E Lē Taitai Puupuu le Aao o Ieova

1. Na faapefea ona faaalia e Mose lona maufaatuatuaina o Ieova, a o ia taʻitaʻieseina le nuu o Isaraelu mai i Aikupito?

O LOO taʻua i le tusi o Eperu nisi o i latou na faaalia le faatuatua, ma o se tasi o i latou na mataʻina lona faatuatua, o Mose. (Epe. 3:​2-5; 11:​23-25) Na ia faaalia le faatuatua ina ua ia taʻitaʻieseina le nuu o Isaraelu mai i Aikupito. E leʻi fefe o ia iā Farao ma lana ʻautau. Na ia maufaatuatuaina atoatoa Ieova, ma taʻitaʻia atu Ona tagata i le Sami Ulaula ma le toafa i se taimi mulimuli ane. (Epe. 11:​27-29) O le toʻatele o tagata Isaraelu na tau masalosalo pe e mafai e Ieova ona tausia i latou, ae na maufaatuatuaina pea e Mose Ieova. E leʻi iʻuvale le faatuatua o Mose, auā na saunia faavavega e le Atua vai ma taumafa e tausia ai ona tagata i le toafa.a—Eso. 15:​22-25; Sala. 78:​23-25.

2. Aiseā na faapea atu ai Ieova iā Mose: “Po ua puupuu ea le lima o Ieova”? (Numera 11:​21-23)

² Peitaʻi, e ui i le malosi o le faatuatua o Mose, ae e pe ā ma le tausaga talu ona faasaoina faavavega le nuu o Isaraelu, ae ia fesiligia pe e mafai e Ieova ona saunia ni aano o manu mo ona tagata. E leʻi iloa e Mose po o le a faapefea ona saunia e Ieova ni aano o manu, e maoona ai le faitau miliona o tagata sa nonofo i le toafa. O lea na tali mai ai Ieova iā Mose: “Po ua puupuu ea le lima o Ieova?” (Faitau le Numera 11:​21-23.) O le faaupuga “le lima o Ieova,” e faasino atu i le agaga paia o le Atua po o lona mana galue. E tai pei na fesili atu Ieova iā Mose, ʻPe e te manatu e lē mafai ona ou faia le mea ua ou folafolaina atu?’

3. Aiseā e tāua ai ona tatou manatunatu i le mea na tupu iā Mose ma tagata Isaraelu?

³ Pe na iai se taimi na e popole ai, po o le a tausia e Ieova ou manaʻoga faaletino po o manaʻoga faaletino o lou aiga? E tusa pe na e popole pe leai, ae seʻi o tatou iloiloina le mea na tupu iā Mose ma tagata Isaraelu, o ē na masalosalo i le mana o le Atua e saunia ai mea e latou te manaʻomia. O le a tatou talanoaina nisi o mataupu silisili o le Tusi Paia, lea e fesoasoani e faamalosia ai lo tatou mautinoa, e lē puupuu le aao o Ieova.

LESONA MAI IĀ MOSE MA TAGATA ISARAELU

4. Aiseā na masalosalo ai le toʻatele o tagata Isaraelu i le tausiga a Ieova?

⁴ Seʻi mātau le siʻomaga o le mea na tupu. Na umi se taimi o savavali i le toafa le nuu o Isaraelu, ma le “toʻatele o isi tagata” na latou ō mai faatasi i Aikupito e agaʻi i le Nuu Folafolaina. (Eso. 12:38; Teu. 8:15) Na faitio na tagata ese i le aai soo i le manai, ma na oo ina faitio atu ai ma le toʻatele o tagata Isaraelu. (Nu. 11:​4-6) Na latou toe moomoo i meaʻai na aai ai i Aikupito. O faitioga a tagata, na manatu ai Mose e tatau ona ia saunia ni aano o manu mo i latou.—Nu. 11:​13, 14.

5-6. O le ā e tatou te aʻoaʻoina mai i le auala na aafia ai le toʻatele o tagata Isaraelu, ona o tagata ese na faatasi ma i latou?

⁵ E foliga mai na aafia le fanauga a Isaraelu i uiga lē lotofaafetai na faaalia e isi tagata sa faatasi ma i latou. E mafai foʻi ona aafia i tatou i uiga lē lotofaafetai o loo faaalia e isi, ma lē faamalieina ai i tatou i mea ua saunia mai e Ieova. O le mea lenā e ono tupu, pe afai e tatou te toe moomoo i ni mea sa tatou maua i le taimi ua mavae, pe matauʻa foʻi i mea e maua e isi. Peitaʻi, e mafai ona tatou maua pea le fiafia pe a atiaʻe le lotomalie, e tusa lava po o ā o tatou tulaga.

