E Lē o Tuua na o i Tatou

1-2. (a) Aiseā e mafai ai ona faapea atu e lē o tuua na o i tatou pe a feagai ma luʻi? (e) O le ā o le a tatou talanoaina i lenei suʻesuʻega?

PE A tatou feagai ma luʻi faigatā, e tatou te ono lagona e pei ua tuua na o i tatou i se tamaʻi vaa i le sami sousou. Peitaʻi, e lē o tuua na o i tatou e feagai ma na luʻi. E lē gata e silafia e lo tatou Tamā alofa i le lagi o tatou faafitauli, ae ua ia folafola mai foʻi o le a ia fesoasoani mai. O le faamautinoaga alofa lenei a Ieova i ana auauna faamaoni: “Ou te matuā fesoasoani iā te oe.”—Isa. 41:10.

² O le a talanoaina i lenei suʻesuʻega le auala e fesoasoani ai Ieova e (1) taʻitaʻiina i tatou, (2) tausia i tatou, (3) puipuia i tatou, ma le (4) faamāfanafanaina i tatou. Ua faamautinoa mai e Ieova, po o ā lava luʻi e tatou te fesagaʻia ae e lē taitai galo i tatou iā te ia. E na te lē tuulafoaʻia i tatou, ma e lē o tuua na o i tatou.

E TAʻITAʻIINA I TATOU E IEOVA

3-4. Ua faapefea ona taʻitaʻiina i tatou e Ieova? (Salamo 48:14)

³ Faitau le Salamo 48:14. E lē faatalitalia e Ieova i tatou e taʻitaʻiina i tatou lava. E faapefea ona ia taʻitaʻiina ana auauna faamaoni i aso nei? O se tasi o auala e ala mai i le Tusi Paia. (Sala. 119:105) I lana Afioga tusia, ua fesoasoani mai ai Ieova iā i tatou e faia ni filifiliga lelei, ma atiaʻe uiga ina ia maua ai le fiafia moni i le taimi lenei ma le ola e faavavau i le lumanaʻi.a O se faaaʻoaʻoga, ua ia aʻoaʻoina i tatou ina ia aua neʻi teulotoina le ita, ia faamaoni i mea uma, ma ia matuā alofa i isi mai i le loto. (Sala. 37:8; Epe. 13:18; 1 Pete. 1:22) Pe a tatou faaaʻoaʻo i uiga nei o le Atua, o le a tatou taulau ai o ni mātua, paaga faaipoipo, ma ni uō lelei.

⁴ E lē gata i lea, na faaaofia e Ieova i lana Afioga tala o mea moni na tutupu i tagata na feagai ma faafitauli, o ē na iai faalogona e pei foʻi o i tatou. (1 Kori. 10:13; Iako. 5:17) Pe a tatou faitau i nei tala ma faatatau lesona e aʻoaʻoina mai ai, e tatou te maua ai ni aogā se lua. Muamua, e tatou te iloa ai e lē na o i tatou o loo feagai ma nei faafitauli. E iai foʻi isi na feagai ma na faafitauli, ma o loo latou tutumau ma le faamaoni. (1 Pete. 5:9) Lua, e tatou te iloa ai auala e taulima ai o tatou faafitauli.—Roma 15:4.

5. O ai ua faaaogā e Ieova e taʻitaʻiina i tatou i le ala i le ola?

⁵ Ua saunia mai foʻi e Ieova o tatou uso ma tuafāfine e taʻitaʻiina i tatou.b O se faataʻitaʻiga, e masani ona asiasi mai ovasia o matagaluega i faapotopotoga ina ia faalaeiau i tatou. O a latou lauga e faamalosia ai lo tatou faatuatua, ma faatumauina ai lo tatou autasi. (Galu. 15:40–16:5) E manatu mamafa toeaina o faapotopotoga i tagata talaʻi taʻitoʻatasi. (1 Pete. 5:​2, 3) E aʻoaʻo e mātua a latou fanau i le itu faaleagaga, ma fesoasoani iā i latou e atiaʻe le mafaufau lelei ma masaniga lelei. (Faata. 22:6) E fesoasoani foʻi tuafāfine Kerisiano taʻumatuaina i tuafāfine talavou e ala i a latou faaaʻoaʻoga lelei, o fautuaga atamai, ma faalaeiauga.—Tito 2:​3-5.

