O Mea ua Faailoa Mai i le Tusi Paia e Faatatau i Lē na Tusiaina

1. Aiseā e tatou te lotofaafetai ai mo le Tusi Paia?

E TATOU te matuā lotofaafetai iā Ieova le Atua mo le Tusi Paia. Ua ia saunia mai i le Tusi Paia fautuaga atamai e fesoasoani iā i tatou e taulima ai faafitauli i aso nei. Ua ia aumaia ai foʻi se faamoemoe matagofie mo i tatou i le lumanaʻi. A o le mea e sili ona tāua, ua faaaogā e Ieova le Tusi Paia e faailoa mai ai le tele o ona uiga. O lo tatou manatunatu i ona uiga matagofie o le a pāʻia ai o tatou loto. O le a uunaʻia ai foʻi i tatou e mafuta vavalalata atu i lo tatou Atua, e ala i le atiaʻe o se faauōga ma ia.​—Sala. 25:14.

2. O ā auala eseese ua faailoa mai ai e Ieova o ia lava i tagata?

² E finagalo Ieova ia iloa o ia e tagata. I le taimi ua teʻa, na ia faailoa mai o ia e ala i miti, faaaliga, ma agelu. (Nu. 12:6; Galu. 10:3, 4) Ae e faapefea ona tatou suʻesuʻeina nei miti, faaaliga, ma feʻau mai i agelu pe ana lē tusia? O le māfuaaga lea na faaaogā ai e Ieova tane e ʻtusia i se tusi’ mea e finagalo ia tatou iloa. (Iere. 30:2) Talu ai “e lelei atoatoa le ala o le Atua moni,” e tatou te mautinoa la o lenei auala o fesootaʻiga e lelei ma e aogā.​—Sala. 18:30.

3. Na faapefea ona faamautinoa e Ieova e faasaoina le Tusi Paia? (Isaia 40:8)

³ Faitau le Isaia 40:8. Ua saunia i le Afioga a le Atua taʻiala atamai mo tane ma fafine faamaoni i le faitau afe o tausaga. E faapefea ona tupu lenā mea ae na tusia Tusitusiga Paia i mea e palagofie, ma ua lē o toe maua uluaʻi tusitusiga i le taimi lenei? Na faamautinoa e Ieova ia fai ni kopi o tusitusiga paia. E ui lava e lē lelei atoatoa i latou na tusia kopi o le Tusi Paia, ae na latou faamautinoa na saʻo lelei le auala e kopiina ai. O se faataʻitaʻiga, na taʻua e se tasi o faitofā e faatatau i Tusitusiga Paia Eperu: “E mafai ona tatou faapea atu ma le mautinoa, e leai lava se isi tusi anamua e saʻo lelei lona kopiina nai lo o lenei tusi.” O lea, e ui i le tele o tausaga ua mavae, le faaaogāina o mea e palagofie, ma le lē lelei atoatoa o i latou na kopiina le Tusi Paia, ae e mafai ona tatou mautinoa o upu o loo tatou faitau i ai i le Tusi Paia o loo faailoa mai ai manatu o Ieova, le Tusitala o le Tusi Paia.

4. O le ā o le a tatou talanoaina i lenei suʻesuʻega?

⁴ O Ieova o le Puna “o meaalofa lelei uma ma mea uma e atoatoa ona lelei.” (Iako. 1:17) O le Tusi Paia o se tasi o meaalofa sili ua foaʻi mai e Ieova mo i tatou. Pe a tatou maua se meaalofa mai i se tasi, e mafai ona faailoa mai ai le ituaiga o tagata e iai o ia. E na te iloa lelei ai oe ma ou manaʻoga. E moni foʻi lenā manatu i Lē na Foaʻiina mai le Tusi Paia. Pe a tatou suʻesuʻe i lenā meaalofa, o le a tatou iloa ai le tele o mea e faatatau iā Ieova. Ua tatou iloa ai e silafia lelei i tatou e Ieova ma mea e tatou te manaʻomia. I lenei suʻesuʻega, o le a tatou talanoaina ai auala ua faailoa mai ai i le Tusi Paia uiga nei e tolu o Ieova, o le atamai, faamasinotonu, ma lona alofa. Seʻi o tatou iloiloina muamua auala ua faailoa mai ai i le Tusi Paia le atamai o le Atua.

