Po ua E ʻAʻoaʻoina le Auala’ e Faaalia ai le Lotomalie?

1. O le ā e uiga i ai le lotomalie, ma o le ā e lē uiga atu i ai?

PE E te lotomalie i mea ua e maua? O se tagata e lotomalie, e na te maua pea le olioli ma le filemu o le mafaufau, e ala i le uaʻi atu tau lava o mea ua ia maua. E lē uaʻi atu i mea e na te lē o mauaina, lea e uma ane e lagona ai le lē fiafia. Peitaʻi, e lē faapea ai o le a faifaimālie ma lē ano ai i isi mea o le olaga. O se faataʻitaʻiga, e lē leaga lo tatou aapa atu i isi faaeaga ma faia le tele o mea i le auaunaga iā Ieova. (Roma 12:1; 1 Timo. 3:1) Ae pe a tatou lotomalilie, o le a lē mou atu lo tatou olioli pe a lē vave ona maua se faaeaga na tatou faanaunau i ai.

2. O le ā le lamatiaga pe afai e lē lotomalie se tasi i mea ua ia maua?

² O le lē lotomalie, e iʻu atu ai i lo tatou faia o ni filifiliga lē lelei. O se faataʻitaʻiga, o le lē lotomalie ua galulue ovataimi ai nisi ina ia maua isi mea o loo mananaʻo ai, ae e lē o ni mea e manaʻomia moni. O le mea e faanoanoa ai, ona ua iʻu ina lolo atu ai nisi Kerisiano i le gaoi. E latou te ono faia ni faamolemolega e faapea, ʻO le mea lea e tatau ona ou mauaina,’ pe ʻʻAua le popole e uma lava oʻu tago e toe totogi le tupe na ou aveina.’ Peitaʻi, e inosia e Ieova le gaoi. (Faata. 30:9) Ua lē toe auauna foʻi nisi iā Ieova, ona o le lē fiafia i le lē mauaina o se faaeaga na mananaʻo ai. (Kala. 6:9) E tatou te matuā lē talitonu e mafai e se uso po o se tuafafine ona faia na tulaga. Peitaʻi, e mafai ona tupu pe afai ua amata ona lē faamalieina se tasi i mea o loo ia maua.

3. O le ā e tatou te aʻoaʻoina mai i le Filipi 4:​11, 12?

³ E mafai e i tatou uma lava ona atiaʻe le lotomalie. Na faapea mai le aposetolo o Paulo: “Ua aʻoaʻoina aʻu ina ia lotomalie i mea ua ou maua, e tusa lava po o ā tulaga e oo iā te aʻu.” (Faitau le Filipi 4:​11, 12.) Na ia tusia nei upu a o iai i le falepuipui. E ui i lea, e leʻi mou atu lona olioli. Aiseā? Talu ai na ʻaʻoaʻoina o ia ina ia lotomalie i mea ua maua.’ O lea, e tusa pe e faigatā iā i tatou ona faaalia le lotomalie, ae e tatou te iloa mai i le faaaʻoaʻoga a Paulo e mafai lava ona tatou atiaʻe lenei uiga. E lē faapea ai la e otometi ona tatou maua le lotomalie. Nai lo o lea, e tatau ona tatou atiaʻe pe aʻoaʻoina le auala e faaalia ai. E faapefea? O le a tatou talanoaina i lenei mataupu nisi o uiga e fesoasoani iā i tatou e atiaʻe ai le lotomalie.