6. O le ā e tatau ona tatou faia ina ia maua ai aogā mai i le taʻitaʻiga a Ieova?

⁶ Ua faia e Ieova lana vaega e ala i le saunia o le taʻitaʻiga e tatou te manaʻomia. E faapefea ona faailoa atu e tatou te talisapaia mea ua ia faia mo i tatou? Ua faapea mai le Faataoto 3:​5, 6: “Ia e faatuatua iā Ieova ma lou lotoatoa, ae aua le faalagolago i lou lava malamalama.” Pe a tatou faia faapea, ona ia “faasaʻoina lea o [o tatou] ala,” o lona uiga e fesoasoani mai ia tatou ʻalofia le tele o faafitauli ma maua se olaga fiafia. Maʻeu lo tatou lotofaafetai, ona ua saunia mai e Ieova fautuaga alofa e talafeagai lelei mo i tatou taʻitoʻatasi!—Sala. 32:8.

E TAUSIA I TATOU E IEOVA

7. O ā nisi o auala e tausia ai i tatou e Ieova? (Filipi 4:19)

⁷ Faitau le Filipi 4:19. E lē gata e taʻitaʻiina i tatou e Ieova i le itu faaleagaga, ae e na te faamanuia foʻi a tatou taumafaiga ina ia maua meaʻai, lavalava, ma fale e nonofo ai. (Mata. 6:33; 2 Tesa. 3:12) E ui o se faalogona masani le popole i o tatou manaʻoga faaletino, ae ua faalaeiauina i tatou e Ieova e aua le soona popole i na mea. (Mata. 6:25) Aiseā? Talu ai e lē taitai tuulafoaʻiina e lo tatou Tamā ana auauna faamaoni pe a latou manaʻomia se fesoasoani. (Mata. 6:8; Epe. 13:5) E mafai ona tatou maufaatuatuaina lana folafolaga e na te tausia o tatou manaʻoga.

8. O le ā na faia e Ieova mo Tavita?

⁸ Seʻi mātau le auala na fesoasoani ai Ieova iā Tavita. I le taimi faigatā na fesolasolataʻi ai Tavita mai iā Saulo, na saunia e Ieova mea na manaʻomia e Tavita ma ona tagata ina ia latou ola ai. A o manatunatu Tavita i le tausiga a Ieova iā te ia mo le tele o tausaga, na ia tusi e faapea: “Sa ou talavou a o lenei ua ou toeaina, ae ou te leʻi iloa lava se tagata amiotonu ua tuulafoaʻiina, po o ana fanau o ʻaisi mo ni meaʻai.” (Sala. 37:25) E lē taumatea a o faagasolo tausaga, ua e vaaia foʻi le tausiga alofa a Ieova i ana auauna faamaoni.

9. E faapefea ona tausia e Ieova ona tagata i aso nei i taimi o mala? (Tagaʻi foʻi i ata.)

⁹ E tausia foʻi e Ieova ona tagata i taimi o mala. O se faaaʻoaʻoga, ina ua tupu se oge i le uluaʻi senituri, na auina atu e Kerisiano mai i atunuu eseese ni meaalofa mo o latou uso ma tuafāfine na manaʻomia le fesoasoani. (Galu. 11:​27-30; Roma 15:​25, 26) O loo faaalia foʻi e tagata o le Atua i aso nei lenā lava uiga o le limafoaʻi. Pe a tupu se mala, e uunaʻia e Ieova ona tagata e saunia mea e manaʻomia e pei o meaʻai, vai, lavalava, o fualaau ma vailaau faafomaʻi mo i latou ua aafia. E toe faaleleia e le ʻaufaufale ni fale ma Maota mo Sauniga ua faaleagaina. E vave ona saunia e auauna a Ieova le fesoasoani i le itu tau faalogona ma le itu faaleagaga, mo ē ua matuā aafia i na mala.c

10-11. O le ā e te aʻoaʻoina mai i le mea na tupu iā Borys?