UA FAAILOA MAI I LE TUSI PAIA LE ATAMAI O LE ATUA

5. O le ā se tasi o auala ua faailoa mai ai i le Tusi Paia le atamai o le Atua?

⁵ E silafia e Ieova e tatou te manaʻomia ana fautuaga atamai, ma ua tumu lana meaalofa o le Tusi Paia i le atamai. Ua aogā fautuaga a le Tusi Paia i tagata, ma ua mafai ona suia ai o latou olaga. Ina ua tusia tusi muamua o le Tusi Paia, na faapea atu Mose i tagata Isaraelu: “E lē o se upu faatauvaa ia mo outou, ae e faalagolago i ai lo outou ola.” (Teu. 32:47) O i latou e usiusitaʻi i Tusitusiga Paia, o le a latou olioli i se olaga taulau manuia ma fiafia. (Sala. 1:2, 3) E ui ua leva ona tusia le Afioga a le Atua, ae o loo iai pea le malosi e faaleleia ai olaga o tagata. O se faaaʻoaʻoga, e te maua i le jw.org le faasologa o mataupu “Suia e le Tusi Paia Olaga,” lea e iai le silia i le 50 tala o mea moni na tutupu iā i latou na faia suiga tetele i o latou olaga, ona o le usiusitaʻi i fautuaga a le Tusi Paia.​—1 Tesa. 2:13.

6. Aiseā e tatou te faapea atu ai e leai se isi tusi e pei o le Tusi Paia?

⁶ E leai lava se isi tusi e pei o le Afioga a le Atua. Aiseā? Talu ai o le Tusitala o lenā tusi o Ieova le Atua, o ia o Lē e ona le malosi uma lava, e soifua e faavavau, ma e lē mafaatusalia lona atamai. Ua maliliu ē na tusia le tele o isi tusi, ma e masani lava ua lē toe aogā fautuaga o loo iai. Peitaʻi, e tumau ona aogā mataupu silisili atamai o loo i le Tusi Paia, ma ua faamaonia le aogā i tagata i so o se vaitaimi na latou ola ai. Pe a tatou faitau i le Tusi Paia ma manatunatu loloto i mea ua tatou aʻoaʻoina, e faaaogā e le Tusitala o le Tusi Paia lona agaga paia e sili ona malosi, e fesoasoani ai iā i tatou ia iloa le auala e faatatau ai fautuaga a le Tusi Paia i o tatou olaga. (Sala. 119:27; Mala. 3:16; Epe. 4:12) Ioe, e naunau le Tusitala o le Tusi Paia e fesoasoani mai iā i tatou. Maʻeu le faalaeiauina o i tatou pe a faitau e lē aunoa le Tusi Paia!

7. Na faapefea ona fesoasoani le Tusi Paia ina ia autasia tagata o le Atua i le taimi ua teʻa?

⁷ O se isi auala mataʻina ua faailoa mai ai i le Tusi Paia le atamai o le Atua, o le auala ua autasia ai ona tagata. Ina ua ulu atu Isaraelu i le Nuu Folafolaina, na latou nofoia se vaipanoa telē. O isi na avea ma faifaiva, o isi na tausia lafumanu, a o isi na faia faatoʻaga. Na ono faigofie ona lē amanaʻia e tagata Isaraelu na nonofo i le isi vaipanoa o latou uso na nonofo i isi vaega o le atunuu. Ae na faatulaga e Ieova ni faatasiga e potopoto faatasi ai tagata Isaraelu ma faalogo i le faitauina ma le faamatalaina o lana Afioga. (Teu. 31:10-13; Nee. 8:2, 8, 18) Seʻi faaata faalogona o se tagata Isaraelu faamaoni, ina ua ia taunuu atu i Ierusalema ma vaaia le faitau miliona o isi ona uso tapuaʻi mai i isi vaega o le atunuu. O lenā auala na fesoasoani ai Ieova i ona tagata ina ia tumau ona autasi. Mulimuli ane na faavae le faapotopotoga Kerisiano, ma na faia aʻe i tane ma fafine e eseese gagana e tautatala ai, ma e eseese foʻi o latou tulaga ma talaaga. O lo latou naunau i Tusitusiga Paia na latou autasi ai e tapuaʻi i le Atua moni. Na faatoʻā mafai ona malamalama i le Afioga a le Atua i latou na talitonu, ona o le fesoasoani a uso talitonu ma le faapotopoto faatasi ma i latou.​—Galu. 2:42; 8:30, 31.