⁶ Sa tatau ona manatua e tagata Isaraelu, na folafola atu e le Atua o le a latou maua le tele o mea e tausia ai o latou manaʻoga faaletino, pe a taunuu i le nofoaga fou lea o le a fai mo i latou. E faatoʻā faataunuu la lenā folafolaga pe a latou iai i le Nuu Folafolaina, ae e lē i le taimi o loo fesavaliaʻi ai i le toafa. I se tulaga taitutusa, nai lo o le uaʻi i mea e tatou te lē o maua i lenei faiga o mea, e ao ona tatou mafaufau i mea ua folafola mai e Ieova o le a ia foaʻi mai mo i tatou i le lalolagi fou. E ao foʻi ona tatou manatunatu loloto i mau o le Tusi Paia, lea e fesoasoani iā i tatou e maufaatuatuaina ai Ieova.

7. Aiseā e tatou te mautinoa ai e lē puupuu le aao o Ieova?

⁷ Ae atonu e te taumānatu, pe aiseā na fesili ai le Atua iā Mose: “Po ua puupuu ea le lima o Ieova?” Atonu na finagalo Ieova e fesoasoani iā Mose, e lē gata ia mafaufau i le matuā malosi o lona aao, ae o le mamao foʻi e oo i ai lana fesoasoani. E mafai e le Atua ona saunia mai le tele o aano o manu mo tagata Isaraelu, e tusa lava po o loo iai i se toafa e mamao ese. Na faaalia e le Atua lona mana e ala i lona “aao malosi ma le aao faaloaloa.” (Sala. 136:​11, 12) O lea, pe a tatou feagai ma tulaga faigatā, ia mautinoa e fesoasoani mai Ieova iā i tatou taʻitoʻatasi, e tusa lava po o fea e tatou te iai.—Sala. 138:​6, 7.

8. E faapefea ona tatou ʻalofia le faia o le mea sesē lea na faia e le toʻatele i le toafa? (Tagaʻi foʻi i le ata.)

⁸ E leʻi umi ae saunia e Ieova aano o manu, e ala i le aumaia o le matuā tele o manufelelei o le salu. Peitaʻi, e leʻi lotofaafetai tagata Isaraelu iā Ieova mo lenā vavega. Nai lo o lea, na latou faaalia le manaʻo tele ma na galulue i le ao ma le pō ina ia aoao mai ma faaputu le tele o salu. Na matuā toʻasā Ieova i “ē sa soona mananaʻo i meaʻai,” ma ia faaumatia ai i latou. (Nu. 11:​31-34) O la latou faaaʻoaʻoga, ua lapataʻia ai i tatou ina ia faaeteete i le lolo atu i le manaʻo tele. E tusa pe e tatou te tamaoaiga pe e matitiva, ae e tatau ona tatou faamuamua le saʻilia o “ʻoa i le lagi,” e ala lea i le atiaʻe o se faiā vavalalata ma Ieova ma Iesu. (Mata. 6:​19, 20; Luka 16:9) Pe a tatou faia faapea, e mautinoa o le a saunia e Ieova mea e tatou te manaʻomia.

9. O le ā e tatou te mautinoa i ai, e tusa ai o le tausiga a Ieova?

⁹ I aso nei, o loo faaloaloa mai e Ieova lona aao ma fesoasoani i ona tagata. E ui i lea, e lē faapea ai o le a lē taitai tatou tofo i faigatā, e pei o le fia aai ma le faaleagaina po o le aveesea o meafaitino.b Ae o le mea mautinoa, e lē taitai tuulafoaʻia e Ieova i tatou. O le a ia foaʻi mai le malosi e tumau ai i faigatā eseese e tatou te fesagaʻia. E iloa le moni o lenā manatu, e ala i le iloiloina o ni tulaga se lua e faaalia ai lo tatou faatuatua, o le a faaloaloa mai le aao o Ieova ma saunia mea e tatou te manaʻomia: (1) pe a feagai ma faafitauli tautupe ma le (2) pe a mafaufau i mea e tausia ai i tatou i le lumanaʻi.