ATIAʻE LE LOTOFAAFETAI

4. E faapefea i le faaalia o le lotofaafetai ona fesoasoani iā i tatou e maua ai le lotomalie? (1 Tesalonia 5:18)

⁴ O se tasi e lotofaafetai, e faigofie ona ia faaalia le lotomalie. (Faitau le 1 Tesalonia 5:18.) O se faataʻitaʻiga, pe a tatou lotofaafetai mo mea ua tatou maua lea e manaʻomia moni, o le a tatou lē soona popole la e saʻilia isi mea o loo tatou moomoo ai. E faapena foʻi faaeaga i le auaunaga iā Ieova. Pe afai e tatou te lotofaafetai i so tatou faaeaga o loo iai i le taimi lenei, o le a tatou faia la le mea sili i lenā faaeaga, nai lo o le alu uma o le taimi e taumafai ai e maua se isi faaeaga o loo tatou mananaʻo ai. E lētioa la a apoapoaʻi mai le Tusi Paia, ina ia faailoa atu lo tatou lotofaafetai iā Ieova pe a tatou tatalo. O le iai o se uiga lotofaafetai, e fesoasoani e maua ai le “filemu mai i le Atua, lea e silisili i mea uma lava e tatou te malamalama ai.”—Fili. 4:​6, 7.

5. O ā ni mea na tatau ona lotofaafetai ai tagata Isaraelu? (Tagaʻi foʻi i le ata.)

⁵ Seʻi mafaufau i le mea na tupu i le nuu o Isaraelu. Na tele ina latou faitio ona na moomoo i meaʻai sa aai ai i Aikupito. (Nu. 11:​4-6) O le mea moni e leʻi faigofie le olaga i le toafa, ae o le ā na ono fesoasoani i le nuu o Isaraelu e faaalia ai le lotomalie? Sa tatau ona latou faaalu se taimi e manatunatu ai i le tele o mea ua uma ona faia e Ieova mo i latou, ma faaalia le lototalisapaia mo na mea. O se faataʻitaʻiga, a o matuā faapologaina i latou i Aikupito, na taia e Ieova Aikupito i mala e sefulu. Ina ua faasaʻolotoina tagata Isaraelu, na latou “faamativaina ai tagata Aikupito” e ala i lo latou aveina o mea siliva, o mea auro ma ofu. (Eso. 12:​35, 36) Ina ua foliga mai foʻi e pei ua leai se mea e sosola i ai le fanauga a Isaraelu ina ua oo atu i le Sami Ulaula, na faavavega ona vaeluaina e Ieova le sami mo i latou. I le toafa, na fafaga faavavega ai i latou i le manai i aso taʻitasi. Aiseā la na faitio ai pea tagata Isaraelu? E leʻi faapea e latou te leʻi maua ni meaʻai, ae na māfua ona lē faamalieina, ona e leʻi lotofaafetai i mea na latou maua ma mea ua uma ona faia e Ieova mo i latou.

6. O ā nisi o auala e tatou te atiaʻe ai le lotofaafetai?

⁶ E faapefea ona tatou atiaʻe le lotofaafetai? Muamua, ia faaalu se taimi e mafaufau ai i mea lelei ua tatou maua. E mafai foʻi ona tusi i lalo ni mea se lua pe e tolu e te lotofaafetai ai i aso taʻitasi. (Aue. 3:​22, 23) Lua, ia faaleo atu lou lotofaafetai, e ala i le tausolomua ona faafetai atu i isi mo mea ua latou faia mo oe. Ae e sili atu ai, ia faaalia atu lou lotofaafetai iā Ieova. (Sala. 75:1) Lona tolu, ia faauō atu i ē e lotofaafetai. Pe a tatou faauō i ē e faitio ma lē lototalisapaia, e uma ane ua tatou faaaʻoaʻo i o latou uiga. Ae pe a filifili e faauō i ē lotofaafetai, o le a iai se aafiaga lelei iā i tatou. (Teu. 1:​26-28; 2 Timo. 3:​1, 2, 5) O lea, pe a fai ma masani lo tatou faaalia o le lotofaafetai, o le a faigofie la ona tatou lotomalie i mea ua tatou maua.

