʻe ai e se tasi po o se vaega o tagata le feitagaʻi.

Pe a tatou malamalama i le auala faigofie ua aafia ai le toʻatele i le ita, ua tatou malamalama foʻi la i le auala ua feitagaʻi ai tagata. Peitaʻi, ina ia taofia le feitagaʻi o loo aafia ai le lalolagi, e ao ona tatou malamalama i le amataga o le ita lea o loo faamatalaina i le Tusi Paia.

UA FAAILOA MAI E LE TUSI PAIA LE AMATAGA O LE ITA

E LĒ O TAGATA NA TUPUGA MAI AI LE ITA. Na tupuga mai i se agelu i le lagi lea na mulimuli ane taʻua o Satani le Tiapolo, o lē na fouvale i le Atua. Na avea le Tiapolo ma “fasioti tagata talu le amataga” o lana fouvalega. I le avea ai o ia o “sē e pepelo ma le tamā o le pepelo,” ua faaauau ai ona ia faaauiluma le feitagaʻi ma fefinauaʻiga. (Ioane 8:44; 1 Ioane 3:11, 12) Ua faamatalaina o ia i le Tusi Paia o lē e manaʻo e faia mea leaga i isi, lotoa ma faatupuina fefinauaʻiga.—Iopu 2:7; Faaaliga 12:9, 12, 17.

E FAIGOFIE ONA IAI LE UIGA O LE ITA I TAGATA LĒ LELEI ATOATOA. Na mulimuli le uluaʻi tagata o Atamu i le agasala na faia e Satani. O le iʻuga, ua tuufaasolo mai i tagata uma le agasala ma le tulaga lē lelei atoatoa. (Roma 5:12) Ona o le ita o Kaino le atalii ulumatua a Atamu, na ia fasiotia ai lona uso o Apelu. (1 Ioane 3:12) E ui e toʻatele tagata o loo faaalia le alofa ma le tigā alofa, ae ona o le agasala tuufaasolo ua faigofie ai i le toʻatele ona faaalia uiga e māfua ai le feitagaʻi, e pei o le manatu faapito, matauʻa ma le faamaualuga.—2 Timoteo 3:1-5.

O SE TASI E LĒ FIAFIA I ISI E ESE MAI IĀ TE IA E ONO IʻU ATU I LE ITA. Ua faatupulaʻia le feitagaʻi i le lalolagi, e ala i le faaauilumaina o amioga lē alofa ma sauā. Ua matuā faateteleina le faailoga tagata, le faia o upu masoā ma le faaleagaina o meatotino a se tasi, ona “o le lalolagi atoa o loo nofo toʻilalo i le pule a lē o loo leaga,” o Satani le Tiapolo.—1 Ioane 5:19.

Peitaʻi, e lē na o le amataga o le ita o loo taʻua i le Tusi Paia, ae o loo aumaia ai foʻi le vaifofō.