PE A FEAGAI MA FAAFITAULI TAUTUPE

10. O ā faafitauli tautupe e tatou te ono fesagaʻia?

¹⁰ A o faaloloʻi mai le iʻuga o lenei faiga o mea, e tatou te faatalitalia o le a faasolo ina leaga le tulaga tau tamaoaiga. O fevesiaʻiga faapolotiki, o taua, mala faalenatura po o faamaʻi fou, e ono iʻu atu ai i faafitauli tau tamaoaiga e leʻi faatalitalia, po o le lē toe iai foʻi o ni a tatou galuega, o meafaitino po o o tatou fale. Atonu e iʻu ina manaʻomia ona toe suʻe se isi a tatou galuega, pe mafaufau foʻi e siitia atu o tatou aiga i se isi vaipanoa ina ia mafai ona tausia ai. O le ā e fesoasoani iā i tatou ina ia faia filifiliga e faaalia ai o loo tatou maufaatuatuaina le aao o Ieova?

11. O le ā e fesoasoani iā te oe e fesagaʻia ai faafitauli tautupe? (Luka 12:​29-31)

¹¹ O le fesoasoani e sili ona tāua, o le sasaa atu lea o ou popolega iā Ieova. (Faata. 16:3) Ia talosaga iā Ieova mo le atamai e faia ai filifiliga lelei, ma se lototoʻafilemu e ʻalofia ai le “soona popole” i se tulaga faigatā e tulaʻi mai. (Faitau le Luka 12:​29-31.) Ia faatoga atu iā te ia e fesoasoani mai e atiaʻe le lotomalie i mea e manaʻomia moni o le olaga. (1 Timo. 6:​7, 8) Ia fai ni au saʻiliʻiliga i a tatou lomiga, i ni manatu e mafai ona fesoasoani pe a tulaʻi mai ni faafitauli tautupe. E toʻatele i latou ua maua aogā mai i mataupu o loo i le jw.org, e faatatau i auala e taulima ai faafitauli tautupe.

12. O ā fesili e fesoasoani i se Kerisiano e faia ai se filifiliga lelei mo lona aiga?

¹² O nisi ua taliaina galuega lea e manaʻomia ai ona ō ese mai i o latou aiga, ae e toʻatele ua iloa ane le lē atamai o lenā filifiliga. A o e leʻi taliaina se galuega fou, aua e te vaai na o le totogi, ae vaai foʻi pe e iai se aafiaga i lou itu faaleagaga. (Luka 14:28) Ia fesili ifo: ʻFaamata o le ā se aafiaga i laʻu faaipoipoga pe afai e umi ona ou alu ese? O le ā se aafiaga i laʻu galuega talaʻi, o sauniga, ma taimi e faatasitasi ai ma uso ma tuafāfine?’ Pe afai e iai sau fanau, e manaʻomia ona e fesili ifo i le fesili tāua lenei: ʻE faapefea ona ou tausia laʻu fanau “i aʻoaʻiga ma apoapoaʻiga a Ieova,” pe afai ou te lē o faatasi ma i latou?’ (Efe. 6:4) Ia taʻitaʻiina oe i manatu o Ieova, ae e lē o manatu o uō ma tauaiga o ē e lē amanaʻia mataupu silisili o le Tusi Paia.c Na maua e Tony o lē e nofo i Asia i sisifo le tele o avanoa e faigaluega ai i isi atunuu. Peitaʻi, ina ua uma ona tatalo e faatatau i le mataupu ma talanoa ma lana avā, na ia filifili ai e teena na avanoa ae saʻili isi auala e mafai ona faafaigofie ai olaga o lo latou aiga. Pe a toe tepa i tua, ua faapea mai Tony: “Na ou maua le faaeaga e fesoasoani ai i isi ina ia iloa Ieova, ma ua fiafia ai foʻi laʻu fanau i le upu moni. Ua aʻoaʻoina e lo matou aiga, pe afai e matou te faatatauina le Mataio 6:​33, e mautinoa o le a tausia o matou manaʻoga e Ieova.”

PE A MAFAUFAU I MEA E TAUSIA AI I TATOU I LE LUMANAʻI

13. O ā gaoioiga e tatou te faia i le taimi lenei, ina ia mafai ai ona tausia i tatou pe a matutua?

¹³ E ono tofotofoina foʻi lo tatou maufaatuatuaina o le aao o Ieova, pe a mafaufau i mea e ono tutupu iā i tatou pe a matutua. O loo faalaeiauina i tatou i le Tusi Paia ina ia galulue mamafa, ina ia maua ai mea e manaʻomia e tausia ai i tatou i le lumanaʻi. (Faata. 6:​6-11) Pe afai e mafai, o se mea lelei le tuu ese o sina tupe e faaagaga mo le lumanaʻi. E mafai e tupe ona saunia sina puipuiga. (Fai. 7:12) Peitaʻi, e lē tatau ona avea le saʻilia o meafaitino ma mea e sili ona tāua i o tatou olaga.