7. Na faapefea ona atiaʻe e Aci le lotofaafetai, ma o le ā le iʻuga?

⁷ Seʻi mātau le mea na tupu iā Aci mai i Initonesia. Na ia faapea mai: “I le taimi o le KOVITI-19, na ou faatusatusa ai loʻu tulaga i isi uso ma tuafāfine. O le mea na tupu, na ou lagona ai le lē faamalieina.” (Kala. 6:4) O le ā la na fesoasoani iā Aci? Na ia toe taʻua e faapea: “Na ou mafaufau i mea lelei na faia e Ieova mo aʻu i aso taʻitasi, faapea le tele o faamanuiaga ua ou tofo ai ona o loʻu iai i lana faalapotopotoga. Na ou faaleo atu foʻi loʻu lotofaafetai iā Ieova. O le iʻuga, na ou toe lagona le faamalieina moni.” Pe afai ua amata ona e lē fiafia ona o lou tulaga, e mafai ona e faaaʻoaʻo iā Aci e ala i le faia o nisi o mea na ia faia ina ia toe maua ai le lotomalie.

IA LOTOMAULALO

8. O le ā le uiga na aafia ai Paruka?

⁸ Na aafia foʻi Paruka le failautusi a le perofeta o Ieremia, i le uiga o le lē lotomalie. Na tuuina atu iā te ia se tofiga faigatā, o le fesoasoani lea iā Ieremia e faaoo atu se feʻau faaoosala i le nuu lē lotofaafetai o Isaraelu. Peitaʻi, nai lo o le uaʻi atu o Paruka i le faia o le finagalo o Ieova, na iai le taimi na uaʻi atu ai iā te ia lava ma le mea na manaʻo ai. O lea, na faasaʻo ai o ia e Ieova e ala iā Ieremia e faapea: “Ua e saʻilia mea tetele mo oe. Aua neʻi e toe saʻilia nei mea.” (Iere. 45:​3-5) E tai pei na fetalai mai Ieova: “Ia e lotomalie i mea ua e maua ma lou tulaga ua iai.” Na talia e Paruka le aʻoaʻiga ma ia maua ai le finagalo malie o Ieova.

9. E tusa ai ma le 1 Korinito 4:​6, 7, e faapefea ona fesoasoani le lotomaulalo iā i tatou? (Tagaʻi foʻi i ata.)

⁹ O nisi taimi e ono manatu ai se Kerisiano, e tatau ona ia mauaina se faaeaga patino. Atonu e mafaufau faapena ona ua leva ona auauna faamaoni iā Ieova, iai ni ona tomai faapitoa, ma e galue mamafa. Ae teʻi ua uma ane maua e se isi tagata lenā faaeaga. O le ā e fesoasoani iā te ia e saʻo ai pea le vaai? E ao ona ia manatunatu loloto i upu a le aposetolo o Paulo o loo i le 1 Korinito 4:​6, 7. (Faitau.) O faaeaga ma tomai uma e mai iā Ieova. E tatou te lē maua la se faaeaga ona e faapea e tatau ma onomea ona tatou mauaina, pe e sili atu foʻi ona tāua i tatou i lo o isi. Nai lo o lea, ua tatou maua faaeaga uma ona o le agalelei faifua o Ieova.—Roma 12:​3, 6; Efe. 2:​8, 9.

10. E faapefea ona tatou atiaʻe le lotomaulalo?

¹⁰ E mafai ona tatou atiaʻe le lotomaulalo e ala i le manatunatu loloto i le faaaʻoaʻoga a Iesu. O se faataʻitaʻiga, na fufulu e Iesu vae o ona aposetolo e ui e tele māfuaaga na ono manatu ai o ia, e tatau ona faia faapea e ona soo iā te ia. Na faapea mai le aposetolo o Ioane: “Ua silafia e Iesu [1] ua tuuina mai e le Tamā mea uma i ona aao, ma [2] na sau o ia mai i le Atua, [3] e toe alu atu foʻi o ia i le Atua. Ua tulaʻi o ia . . . ma amata ona fufulu ai vae o ona soo.” (Ioa. 13:​3-5) E manino mai, e leʻi avea le tulaga o Iesu ma māfuaaga e mafaufau ai, e tatau ona ia maua se olaga tamaoaiga ma sologa lelei a o iai i le lalolagi. (Luka 9:58) Na ia faataatia se faaaʻoaʻoga lelei mo i tatou i le faaalia o le lotomaulalo, ma le lotomalie i mea ua maua.—Ioa. 13:15.

