E Fiafia Tagata o Ieova i le Amiotonu

1. O le ā le tofotofoga na fesagaʻia e Iosefa, ma o le ā le auala na ia tali atu ai?

NA FEAGAI Iosefa le atalii o Iakopo ma se tofotofoga faigatā. Na faapea atu le avā a lona matai o Potifara iā te ia, “Seʻi ta momoe.” Ae na teena e Iosefa lenā faaosoosoga. Atonu e faapea mai se tasi i aso nei, ʻAiseā na teena ai e Iosefa lenā faaosoosoga?’ E leʻi iai Potifara i lona maota. E lē gata i lea, o Iosefa o se pologa a le aiga. Pe afai e teena e Iosefa lenā faaosoosoga, e mautinoa o le a faafaigatā e le avā a Potifara le tulaga o mea mo Iosefa. E ui i lea, na teena pea e Iosefa faaosoosoga a lenā fafine. Aiseā? Na ia faapea mai: “Pe faapefea ona ou faia lenei mea leaga tele ma ou agasala ai i le Atua?”​—Kene. 39:7-12.

2. Na faapefea ona iloa e Iosefa o le mulilua o se agasala i le Atua?

² Na faapefea ona iloa e Iosefa e silasila le Atua i le mulilua o se ʻmea e leaga tele’? Pe tusa o le lua selau tausaga mulimuli ane ai, na tusia ai le Tulafono a Mose lea e aofia ai le poloaʻiga manino e faapea: “Aua e te mulilua.” (Eso. 20:14) O le iloa lelei e Iosefa o Ieova, na ia malamalama ai i le silafaga a Ieova e faatatau i le mulilua. O se faataʻitaʻiga, e mautinoa na iloa e Iosefa o le faatulagaga a Ieova i le faaipoipoga, e mo le tane e toʻatasi ma le fafine e toʻatasi. E lē taumatea na faalogo foʻi Iosefa, i le auala na puipuia ai e Ieova Sara le tinā o le tamā o lona tamā mai i le faaleagaina taufeusuaʻiga. E faapena foʻi le auala na puipuia ai e le Atua Repeka le avā a Isaako. (Kene. 2:24; 12:14-20; 20:2-7; 26:6-11) A o manatunatu Iosefa i na mea, na ia malamalama ai i le silafaga a le Atua e faatatau i le mea e saʻo ma le mea e sesē. Talu ai na alofa Iosefa i lona Atua, na ia fiafia foʻi la i Ana tapulaa amiotonu, ma na maumauaʻi o ia e tausisia na tapulaa.

3. O le ā o le a tatou talanoaina i lenei suʻesuʻega?

³ Pe e te fiafia i le amiotonu? E mautinoa o le mea moni lenā. Ae o i tatou uma e lē lelei atoatoa, ma pe afai e tatou te lē faaeteete, e faigofie ona taaʻina i tatou i le manatu o le lalolagi e faatatau i le amiotonu. (Isa. 5:20; Roma 12:2) O lea, o le a tatou iloiloina po o le ā e uiga i ai le amiotonu, ma aogā e tatou te maua pe a faia le mea tonu. O le a talanoaina foʻi auala e tolu e fesoasoani iā i tatou, e faateleina ai lo tatou fiafia i tapulaa a Ieova.

O LE Ā E UIGA I AI LE AMIOTONU?

4. O le ā le manatu sesē o le toʻatele e faatatau i le amiotonu?

⁴ Na manatu taʻitaʻi lotu i taimi o Iesu, o i latou o ni tagata amiotonu. Peitaʻi, na matuā taʻusalaina i latou e Iesu ona sa latou faamasinosino i isi, ma faia a latou lava tapulaa i le mea saʻo ma le mea sesē. (Fai. 7:16; Luka 16:15) E faapena foʻi isi tagata i aso nei. E latou te faapea mai e lē sesē mea o loo latou faia, ae o loo faavae o latou manatu i a latou lava tapulaa. E masani lava o i latou na, o ni ē faamaualuluga, faamasinosino, pe manatu e sili atu i latou nai lo o isi. O na uiga e lē fiafia i ai Ieova, ma e matuā lē fesootaʻi lava i le faia o le mea tonu.

