O le “Faalatalata Atu i le Atua” e Lelei mo i Tatou!

1-2. (a) E faapefea ona māfana la tatou faauōga ma se tasi? (e) O le ā o le a tatou iloiloina i lenei suʻesuʻega?

PE E iai sau uō e te māfana i ai? Na faapefea ona māfana la oulua faauōga? Atonu na e faaalu le tele o le taimi e lua te faifaimea faatasi ai, iloa luʻi o loo ia fesagaʻia, faapea mea e fiafia ma mea e lē fiafia i ai. Na oo foʻi ina e malamalama i ona uiga lelei lea e te manaʻo e faaaʻoaʻo i ai. O le iʻuga, ua e alofa i lau uō.

² E tele le taimi ma taumafaiga e aofia ai i le atiaʻe o se faauōga māfana ma se tasi. E tele foʻi le taimi ma taumafaiga ina ia atiaʻe ai se faiā māfana ma vavalalata ma Ieova le Atua. O le a talanoaina i lenei suʻesuʻega auala e tatou te faalatalata atili atu ai iā Ieova, ma faamanuiaga e maua mai ai. Ae seʻi o tatou iloilo muamua māfuaaga e lelei ai ona faalatalata atu i la tatou Uō sili o Ieova.

3. Aiseā e ao ai ona tatou manatunatu i aogā o le faalatalata iā Ieova? Ia faataʻitaʻi.

³ E mautinoa e te ioe i le manatu, o se mea lelei lou faalatalata iā Ieova. Ae o le manatunatu loloto i le tele o aogā e maua mai le faalatalata iā Ieova, e uunaʻia ai i tatou ia faaauau ona faia faapea. (Sala. 63:​6-8) O se faataʻitaʻiga, e tatou te iloa e lelei mo i tatou le aai i meaʻai paleni, faamalositino, ia lava le mālōlōga ma inu le tele o le vai. E ui i lea, e lē ano le toʻatele o tagata i nei mea, ma lē tausia ai lo latou soifua mālōlōina. Peitaʻi, o le tele e tatou te mafaufau ai i aogā o le tausia o le soifua mālōlōina, o le tele foʻi lenā e tatou te mananaʻo ai e tausia pea lo tatou soifua mālōlōina. I se tulaga talitutusa, e tatou te iloa le lelei o le faalatalata atu iā Ieova, ae o le manatunatu i aogā o le faia faapea, o le a uunaʻia ai i tatou e faalatalata atili atu i la tatou Uō.—Sala. 119:​27-30.

4. O ā faalogona o le faisalamo o loo taʻua i le Salamo 73:28?

⁴ Faitau le Salamo 73:28. O lē na tusia le Salamo 73 o se tagata sa Levī, na tofia e auauna o se fai musika i le malumalu o Ieova. E foliga mai e tele tausaga na auauna faamaoni ai o ia iā Ieova. E ui i lea, na manaʻomia pea ona ia manatua, o le “faalatalata atu i le Atua” e lelei mo ia faapea ma isi. O ā nisi o faamanuiaga o le faia faapea?

O LE “FAALATALATA ATU I LE ATUA” E MAUA AI LE FIAFIA

5. (a) E faapefea ona avea le faalatalata atu iā Ieova ma māfuaaga e tatou te maua ai le fiafia? (e) E tusa ai ma le Faataoto 2:​6-16, aumai ni faataʻitaʻiga patino o auala e aogā ai fautuaga atamai a Ieova ma auala e puipuia ai i tatou.

⁵ O le tele e tatou te faalatalata atu ai iā Ieova, o le tele foʻi lenā o lo tatou fiafia. (Sala. 65:4) E tele māfuaaga e tatou te fiafia ai. O se tasi o māfuaaga, e matuā aogā iā i tatou le faatatauina o fautuaga atamai o loo i lana Afioga, le Tusi Paia. O na fautuaga atamai e puipuia ai i tatou mai i taaʻiga leaga, ma le faia o se agasala matuiā. (Faitau le Faataoto 2:​6-16.) Ua talafeagai ai le manatu o loo i le Tusi Paia: “E fiafia le tagata ua maua le atamai ma le tagata ua iai le faautaga loloto.”—Faata. 3:13.