8. Ua faapefea ona fesoasoani le Tusi Paia i le autasia o tagata o Ieova i aso nei?

⁸ O loo faaauau ona aʻoaʻo ma autasia e lo tatou Atua atamai ona tagata e ala i le Tusi Paia. O le puna lea o meaʻai faaleagaga o loo tatou olioli ai. E masani ona tatou faapotopoto faatasi i sauniga a le faapotopotoga, i fonotaga ma tauaofiaga e faalogologo a o faitau, faamatala, ma talanoaina le Tusi Paia. O lea, o le Tusi Paia o se meafaigaluega e sili ona tāua ua faaaogā e Ieova e fesoasoani ai i ona tagata tapuaʻi e “auauna soosootauʻau ai iā te ia.”​—Sefa. 3:9.

9. O le ā le uiga e tatau ona iā i tatou ina ia malamalama ai i le feʻau o le Tusi Paia? (Luka 10:21)

⁹ Seʻi mātau se isi faamaoniga o le atamai o Ieova. E tele vaega o le Tusi Paia na tusia i se auala e na o ē lotomaulalo e malamalama i ai. (Faitau le Luka 10:21.) Ua mafai e tagata i so o se vaipanoa ona faitau le Tusi Paia. Na taʻua e se tagata atamai, o le Tusi Paia “e lē gata o se tusi e aupito sili ona toʻatele ē e faitauina ae o se tusi ua sili ona suʻesuʻeina nai lo o se isi lava tusi.” Peitaʻi, e na o tagata lotomaulalo e malamalama ma faatatau mea o loo taʻua ai.​—2 Kori. 3:15, 16.

10. O le ā se isi auala ua faailoa mai ai i le Tusi Paia le atamai o Ieova?

¹⁰ E iai foʻi se isi auala ua tatou iloa ai le atamai o Ieova i le Tusi Paia. E lē gata ua faaaogā e Ieova le Tusi Paia e aʻoaʻo ai i tatou o se vaega, ae ua mafai ai foʻi ona faatonu ma faamāfanafanaina ai i tatou taʻitoʻatasi. E tatou te lagona le manatu mamafa mai o Ieova iā i tatou taʻitoʻatasi a o faitau i lana Afioga. (Isa. 30:21) Pe a e fesagaʻia se faafitauli, pe e masani ona e suʻeina le Tusi Paia ma faitau i se mau, e peiseaʻī na tusia faapitoa mo oe? O le mea moni, e faitau miliona tagata e mauaina aogā mai i le Tusi Paia. Ae aiseā la ua mafai ai ona e maua faamatalaga e fetaui lelei ma mea o loo e manaʻomia? Talu ai o le Tusi Paia o le galuega a se Tusitala e lē mafaatusalia lona atamai.​—2 Timo. 3:16, 17.