5. I le Tusi Paia, o le ā e uiga i ai le amiotonu? Aumai ni faataʻitaʻiga.

⁵ O le amiotonu o se uiga matagofie. O lona uiga, o le faia o le mea e tonu i le silafaga a Ieova le Atua. I le Tusi Paia o upu o loo faaliliuina ai le upu “amiotonu,” e uiga atu i le ola e ōgatusa ai ma tapulaa e sili ona maualuluga a Ieova. O se faataʻitaʻiga, na faatonuina e Ieova tagata faatauʻoa ina ia faaaogāina ʻfua e tonu.’ (Teu. 25:15) O le upu i le uluaʻi gagana Eperu lea ua faaliliuina i le “tonu,” e mafai foʻi ona faaliliuina i le “amiotonu.” O lea, o se Kerisiano e manaʻo ina ia amiotonu i le silafaga a le Atua, e tatau ona gaoioi ma le tonu i ana feutagaʻiga faapisinisi uma. O se tagata e amiotonu e fiafia foʻi o ia i le faamasinotonu. E lē fiafia o ia pe a vaai atu o faileagaina se tasi. Ae ina ia “matuā faafiafiaina [Ieova],” e iloilo e se tagata e amiotonu moni le silafaga a le Atua e faatatau i ana filifiliga.​—Kolo. 1:10.

6. Aiseā e tatou te mautinoa ai i tapulaa a Ieova e faatatau i le mea saʻo ma le mea sesē? (Isaia 55:8, 9)

⁶ Ua faamatalaina Ieova i le Tusi Paia o le Puna o le amiotonu. O le māfuaaga lea ua taʻua ai o ia, “o le mea e mau ai o lē e amiotonu.” (Iere. 50:7) Talu ai o Ieova o Lē na foafoaina mea, ua na o ia la e mafai ona faataatia tapulaa mo le mea e saʻo ma le mea e sesē. E lelei atoatoa Ieova. O lea, e sili atu lona silafia o le mea e saʻo ma le mea e sesē nai lo o i tatou, ona o i tatou o ni tagata e lē lelei atoatoa ma agasala. (Faata. 14:12; faitau le Isaia 55:8, 9.) Peitaʻi ona na faia i tatou i le faatusa o le Atua, ua mafai ai la ona tatou faatatauina ana tapulaa amiotonu i o tatou olaga. (Kene. 1:27) E tatou te fiafia e faia faapea, ma o lo tatou alofa mo lo tatou Tamā, e uunaʻia ai i tatou e faaaʻoaʻo iā te ia i le mea e gata ai lo tatou mafai.​—Efe. 5:1.

7. Aiseā e tatou te manaʻomia ai tapulaa maufaatuatuaina? Ia faataʻitaʻi.

⁷ Aiseā e aogā ai iā i tatou pe a faatatauina tapulaa a Ieova e faatatau i le mea saʻo ma le mea sesē? Seʻi manatu i le mea e tupu pe a tofu lava le faletupe ma le tau e faaliliu ai le tupe, pe faatulaga e kamupani faufale lava ia fua e latou te faaaogāina. O le a leaga le tulaga e oo i ai. Pe a lē usitaʻia foʻi e fomaʻi tapulaa i le auala e tausia ai maʻi, e ono iʻu atu ai i le maliliu o nisi o maʻi. Ioe, o le iai o ni tapulaa maufaatuatuaina e tatou te maua ai le puipuiga. E faapena foʻi ona puipuia i tatou i tapulaa a le Atua i le mea saʻo ma le mea sesē.

8. O ā faamanuiaga e maua e i latou e fiafia e faia le mea saʻo?

⁸ E faamanuia e Ieova i latou e taumafai e ola e tusa ai ma ana tapulaa. Ua ia folafola mai: “E fai lava le lalolagi mo ē e amiotonu, e nonofo ai pea i latou e oo i le faavavau.” (Sala. 37:29) Sei faaata le autasi, filemu ma le fiafia o tagata uma, pe a mulimuli i tapulaa a Ieova. E finagalo Ieova ina ia e ola i lenā ituaiga o olaga. E mautinoa ua iā i tatou māfuaaga lelei e fiafia ai i le amiotonu. E faapefea ona faateleina lo tatou fiafia i lenei uiga? Seʻi o tatou talanoaina ni vala se tolu.

IA FAATELEINA LOU FIAFIA I TAPULAA A IEOVA

9. O le ā e fesoasoani iā i tatou e fiafia ai i le amiotonu?

⁹ Vala 1: Ia alofa i Lē na faataatiaina tapulaa. Ina ia fiafia i le amiotonu, e manaʻomia ona faateleina lo tatou alofa mo Lē na faataatiaina tapulaa i le mea saʻo ma le mea sesē. O le tele e tatou te alolofa ai iā Ieova, o le tele foʻi lenā o lo tatou mananaʻo ia ola e tusa ai ma ana tapulaa amiotonu. O se faataʻitaʻiga, pe ana alolofa Atamu ma Eva iā Ieova, semanū e la te usiusitaʻi i lana tulafono amiotonu.​—Kene. 3:1-6, 16-19.