6. Aiseā na mou atu ai le olioli o le faisalamo?

⁶ O le mea moni, e iai foʻi taimi e faanoanoa ai uō a Ieova. Na mou atu le olioli o lē na tusia le Salamo 73, ina ua aafia o ia i mafaufauga sesē. Na lē fiafia ma matauʻa o ia ona na manatu o loo toʻafilemu olaga o tagata amioleaga, o ē e lē amanaʻia le Atua ma ana tapulaa. Na sesē lona manatu e faapea, na sili atu le tamaoaiga ma le soifua mālōlōina o tagata sauā ma faamaualuluga, ma e lē aafia foʻi i latou i mafatiaga. (Sala. 73:​3-7, 12) O le mafatia tele o le faisalamo na taumānatu ai po o aogā ana taumafaiga e auauna iā Ieova. Na ia faapea mai ma le faanoanoa: “E moni lava, e leai se aogā ua ou faamamā ai loʻu loto ma fufulu oʻu lima e faailoa atu ai ou te mamā.”—Sala. 73:13.

7. Pe a tatou feagai ma faalogona faanoanoa, o ā gaoioiga e mafai ona tatou faia ina ia toe maua ai le fiafia? (Tagaʻi foʻi i le ata)

⁷ E leʻi faatagaina e le faisalamo ona faalogona faanoanoa e faavaivaia ai o ia. Na ia faia se gaoioiga e ala i le “ulufale i le afioaga paia o le Atua,” lea na faasaʻo ai e Ieova ona mafaufauga. (Sala. 73:​17-19) E silafia lelei e la tatou Uō sili o Ieova o tatou faalogona faanoanoa. Pe a tatou tatalo mo lana taʻitaʻiga ma talia le fesoasoani e ala mai i lana Afioga ma le faapotopotoga, o le a tatou maua la le malosi e onosaia ai faalogona faanoanoa. E tusa foʻi pe e lofitūina i tatou i popolega, o le a faamāfanafana ma faatoʻafilemu i tatou e Ieova.—Sala. 94:19.a

O LE “FAALATALATA ATU I LE ATUA” E MAUA AI SE FUAFUAGA O LE OLAGA MA SE FAAMOEMOE

8. O ā nisi o māfuaaga tāua e lelei ai mo i tatou le faalatalata atu i le Atua?

⁸ E lua isi māfuaaga tāua e lelei ai mo i tatou le faalatalata atu i le Atua. Muamua, e tatou te maua ai se fuafuaga o le olaga. Lua, e tatou te maua ai se faamoemoe mausalī mo le lumanaʻi. (Iere. 29:11) Seʻi o tatou iloiloina nei faamanuiaga e lua.

9. Aiseā e tatou te maua ai le fiafia pe a faalatalata iā Ieova?

⁹ O le faalatalata atu iā Ieova e tatou te maua ai se fuafuaga o le olaga. I aso nei, o le toʻatele o ē e talitonu e leai se Atua, e latou te manatu e leai se fuafuaga o le olaga ma o le a iʻu ina mou atu tagata mai i le lalolagi. Peitaʻi, o le suʻesuʻeina o le Afioga a le Atua ua tatou mautinoa ai “o loo soifua o ia, ma e na te tauia o ē e matuā saʻili iā te ia.” (Epe. 11:6) Na foafoaina i tatou e Ieova ina ia tatou auauna atu iā te ia. O lo tatou faia faapea, e maua ai le fiafia.—Teu. 10:​12, 13.

10. O le ā ua faailoa mai i le Salamo 37:29 e faatatau i le lumanaʻi o i latou e faamoemoe iā Ieova?

¹⁰ O le toʻatele o tagata e pau le mea e faamoemoe i ai o le faigaluega, tausi se aiga, ma faaputu a latou tupe mo le taimi e litaea ai. Peitaʻi e latou te lē faamoemoe i le Atua. Ae e ese mai ai auauna a Ieova, auā e latou te faamoemoe iā te Ia. (Sala. 25:​3-5; 1 Timo. 6:17) E tatou te faatuatua i le Atua o lē ua tatou faalatalata i ai, ma e tatou te maufaatuatuaina ana folafolaga mo i tatou. O lo tatou faamoemoe i le lumanaʻi, e aofia ai le tapuaʻi iā te ia e faavavau i le lalolagi Parataiso.—Faitau le Salamo 37:29.