11. Na faapefea ona fesoasoani le lotomaulalo iā Dennis ina ia maua ai le lotomalie?

¹¹ Na taʻua e le uso o Dennis mai i Netherlands, na taumafai o ia e faaaʻoaʻo i le lotomaulalo o Iesu. Peitaʻi, e lē o taimi uma na faigofie ai. Na ia faapea mai: “Pe a maua e isi se faaeaga, e iai taimi e mapuna aʻe ai iā te aʻu faalogona faamaualuga ma le lē faamalieina. Pe a tupu lenā mea, ou te faia saʻiliʻiliga e faatatau i le lotomaulalo. I laʻu polokalame o le JW Library^® ou te faailoga ai mau e fesootaʻi i le lotomaulalo ina ia vave ai ona ou maua ma toe faitau i ai. Ou te kopi foʻi i laʻu telefoni lauga e faatatau i le lotomaulalo ma ou faalogologo ai i le tele o taimi.a Ua ou iloa o mea uma e tatou te faia i le auaunaga iā Ieova, e faamamaluina ai o ia ae e lē o i tatou lava. O loo tatou faia uma se sao itiiti i le faataunuuina o lona finagalo.” O lea, pe a iai se taimi e te lē fiafia ai ona o lou lē mauaina o se faaeaga, ia taumafai malosi e atiaʻe le lotomaulalo. O le faia faapea, e faamalosia ai lau faiā ma Ieova ma maua ai le lotomalie.—Iako. 4:​6, 8.

MAFAUFAU I FOLAFOLAGA A IEOVA MO LE LUMANAʻI

12. O ā folafolaga a Ieova mo le lumanaʻi e fesoasoani e tatou te maua ai le lotomalie? (Isaia 65:​21-25)

¹² E tatou te lagona foʻi le lotomalie, pe a mafaufau i folafolaga matagofie a Ieova mo le lumanaʻi. Ua faailoa mai e Ieova e ala i le perofeta o Isaia, lona malamalama lelei i tulaga faigatā o loo tatou fesagaʻia. Ae ua ia faamautinoa mai ai foʻi, o le a gaoioi o ia e tafiesea na tulaga faigatā. (Faitau le Isaia 65:​21-25.) O le a tatou maua se olaga saogalemu ma sologa lelei. O le a tatou maua ni galuega faamalieloto, ma aai i meaʻai e tofo lelei ma maua ai le soifua mālōlōina. O le a tatou lē toe popole i mea e lamatia ai le ola. (Isa. 32:​17, 18; Eseki. 34:25) Ioe, o le a tatou olioli i se lumanaʻi matagofie e lagona ai le saogalemu.

13. O ā tulaga faigatā atonu o loo tatou fesagaʻia, ae e faapefea i folafolaga a Ieova mo le lumanaʻi ona fesoasoani iā i tatou?