14. E faapefea ona fesoasoani mai le Eperu 13:5 ina ia tatou lē soona popole ai i le lumanaʻi?

¹⁴ Na faataʻitaʻi mai e Iesu le valea o le faaputu o tupe po o ʻoa faaletino, ae e lē “mauʻoa i le silafaga a le Atua.” (Luka 12:​16-21) E leai se isi e iloa le mea e tupu a taeao. (Faata. 23:​4, 5; Iako. 4:​13-15) I le avea ai ma soo o Keriso, o loo tatou fesagaʻia foʻi se luʻi i aso nei. Na fetalai Iesu, e ao ona tatou nofosauni e ʻtuua mea uma’ ina ia avea ai ma ona soo. (Luka 14:33) O le mea lenā na faia e uluaʻi Kerisiano i Iutaia, ae e leʻi aveesea ai lo latou olioli. (Epe. 10:34) I aso nei, e toʻatele uso ua latou faataulaga a latou meafaitino po o a latou galuega, ona o le lē mananaʻo e lagolagoina faiga faapolotiki. (Faaa. 13:​16, 17) O le ā na fesoasoani iā i latou e faia ai faapea? Na latou mautinoa atoatoa i le folafolaga a Ieova: “Ou te lē tuua lava oe, ma ou te lē tuulafoaʻia lava oe.” (Faitau le Eperu 13:5.) E tatou te faia le mea sili ina ia faia ai fuafuaga mo mea e tatou te manaʻomia i le lumanaʻi. Ae pe afai e tulaʻi mai ni tulaga e lē faatalitalia, e tatou te maufaatuatuaina atoatoa le fesoasoani a Ieova.

15. O le ā le manatu e tatau ona iai i mātua Kerisiano e faatatau i a latou fanau? (Tagaʻi foʻi i le ata.)

¹⁵ I nisi o aganuu, o le māfuaaga autū e faia ai se fanau a se ulugalii, ina ia matutua aʻe tamaiti, faigaluega ma maua tupe e tausia ai mātua. O loo taʻua i le Tusi Paia, e ao i mātua ona tausia manaʻoga o a latou fanau. (2 Kori. 12:14) O le mea moni, e ono manaʻomia e mātua se fesoasoani a o faasolo ina matutua, ma o le toʻatele o fanau e fiafia e saunia mea e manaʻomia e o latou mātua. (1 Timo. 5:4) Ae e iloa e mātua, o lo latou fiafiaga sili e maua mai i le fesoasoani i a latou fanau ina ia avea ma auauna a Ieova, ae e lē o le tausia o fanau ma le manatu e maua mai ai ni tupe.—3 Ioa. 4. 

16. E faapefea ona sauniunia e mātua a latou fanau ina ia iloa le auala e tausia ai i latou lava? (Efeso 4:28)

¹⁶ Ia faaalia atu i lau faaaʻoaʻoga e te maufaatuatuaina Ieova, a o e fesoasoani i lau fanau ia iloa le auala e tausia ai i latou lava pe a oo ina matutua. A o lāiti lau fanau, ia aʻoaʻo i latou i le tāua o le galue mamafa. (Faata. 29:21; faitau le Efeso 4:28.) A o latou tuputupu aʻe, ia fesoasoani i ai ina ia latou faia le mea sili i le aʻoga. E ao i mātua ona faia ni a latou saʻiliʻiliga i mataupu silisili o le Tusi Paia, ona fesoasoani lea i fanau e faia ni filifiliga atamai e tusa ai o aʻoaʻoga. O le sini o mātua o le fesoasoani i fanau e faaaogā lelei aʻoaʻoga ua latou maua. O le iʻuga, o le a mafai ai e le fanau ona tausia i latou lava, ma faia se sao atoatoa i le faiva.

17. O le ā ua tatou mautinoa i ai?

¹⁷ O ē e faamaoni iā Ieova, e latou te mautinoa o loo iā te ia le faanaunauga ma le mana e tausia ai o latou manaʻoga faaletino. A o tatou lata atu i le iʻuga o lenei faiga o mea, e tatou te faatalitalia o le a tofotofoina lo tatou maufaatuatuaina o Ieova. Ae po o le ā lava e tupu, seʻi o tatou maumauaʻi e maufaatuatuaina Ieova o le a ia faaaogā lona mana e tausia ai i tatou faaletino. E tatou te mautinoa, e lē taitai ona puupuu le aao malosi o Ieova ma lona aao faaloaloa, e tusa lava po o fea e tatou te iai.