10. Na faapefea ona faateleina le malamalama o Aperaamo e faatatau iā Ieova?

¹⁰ E tatou te lē mananaʻo e faia le mea sesē na faia e Atamu ma Eva. E mafai ona tatou ʻalofia lenā mea pe a faaauau ona aʻoaʻo e faatatau iā Ieova, talisapaia ona uiga, ma taumafai e malamalama i le auala e silasila ai o Ia i mea. Pe a faia faapea, e mautinoa o le a faateleina lo tatou alofa mo Ieova. Seʻi manatu iā Aperaamo, na alofa moni o ia iā Ieova. E ui ina faigatā ona malamalama Aperaamo i faaiʻuga a Ieova, ae e na te leʻi tetee ai iā Ieova. Nai lo o lea, na ia taumafai ina ia iloa lelei Ieova. O se faataʻitaʻiga, ina ua iloa e Aperaamo le faaiʻuga a Ieova e faaumatia Sotoma ma Komoro, na popole o ia ina neʻi faaumatia faatasi e “le Faamasino o le lalolagi uma,” tagata amiotonu ma tagata amioleaga. I le manatu o Aperaamo, e lē mafai ona tupu lenā mea. O lea na ia fesili atu ai ma le lotomaulalo iā Ieova. Na onosaʻi Ieova ma tali mai iā Aperaamo. O le iʻuga, na iloa ai e Aperaamo e suʻesuʻe e Ieova loto o tagata uma, ma e lē mafai ona ia faasalaina faatasi le tagata e lē sala ma le tagata agasala.​—Kene. 18:20-32.

11. Na faapefea ona faaalia e Aperaamo lona alofa ma lona maufaatuatuaina o Ieova?

¹¹ Na matuā pāʻia le loto o Aperaamo i le la talanoaga ma Ieova e faatatau i aai o Sotoma ma Komoro. Na atili ai ona alofa ma faaaloalo Aperaamo i lona Tamā. I tausaga mulimuli ane ai, na matuā tofotofoina ai le maufaatuatuaina e Aperaamo o Ieova. Na talosagaina o ia e Ieova ina ia ofo atu lona atalii pele o Isaako e fai ma taulaga. Peitaʻi, o le taimi lea ua iloa lelei e Aperaamo lona Atua. O lea, e na te leʻi toe fesiligia ai o Ia. Na faia e Aperaamo mea na talosagaina ai o ia e Ieova. Seʻi manatu i le ootia o faalogona o Aperaamo, a o sauniuni e ofoina atu Isaako e fai ma taulaga. E mautinoa na mafaufau loloto Aperaamo i mea na ia aʻoaʻoina e faatatau iā Ieova. Na ia iloa e lē mafai e Ieova ona faia se mea e lē tonu pe e lē alofa. E tusa ai ma le faamatalaga a le aposetolo o Paulo, na manatu Aperaamo e mafai e Ieova ona toe faatūina lona atalii pele o Isaako mai i le oti. (Epe. 11:17-19) O le mea moni, na folafola atu e Ieova o le a avea Isaako ma tamā o se atunuu, a o le taimi lenā e leʻi iai se fanau a Isaako. Na alofa Aperaamo iā Ieova, o lea na ia maufaatuatuaina ai o le a gaoioi ma le tonu lona Tamā. E ui lava ina faigatā, ae na ia usiusitaʻi pea iā Ieova ona o lona faatuatua.​—Kene. 22:1-12.

12. E faapefea ona tatou faaaʻoaʻo iā Aperaamo? (Salamo 73:28)

¹² E faapefea ona tatou faaaʻoaʻo iā Aperaamo? E manaʻomia ona tatou aʻoaʻoina pea e faatatau iā Ieova. O le faia faapea, o le a atili ai ona tatou vavalalata iā Ieova ma faateleina ai lo tatou alofa mo ia. (Faitau le Salamo 73:28.) O le a toleniina ai foʻi o tatou lotofuatiaifo, ina ia vaai i mea e pei o le auala e silasila i ai Ieova. (Epe. 5:14) O le iʻuga, o le a tatou teena ai se tasi e taumafai e faaosoosoina i tatou e faia se mea sesē. O le a tatou ʻinoʻino ai i le faia o so o se mea e faatigā ai i lo tatou Tamā, ma faaleagaina ai la tatou faiā ma ia. O le ā se isi mea e tatou te faia e faaalia ai e tatou te fiafia i le amiotonu?