UA FAAILOA MAI I LE TUSI PAIA LE FAAMASINOTONU O LE ATUA

11. Na faapefea ona faaalia e Ieova le lē faailoga tagata ina ua tusia le Tusi Paia?

¹¹ O le isi uiga o Ieova, o le faamasinotonu. (Teu. 32:4) E fesootaʻi lenei uiga ma le lē faailoga tagata, ma e lē faailoga tagata Ieova. (Galu. 10:34, 35; Roma 2:11) Ua atagia mai lona lē faailoga tagata i gagana na tusia ai le Tusi Paia. O uluaʻi tusi e 39 o le Tusi Paia na tusia i le gagana Eperu lea na faigofie ona malamalama ai tagata o le Atua i lenā taimi. Peitaʻi i le uluaʻi senituri T.A., o le toʻatele o tagata na tautatala i le gagana Eleni. O lea, na tusia ai tusi mulimuli e 27 o le Tusi Paia i lenā gagana. E leʻi finagalo Ieova e tusia lana Afioga i se gagana e tasi. I aso nei, e tele gagana o loo tautatala ai le pe ā o le valu piliona o tagata i le lalolagi. E faapefea la i nei tagata e toʻatele ona aʻoaʻoina e faatatau iā Ieova?

12. O le ā se auala ua faataunuu ai le Tanielu 12:4 i nei aso e gata ai?

¹² Na folafola e Ieova e ala i le perofeta o Tanielu, “o le a faatuputeleina le poto saʻo” o loo i le Tusi Paia i le taimi o le iʻuga. E toʻatele o le a malamalama i ai. (Faitau le Tanielu 12:4.) O se tasi o auala ua faatuputeleina ai lenā poto saʻo, o le faaliliuina, tuufaatasia ma le tufatufaina o Tusi Paia ma lomiga faale-Tusi Paia. O le Tusi Paia, o le tusi lea e pito i tele gagana ua faaliliu ma tufatufaina ai. O nisi taimi e matuā taugatā faaliliuga o le Tusi Paia e lomia e kamupani lomitusi. Ua faaliliuina e tagata o Ieova le Tusi Paia atoa po o se vaega i le silia i le 240 gagana, ma e mafai e so o se tasi ona mauaina se kopi e aunoa ma se totogi. O lea, ua mafai ai e tagata o atunuu uma ona aʻoaʻoina e faatatau i le “tala lelei o le Malo” a o leʻi oo mai le iʻuga. (Mata. 24:14) O le finagalo o lo tatou Atua faamasinotonu, ia mafai ona maua e le toʻatele o tagata le avanoa e iloa ai o ia e ala i le faitau i lana Afioga. Ua ia faia faapea ona o lona alofa tele iā i tatou uma.

UA FAAILOA MAI I LE TUSI PAIA LE ALOFA O LE ATUA

13. Aiseā e tatou te faapea atu ai o loo faailoa mai i le Tusi Paia le alofa o Ieova? (Ioane 21:25)

¹³ O loo iai i le Tusi Paia faamaoniga o le alofa o lē na tusiaina, ma o lona uiga silisili lenā. (1 Ioa. 4:8) Seʻi mātau mea na faaaofia e Ieova i le Tusi Paia ma mea e na te leʻi faaaofia ai. Ua ia saunia na o mea e tatou te manaʻomia ina ia maua ai se faiā lelei ma ia, se olaga fiafia i le taimi lenei ma le ola e faavavau. Peitaʻi, ona o le alofa tele o Ieova iā i tatou, e na te leʻi soona aumaia ai ni faamatalaga e sili atu nai lo o mea e mafai ona tatou malamalama i ai.​—Faitau le Ioane 21:25.

14. O le ā se isi auala ua faailoa mai ai i le Tusi Paia le alofa o le Atua?

¹⁴ Ua faaalia mai foʻi le alofa o Ieova e ala i le fesootaʻi mai i se auala e faamamaluina ai i tatou. E na te lē o aumaia i le Tusi Paia se lisi umī o tulafono, e taʻu patino mai ai mea e tatou te faia ma mea e lē tatau ona faia i vala uma o o tatou olaga. Nai lo o lea, ua ia faaaogā mea moni na tutupu, o valoaga faaoso naunau, ma fautuaga aogā e fesoasoani i o tatou mafaufau e faia ai filifiliga lelei. O na auala ua uunaʻia ai i tatou e le Afioga a le Atua ia alolofa ma usiusitaʻi iā te ia mai i o tatou loto.