¹⁰ E faaalia foʻi e Ieova le limafoaʻi i ē e lē o auauna iā te ia. I se tulaga talitutusa, e tatou te saʻilia avanoa e faaalia ai le agalelei iā i latou e tatou te lē aiga i le faatuatua. (Kala. 6:10) E masani ona iʻu atu ai i se molimau lelei. Seʻi mātau le mea na tupu iā Borys, o se pule aʻoga e nofo i Ukraine. E lē o ia o se Molimau a Ieova, ae e masani ona ia faaalia le agalelei i tamaiti Molimau, ma faaaloalo i o latou talitonuga. Na fesoasoani o tatou uso iā Borys, ina ua ia filifili e sola ese mai i lona nuu lea o loo aafia i taua ae alu atu i se vaega saogalemu o le atunuu. Mulimuli ane, na auai Borys i le Faamanatuga o le maliu o Keriso. A o mafaufau o ia i le agalelei o uso, na ia faapea mai: “Na tausia lelei aʻu e Molimau a Ieova. Ou te lotofaafetai iā i latou.”

¹¹ E mafai foʻi ona tatou faaaʻoaʻo i lo tatou Tamā alofa mutimutivale i le lagi, e ala i le faaalia o le alofa iā i latou o loo manaʻomia le fesoasoani, e tusa pe e tutusa o tatou talitonuga pe e leai. (Luka 6:​31, 36) E tatou te faamoemoe o a tatou taumafaiga e faaalia le alofa i tagata, o le a iʻu atu ai ina avea i latou ma soo o Keriso. (1 Pete. 2:12) Po o le ā lava le iʻuga, ae e sili atu lo tatou fiafia e maua ona o le foaʻi atu.—Galu. 20:35.

E PUIPUIA I TATOU E IEOVA

12. O le ā le puipuiga ua folafola mai e Ieova e na te saunia mo ona tagata? (Salamo 91:​1, 2, 14)

¹² Faitau le Salamo 91:​1, 2, 14. Ua folafola mai e Ieova e na te saunia le puipuiga faaleagaga mo i tatou i aso nei. E na te lē faatagaina Satani e faaleagaina le tapuaʻiga moni. (Ioa. 17:15) Pe a gapā “le puapuaga tele,” e tatou te matuā mautinoa o le a faataunuu e Ieova lana folafolaga e puipuia ona tagata i le itu faaleagaga ma le itu faaletino.—Faaa. 7:​9, 14.

13. Ua faapefea ona saunia mai e Ieova le puipuiga mo i tatou taʻitoʻatasi?

¹³ O le ā le puipuiga ua saunia e Ieova mo i tatou taʻitoʻatasi? E ala i le Tusi Paia, ua fesoasoani mai Ieova iā i tatou ina ia iloa le mea saʻo mai i le mea sesē. (Epe. 5:14) Pe a tatou ola e tusa ai ma mataupu silisili o le Afioga a le Atua, o le a puipuia ai i tatou mai i lamatiaga faaleagaga ma le faaletino. (Sala. 91:4) Ua saunia foʻi e Ieova le puipuiga e ala mai i le faapotopotoga. (Isa. 32:​1, 2) O le faifaimea faatasi ma i latou e alolofa iā Ieova ma ola e ōgatusa ma ana tapulaa, e tatou te maua ai faalaeiauga ma le fesoasoani e teena ai taaʻiga leaga.—Faata. 13:20.