13. E faapefea ona tatou tuliloaina le amiotonu? (Faataoto 15:9)

¹³ Vala lona 2: Ia taumafai i aso taʻitasi e atiaʻe le fiafia i le amiotonu. E pei lava ona tatou taumafai i aso taʻitasi e faamalosia maso o o tatou tino, e faapena foʻi ona tatou taumafai malosi ina ia atiaʻe le fiafia i tapulaa amiotonu a Ieova. E lē faigatā ona faia lenā mea. E magafagafa Ieova ma e na te lē faatalitalia i tatou e faia se mea e sili atu nai lo o le mea e tatou te mafaia. (Sala. 103:14) Ua ia faamautinoa mai e ʻalofa o ia i le tagata e na te tuliloaina le amiotonu.’ (Faitau le Faataoto 15:9.) Pe a tatou tuliloaina se sini patino i le auaunaga iā Ieova, e tatou te faia taumafaiga uma ina ia ausia ai. O le tulaga foʻi lenā pe a tatou tuliloaina le amiotonu. O le a onosaʻi ma fesoasoani mai Ieova iā i tatou, ina ia agaʻigaʻi i luma ma faasolosolo ona faaleleia ai lea vala.​—Sala. 84:5, 7.

14. O le ā “le ufifatafata o le amiotonu,” ma aiseā e tatou te manaʻomia ai?

¹⁴ Ua faamanatu mai ma le alofa e Ieova, e lē o se avega mamafa lo tatou tausisia o le amiotonu. (1 Ioa. 5:3) Ae o se puipuiga e tatou te manaʻomia i aso uma. Ia manatua le ofutau faaleagaga lea na taʻua e le aposetolo o Paulo. (Efe. 6:14-18) O le ā le vaega o le ofutau e puipuia le fatu o se fitafita? O “le ufifatafata o le amiotonu,” lea o loo faaata mai ai tapulaa amiotonu a Ieova. E pei ona puipuia e se ufifatafata le fatu o se fitafita, e faapena foʻi ona puipuia e tapulaa amiotonu a Ieova o tatou loto po o le tagata i totonu. O lea la, ia faamautinoa o loo aofia i lou ofutau, le ufifatafata o le amiotonu.​—Faata. 4:23.

15. E faapefea ona e ofuina le ufifatafata o le amiotonu?

¹⁵ E faapefea ona e ofuina le ufifatafata o le amiotonu? E ala i le faaaogā o tapulaa a le Atua e faia ai au filifiliga i aso taʻitasi. Pe a filifili mea e talanoa ai, musika, faafiafiaga po o tusi e faitau ai, ia muamua ona fesili ifo: ʻO ā mea o le a ou fafagaina ai loʻu loto? Pe e talafeagai nei mea i le silafaga a Ieova? Pe e faaauilumaina ai amioga lē mamā, faiga sauā, matapeʻapeʻa, ma le manatu faapito, o ni mea e lē tonu i le silafaga a Ieova?’ (Fili. 4:8) Pe a ōgatusa au filifiliga ma le finagalo o Ieova, ua e faatagaina la ana tapulaa amiotonu e puipuia ai lou loto.

16-17. Ua faapefea ona faamautinoa mai i le Isaia 48:18, e mafai ona tatou ola e ōgatusa ma tapulaa a Ieova e oo i le faavavau?

¹⁶ Pe e te popole ina neʻi lē mafai ona e ola e tusa ma tapulaa amiotonu a Ieova i aso taʻitasi? Seʻi mātau le faataʻitaʻiga na faaaogā e Ieova o loo i le Isaia 48:18. (Faitau.) Na folafola mai e Ieova o le a pei lo tatou amiotonu “o galu o le sami.” Seʻi faapea o loo e tū i se matafaga ma vaavaai atu i le fafati mai pea o galu o le sami. I lenā siʻomaga toʻafilemu, pe e te popole ina neʻi iai se aso o le a lē toe fafati mai ai galu o le sami? E leai. E te iloa ua faitau afe tausaga o fafati pea galu i lenā matafaga, ma e mautinoa o le a faaauau pea ona fafati.

¹⁷ E faapefea ona pei lo tatou amiotonu o galu o le sami? Pe a e faia se filifiliga, ia muamua ona iloilo po o le ā le finagalo o Ieova, ma ia faia loa. E tusa lava po o le ā le faigatā o lau filifiliga, ae o le a fesoasoani atu pea lou Tamā alofa iā te oe, ina ia e maumauaʻi e ola e tusa ai ma ana tapulaa amiotonu i aso taʻitasi.​—Isa. 40:29-31.