15. (a) Ua faapefea ona faailoa mai i le Tusi Paia e naunau Ieova iā i tatou? (e) I le ata, o ai tagata o le Tusi Paia o loo manatunatu loloto i ai le teineitiiti, le uso talavou, ma le tuafafine matua? (Kene. 39:1, 10-12; 2 Tu. 5:1-3; Luka 2:25-38)

¹⁵ Ua faailoa mai i le Tusi Paia e matuā naunau Ieova iā i tatou. I le ā le itu? O loo i lana Afioga le tele o tala o loo faailoa mai ai faalogona o tagata. E mafai ona tatou malamalama i faalogona o tagata o loo taʻua i le Tusi Paia, auā o i latou foʻi o tagata “e pei o i tatou.” (Iako. 5:17) Ae o le mea e sili ona tāua, o le mātauina o le auala na feutagaʻi ai Ieova ma tagata e pei o i tatou. O lenā auala ua tatou malamalama lelei ai “e alofa faapelepele ma alofa mutimutivale Ieova.”​—Iako. 5:11.

16. O le ā e tatou te aʻoaʻoina e faatatau iā Ieova pe a tatou faitau i le Tusi Paia i nisi na faia ni mea sesē? (Isaia 55:7)

¹⁶ Ua faailoa mai foʻi i le Tusi Paia le alofa o Ieova iā i tatou i se isi auala. Ua faamautinoa mai ai e lē tuulafoaʻia e lo tatou Atua i tatou pe a tatou faia ni mea sesē. Na tele taimi na agasala ai tagata Isaraelu iā Ieova. Peitaʻi, ina ua latou faaalia le salamō moni, na faamagalo i latou e le Atua. (Faitau le Isaia 55:7.) Na iloa foʻi e Kerisiano i le uluaʻi senituri le alofa tele o le Atua iā i latou. Na faagaeeina le aposetolo o Paulo e faalaeiau i ona uso talitonu, ina ia ʻfaamagalo atu ma faamāfanafana’ i se tamāloa na faia se agasala matuiā ae ua salamō. (2 Kori. 2:6, 7; 1 Kori. 5:1-5) E matuā faalaeiauina le iloaina, e leʻi teena e Ieova ona tagata tapuaʻi ina ua latou faia ni mea sesē. Nai lo o lea, na ia fesoasoani atu ma le alofa, faasaʻo i latou, ma augani atu ina ia toe foʻi atu iā te ia. Ua ia folafola mai o le a ia faia faapea i tagata agasala uma e faaalia le salamō i aso nei.​—Iako. 4:8-10.

IA FAATĀUA LE “MEAALOFA LELEI” O LE AFIOGA A LE ATUA

17. Aiseā ua avea ai le Tusi Paia o se meaalofa mataʻina?

¹⁷ Ua foaʻi mai e Ieova iā i tatou se meaalofa mataʻina. Aiseā e mataʻina ai lana Afioga? E pei ona sa tatou aʻoaʻoina ua faailoa mai i le Tusi Paia le atamai o le Atua, o lona faamasinotonu, ma lona alofa. Ua faailoa mai ai foʻi e finagalo Ieova ia tatou iloa o ia ma avea i tatou ma ana uō.

18. E faapefea ona tatou faaalia le lotofaafetai mo le “meaalofa lelei” a Ieova o le Tusi Paia?

¹⁸ E tatou te lē mananaʻo e manatu māmā i le “meaalofa lelei” o le Afioga a le Atua. (Iako. 1:17) Tau ina ia tatou faaalia pea le lotofaafetai mo lenā meaalofa. E tatou te faia faapea e ala i le faitau ma manatunatu loloto i ai. O le iʻuga, o le a tatou mautinoa ai e faamanuia a tatou taumafaiga e le Tusitala o le Tusi Paia ma tatou “maua ai le poto i le Atua.”​—Faata. 2:5.