14. (a) Aiseā e lē puipuia ai e le Atua i tatou mai i faafitauli uma? (e) O le ā ua faamautinoa mai i le Salamo 9:10? (Tagaʻi foʻi i le faamatalaga pito i lalo.)

¹⁴ I aso anamua, na iai taimi na puipuia ai e Ieova ona tagata tapuaʻi mai i lamatiaga i le itu faaletino. Peitaʻi, e lē o taimi uma na ia faia ai faapea. O isi taimi e tatou te aafia ai i faalavelave “e tutupu faafuaseʻi.” (Fai. 9:11) A o faagasolo foʻi tausaga, na faataga e Ieova le sauāina o ana auauna ma le fasiotia o nisi o i latou, ina ia faamaonia ai le pepelo o Satani. (Iopu 2:​4-6; Mata. 23:34) E faapena foʻi i aso nei. E ui e lē aveesea e Ieova o tatou faafitauli, ae e tatou te mautinoa e na te lē tuulafoaʻiina i latou e alolofa iā te ia.d—Sala. 9:10.

E FAAMĀFANAFANAINA I TATOU E IEOVA

15. E faapefea ona faamāfanafanaina i tatou e ala i le tatalo, le Afioga a le Atua, ma sauniga? (2 Korinito 1:​3, 4)

¹⁵ Faitau le 2 Korinito 1:​3, 4. E iai taimi e oo ai iā i tatou faalogona faavauvau, popole, po o le mafatia. Atonu o loo e tauivi ma se tulaga faigatā i le taimi lenei, ma ua e lagona ai le tuua toʻatasi. Po o iai se tasi o malamalama i ou faalogona? Ioe, o Ieova. E lē gata e malamalama o ia i o tatou faalogona tigā, ae “e na te faamāfanafanaina i tatou i o tatou puapuaga uma.” E faapefea? Pe a tatou faatoga atu iā Ieova i le tatalo, e na te foaʻi mai ʻle filemu mai iā te ia, lea e silisili i mea uma lava e tatou te malamalama ai.’ (Fili. 4:​6, 7) E faamāfanafanaina foʻi i tatou pe a faitau i fetalaiga a Ieova mo i tatou o loo i le Tusi Paia. O loo iai i lenā ʻoa tautele ni faaupuga alofa, atamai, ma se faamoemoe e faamalosiau ai i tatou. E faamāfanafanaina foʻi i tatou i sauniga a le faapotopotoga, lea e tatou te maua ai ni faauōga māfana ma faalaeiauga mai i le Tusi Paia.

16. O le ā e te aʻoaʻoina mai i le mea na tupu iā Nathan ma Priscilla?

¹⁶ Ina ia faataʻitaʻi le auala e saunia ai e Ieova faamāfanafanaga ma faalaeiauga mai i lana Afioga, seʻi mātau le mea na tupu iā Nathan ma Priscilla o ē e nonofo i le Iunaite Setete. I nai tausaga ua mavae, na la filifili ai e siitia atu i le mea o loo tele ai le manaʻoga mo tagata talaʻi o le Malo. Na faapea mai Nathan, “Na ma mautinoa o le a faamanuia e Ieova a ma taumafaiga.” Peitaʻi, ina ua la taunuu i lo la tofiga fou, na la feagai ma faafitauli tau i le soifua mālōlōina ma faafitauli tautupe. Na iʻu ina toe foʻi lenei ulugalii, ae e leʻi faaleleia ai lo la tulaga tautupe. Na faapea mai Nathan, “Na ou taumānatu pe aiseā e leʻi faamanuia ai e le Atua i maʻua, e pei ona ou mafaufau ai. Na amata foʻi ona ou mafaufau pe na ou faia se mea sesē.” Ae a o faagasolo taimi, na la iloa ai e leʻi tuulafoaʻia i laʻua e le Atua i taimi na la manaʻomia ai le fesoasoani. Na taʻua atili e Nathan: “A o faagasolo na taimi faigatā, na pei le Tusi Paia o se uō atamai e saunia mai faalaeiauga ma le taʻitaʻiga. O le uaʻi atu i auala na fesoasoani ai Ieova iā i maʻua e onosaia tulaga faigatā nai lo o le uaʻi i faafitauli, na sauniunia ai i maʻua e fesagaʻia luʻi i le lumanaʻi.”