18. Aiseā e tatau ai ona tatou ʻalofia le faamasinoina o isi e tusa ai ma a tatou lava tapulaa?

¹⁸ Vala lona 3: Ia tuu iā Ieova e na te faia le faamasinoga. A o tatou taumafai malosi e ola e tusa ai ma tapulaa amiotonu a Ieova, e tatau ona tatou ʻalofia le faamasinoina o isi ma le faaalia o le faafiaamiotonu. Ia tatou manatua, o Ieova “le Faamasino o le lalolagi uma.” O lea, aua le vaai maulalo i isi e pei ua iā i tatou le aiā e faamasinoina ai i latou, e tusa ma a tatou lava tapulaa. (Kene. 18:25) E leʻi tuuina mai e Ieova iā i tatou le aiā e faamasinoina ai isi. O le mea moni, na poloaʻi mai Iesu: “Aua tou te toe faamasino atu ina neʻi faamasinoina outou.”​—Mata. 7:1.b

19. Na faapefea ona faaalia e Iosefa lona maufaatuatuaina o le faamasinoga a Ieova?

¹⁹ Seʻi o tatou toe iloiloina le faaaʻoaʻoga a Iosefa, o se tagata amiotonu. E na te leʻi faamasinoina isi, e oo lava iā i latou na matuā faileagaina o ia. Na agaleaga ona uso iā te ia, faatau atu o ia e fai ma pologa, ma faatalitonu lo latou tamā ua maliu o ia. I tausaga mulimuli ane ai, na toe faatasi ai Iosefa ma lona aiga. Ua avea nei Iosefa o se pule malosi, ma na ono mafai ona ia faamasinoina ma le lē tonu ona uso, ma tauimasui iā i latou. Na fefefe uso o Iosefa ina neʻi ona faia lenā mea, e ui lava na latou faaalia le salamō moni ona o le mea na latou faia. Ae na faamautinoa atu e Iosefa iā i latou: “Aua tou te fefefe, auā po o aʻu ea e suitulaga i le Atua?” (Kene. 37:18-20, 27, 28, 31-35; 50:15-21) Na lotomaulalo Iosefa ma tuu atu iā Ieova e na te faia le faamasinoga.

20-21. E faapefea ona tatou ʻalofia le faafiaamiotonu?

²⁰ E tatou te faaaʻoaʻo iā Iosefa, e ala i le tuu atu iā Ieova e na te faia le faamasinoga. O se faataʻitaʻiga, aua neʻi o tatou manatu e tatou te iloa uunaʻiga e faia ai e uso ma tuafāfine ni gaoioiga. E tatou te lē iloa mea o loo i o latou loto, auā e na o ʻIeova e na te fuatiaina loto.’ (Faata. 16:2) E alofa o ia i so o se ituaiga o tagata e tusa lava po o ā o latou talaaga ma aganuu. Ua faalaeiauina foʻi i tatou e Ieova ina ia “faalautele atu o [tatou] loto.” (2 Kori. 6:13) E tatou te saʻilia so o se avanoa e faaalia ai le alofa i lo tatou aiga faaleagaga, nai lo o le faamasinoina o i latou.

²¹ E tatou te lē faamasinoina foʻi i latou e lē o iai i le upu moni. (1 Timo. 2:3, 4) Pe e te faamasinoina sou tauaiga e lē talitonu e faapea, “E lē taitai sau lenā tagata i le upu moni?” E leai, o le mea lenā e taʻu o le faamaualuga ma le faafiaamiotonu. O loo tuu mai pea e Ieova le avanoa i “tagata uma lava” e faaalia ai le salamō. (Galu. 17:30) O lea, ia tāmau pea i mafaufau, o le faafiaamiotonu o le lē amiotonu lenā.

22. Aiseā ua e maumauaʻi ai e fiafia i le amiotonu?

²² Tau ina ia avea lo tatou fiafia i tapulaa amiotonu a Ieova, e faaauilumaina ai le olioli ma uunaʻia ai isi ina ia māfana mai iā i tatou, ma latou vavalalata atu ai i le Atua! Ia aua lava neʻi muta lo tatou “fia aai ma fia inu i le amiotonu.” (Mata. 5:6) Ia mautinoa o loo silafia e Ieova au taumafaiga, ma e faafiafiaina pea o ia i au taumafaiga fitā ina ia faia le mea e saʻo. A o matuā faateteleina le amiolētonu i lenei lalolagi, e faamāfanafanaina i tatou i le manatua pea, “e alofa Ieova i ē e amiotonu.”​—Sala. 146:8.