11. O ā aogā o le faalatalata atu i le Atua, ma o le ā se aafiaga iā te ia?

¹¹ E tele foʻi isi māfuaaga e lelei ai mo i tatou le faalatalata atu i le Atua. O se faataʻitaʻiga, ua folafola mai e Ieova e na te faamagaloina agasala a ē e salamō e vavalalata atu iā te ia. (Isa. 1:18) O le iʻuga, e lē faaauau ona ōia o tatou lotofuatiaifo ona o agasala na tatou faia i le taimi ua teʻa. (Sala. 32:​1-5) Ua tatou maua foʻi le faaeaga e faafiafiaina ai le finagalo o Ieova. (Faata. 23:15) E mautinoa e mafai ona e mafaufau i isi faamanuiaga o le mafuta vavalalata atu i le Atua. Ae e faapefea ona faaauau ona e faalatalata atu i le Atua?

AUALA E FAAAUAU AI ONA “FAALATALATA ATU I LE ATUA”

12. O le ā ua e faia ina ia faalatalata atili atu ai i le Atua?

¹² Pe afai o oe o se Kerisiano ua papatiso, o lenā ua iai la oulua faiā vavalalata ma Ieova. Ua uma ona e aʻoaʻoina le tele o upu moni e faatatau iā Ieova le Atua ma Keriso Iesu, salamō mai i au agasala i le taimi ua teʻa, atiaʻe se faatuatua malosi i le Atua, ma gaoioi e tusa ai ma lona finagalo. E ui i lea, ina ia faalatalata atili atu i le Atua, e tatau ona faaauau ona tatou faia nei mea.—Kolo. 2:6.

13. O ā vala e tolu e fesoasoani iā i tatou ina ia faalatalata atu ai pea iā Ieova?

¹³ O le ā e fesoasoani iā i tatou ina ia faalatalata atu ai pea iā Ieova? (1) Ia faaauau ona tatou faitau ma suʻesuʻe i le Tusi Paia. O lo tatou sini e lē tau ina ia aʻoaʻoina upu moni faavae e faatatau i le Atua. Nai lo o lea, ia taumafai e iloa po o le ā le finagalo o le Atua mo i tatou, ma gaoioi e ōgatusa ma mataupu silisili o loo i lana Afioga. (Efe. 5:​15-17) (2) Ia faamalosia lo tatou faatuatua e ala i le manatunatu loloto i le tele o faamaoniga o lona alofa iā i tatou. (3) Ia faaauau ona ʻinoʻino i mea e inosia e Ieova, ma ʻalofia le faauō iā i latou e faia na mea.—Sala. 1:1; 101:3.

14. E tusa ai o le 1 Korinito 10:​31, o ā nisi o mea e tatou te faia i aso faisoo e faafiafia ai Ieova? (Tagaʻi foʻi i ata.)

¹⁴ Faitau le 1 Korinito 10:31. E tāua ona tatou matuā naunau e faia mea e faafiafia ai Ieova. E lē lava le auai i le galuega talaʻi ma sauniga a le faapotopotoga. O amioga lelei e faafiafia ai Ieova, e aofia ai foʻi mea e tatou te faia i aso faisoo. O se faaaʻoaʻoga, pe a tatou faamaoni i mea uma ma faaalia le limafoaʻi, e tatou te faafiafiaina ai Ieova. (2 Kori. 8:21; 9:7) E finagalo foʻi o ia ina ia tatou matuā faatāua le meaalofa o le ola. E tatou te faalatalata atili atu i Lē na foaʻi mai le ola, e ala i le pulea lelei o a tatou meaʻai ma meainu, ma tausia lelei o tatou soifua mālōlōina. O a tatou taumafaiga uma e faafiafia ai Ieova e oo lava i mea lāiti, o le a atili ai ona alofa Ieova iā i tatou.—Luka 16:10.