17. Na faapefea ona maua e le tuafafine o Helga ni faamāfanafanaga? (Tagaʻi foʻi i le ata.)

¹⁷ E saunia foʻi e uso ma tuafāfine ni faamāfanafanaga mo i tatou. E faapefea? Seʻi mātau le faaaʻoaʻoga a Helga e nofo i Hagakeri. Na feagai o ia ma luʻi eseese mo le tele o tausaga, lea na ia lagona ai le mafatia ma le leai o se aogā. Ae pe a toe tepa i tua, na ia iloa ai na faamāfanafanaina o ia e Ieova e ala i le faapotopotoga. Na ia tusi: “Na fesoasoani mai pea Ieova pe a silasila mai ua itiiti loʻu malosi o totoe ona o laʻu galuega totogi, o le tausia o laʻu tama e maʻi, ma isi faafitauli. I na tausaga e 30, na faataunuu e Ieova lana folafolaga e na te faamāfanafanaina aʻu i aso taʻitasi. Na ia faamalosia pea aʻu e ala i faaupuga agalelei ma alofa mai i isi, ma e latou te faapea mai e latou te talisapaia aʻu taumafaiga. Na masani ona ou maua ni feʻau tusitusia, o se card, po o se faamālō i taimi na ou matuā manaʻomia ai.”

18. E faapefea ona tatou faamāfanafana atu i isi?

¹⁸ O se faaeaga mo i tatou le faaaʻoaʻo i lo tatou Atua, e ala i le faamāfanafana atu i isi. E faapefea? E mafai ona tatou faalogologo atu ma le onosaʻi, talanoa atu ma le tigā alofa, ma fesoasoani iā i latou i ni auala aogā. (Faata. 3:27) E tatou te taumafai e faamāfanafana i ē uma ua mafatia, e aofia ai i latou e lē o auauna i le Atua. E tatou te asiasi atu i o tatou tuaoi pe a latou feagai ma faalogona faavauvau ma le popole, pe aafia foʻi i maʻi. Ia faalogologo atu iā i latou, ma faasoa atu ni mau faalaeiau mai i le Tusi Paia. Pe a tatou faaaʻoaʻo iā Ieova “le Atua o faamāfanafanaga uma,” e lē gata o le a tatou fesoasoani ai i o tatou uso talitonu ina ia onosaia tulaga faigatā, ae atonu o le a suia ai foʻi loto o ē e lē talitonu ina ia talia le tapuaʻiga mamā.—Mata. 5:16.

O LOO FAATASI PEA IEOVA MA I TATOU

19. O le ā o loo faia e Ieova mo i tatou, ma e faapefea ona tatou faaaʻoaʻo iā te ia?

¹⁹ E matuā manatu mamafa Ieova i ē uma e alolofa iā te ia. E na te lē tuulafoaʻia i tatou a o tatou tauivi ma se tulaga faigatā. E pei ona manatu mamafa se matua alofa i lana tama, e manatu mamafa foʻi Ieova i ona tagata tapuaʻi faamaoni. E na te taʻitaʻiina, tausia, puipuia, ma faamāfanafanaina i tatou. E tatou te faaaʻoaʻo i lo tatou Tamā alofa i le lagi, pe a tatou fesoasoani ma faalaeiau i isi i taimi faigatā. Po o ā lava luʻi e tatou te fesagaʻia po o mea e tigā ai o tatou loto, e mafai ona tatou mautinoa o loo faatasi mai pea Ieova. Na ia folafola mai: “Aua e te fefe, auā ou te faatasi ma oe.” (Isa. 41:10) Maʻeu se faamautinoaga mo i tatou! E lē o tuua na o i tatou.