15. O le ā le auala e faatalitalia i tatou e Ieova e feutagaʻi ai ma isi?

¹⁵ E agalelei Ieova i ē e amiotonu ma ē e amiolētonu. (Mata. 5:45) E na te faatalitalia foʻi i tatou e faaalia le agalelei i isi. O se faaaʻoaʻoga, ua faapea mai le Tito 3:2: “Aua neʻi faia ni tala leaga e uiga i se tasi, aua le faamisa, ae ia . . . matuā agamalu i tagata uma.” O lona uiga, e lē tatau ona tatou manatu faatauvaa i isi ona e faapea e lē tutusa o tatou talitonuga. (2 Timo. 2:​23-25) E tatou te faalatalata atili atu iā Ieova, e ala i le faaalia pea o le agalelei ma le magafagafa i tagata uma.

E MAFAI ONA “FAALATALATA ATU I LE ATUA” E UI INA TATOU FAIA SE MEA SESĒ

16. O ā faalogona o lē na tusia le Salamo 73 i se taimi mulimuli ane?

¹⁶ Ae e faapefea pe afai ua e lagona ua lē tatau iā te oe le alofa o Ieova? E pei ona tatou talanoaina, na faapena faalogona o lē na tusia le Salamo 73. Na ia faapea mai: “Na toetoe ina a liliuese oʻu vae; na toetoe foʻi ina a see oʻu vae.” (Sala. 73:2) Na ia taʻutino mai na “lotovaivai” ma e “leʻi mafaufau lelei,” ʻsa pei o ia o se manu e leai se mafaufau i luma’ o Ieova. (Sala. 73:​21, 22) Pe na manatu o ia ua leai sona aogā ma ua lē tatau iā te ia le alofa o Ieova, ona na iā te ia se vaaiga sesē?

17. (a) O le ā e foliga mai na faia e le faisalamo ina ua matuā aafia i le lotovaivai? (e) O le ā le lesona e tatou te aʻoaʻoina mai i le mea na tupu iā te ia? (Tagaʻi foʻi i ata.)

¹⁷ Pe afai na manatu le faisalamo ua tuulafoaʻia o ia e Ieova, e mautinoa e leʻi umi ona aafia o ia i na faalogona. E foliga mai i le taimi na matuā lotovaivai ai, na ia iloa ai na manaʻomia ona ia faalatalata atu pea i le Atua, e pei ona faaalia i ana upu nei: “A o lenei ua ou faatasi pea ma oe [Ieova]; ua e taofia loʻu lima taumatau. Ua e taʻitaʻia aʻu i lau fautuaga, mulimuli ane, e te taʻitaʻia atu aʻu i le mamalu.” (Sala. 73:​23, 24) E ao foʻi ona tatou vaai atu iā Ieova o lo tatou Papa e foaʻi maia le malosi, pe a tatou lagona le lotovaivai. (Sala. 73:26; 94:18) E tusa po ua tatou faia se agasala matuiā, ae e mafai ona tatou toe foʻi atu iā Ieova ma le mautinoa “e nofosauni [o ia] e faamagalo.” (Sala. 86:5) E tāua tele ona tatou faalatalata atili atu i le Atua, aemaise pe a lofitūina i tatou i le lotovaivai.—Sala. 103:​13, 14.

“FAALATALATA ATU I LE ATUA” SEʻIA OO I LE FAAVAVAU

18. Aiseā e faapea atu ai e leai se mea e gata mai ai lo tatou faalatalata atu iā Ieova?

¹⁸ E leai se mea e gata mai ai lo tatou faalatalata atu iā Ieova, ma le tele o mea e tatou te aʻoaʻoina e faatatau iā te ia. Ua faapea mai le Tusi Paia, “e lē mafai ona malamalama atoatoa” se tasi i le silafaga a Ieova, o ona ala, ma lona atamai.—Roma 11:33.

19. O le ā le faamautinoaga e tatou te maua mai i le Salamo?

¹⁹ Ua faapea mai le Salamo 79:13: “O i matou o lou nuu ma le lafu mamoe na e fafagaina, e matou te faafetai atu iā te oe e faavavau; e matou te faalauiloa atu foʻi ou viiga i lea tupulaga ma lea tupulaga.” A o faaauau ona e faalatalata atu i le Atua, e mautinoa o le a e maua foʻi faamanuiaga e faavavau, ma e mafai foʻi ona e faapea atu: “O le Atua o le papa o loʻu loto ma loʻu tofi e faavavau.”—Sala. 73:26.