¹³ Ua tatou ola i “aso e gata ai,” ma e tatou te feagai uma ma tulaga “e sili ona faigatā.” (2 Timo. 3:1) O le taimi la lenei ua sili atu ai ona manaʻomia ona tatou uaʻi atu i folafolaga a Ieova mo le lumanaʻi. I aso taʻitasi, e saunia mai e Ieova le taʻitaʻiga, le fesoasoani, ma foaʻi mai le malosi e tatou te manaʻomia. (Sala. 145:14) E lē gata i lea, o folafolaga a Ieova mo le lumanaʻi, e fesoasoani e tatou te tumau ai i tulaga faigatā. O se faataʻitaʻiga, atonu o loo faigatā iā te oe le tausiga faaletino o lou aiga. Peitaʻi, e lē faapea ai o le a tatou lē maua mea e manaʻomia moni. Aiseā? Ua folafola mai e Ieova e na te saunia mea e tatou te manaʻomia, ma e sili atu foʻi mea o le a ia saunia i le Parataiso. (Sala. 9:18; 72:​12-14) Atonu foʻi o loo e tauivi ma se maʻi tugā, lotomafatia, ma āuga o le tino matua. Ae po o le a faaauau ai ona e tauivi ma na tulaga faigatā? E mautinoa e leai. Ua taʻua i le Tusi Paia, o le a tafiesea atoatoa e Ieova maʻi ma le oti i le lalolagi fou. (Faaa. 21:​3, 4) O le iloaina o na folafolaga, e fesoasoani iā i tatou e maua ai le lotomalie, ma ʻalofia ai le lē fiafia ona o mea o loo tutupu iā i tatou i le taimi lenei. O lea, e mafai ona tatou maua le lotomalie, e tusa lava pe e tatou te feagai ma faiga lē tonu, maliu sē e pele, aafia i se maʻi tugā, ma isi faafitauli. Aiseā? Ua taʻua i le Tusi Paia, “e puupuu . . . puapuaga” o loo tatou fesagaʻia i le taimi lenei, pe a fua i le mapusaga o le a tatou olioli ai e faavavau i le lalolagi fou.—2 Kori. 4:​17, 18.

14. E faapefea ona faamalosia lo tatou mautinoa i folafolaga a Ieova?

¹⁴ Ua tatou aʻoaʻoina, o folafolaga a Ieova e maua ai le lotomalie. O lea, ia faamalosia lo tatou mautinoa i folafolaga a Ieova. O se faataʻitaʻiga, e ono manaʻomia e se tagata se matatioata ina ia manino ai lana vaai i se mea mamao. E faapena foʻi ona manaʻomia ona faamalosia lo tatou mautinoa i folafolaga a Ieova i le lumanaʻi, ina ia manino ai i o tatou mafaufau le olaga o le a iai i le Parataiso. Pe a lofitūina i tatou i le popole i tulaga tautupe, ia faaata le olaga o le a iai i le lumanaʻi lea o le a lē toe manaʻomia ai ni tupe, lē toe iai ni aitalafu, ma se olaga mativa. Pe a popole foʻi ona o le lē maua o se faaeaga i le auaunaga, ia faaata le taimi o le a tatou ausia ai le tulaga lelei atoatoa, ma tatou auauna ai iā Ieova mo le faitau afe o tausaga. (1 Timo. 6:19) Atonu e faigatā i le taimi muamua ona taumafai e faaata le olaga o le a iai, ona o popolega o loo tatou fesagaʻia i aso nei. Peitaʻi, pe a faaauau ona mafaufau i folafolaga a Ieova mo le lumanaʻi, o le a faigofie foʻi ona tatou faaata le olaga o le a iai.

15. O le ā e te aʻoaʻoina mai i le faaaʻoaʻoga a Christa?

¹⁵ Na faapefea i le mafaufau i folafolaga a Ieova mo le lumanaʻi, ona fesoasoani iā Christa le avā a Dennis lea na taʻua muamua? Na faapea mai Christa: “Ou te aafia i se maʻi tugā lea e matuā tigā ai musele o loʻu tino. E lē mafai ona ou savali, ma e manaʻomia ona ou faaaogā le nofoa faataavalevale. O le tele o taimi e pau laʻu mea e fai o le taoto, ma e lagona le tigā o loʻu tino i aso uma. E leʻi leva atu nei, na faapea mai ai le fomaʻi e lē iʻu i se lelei loʻu maʻi. Ae na vave lava ona ou manatua, e gata mai le vaai a le fomaʻi e faatatau i le lumanaʻi, e ese mai i le faamoemoe o loo oʻu tulimataʻia lea ou te maua ai le filemu o le mafaufau. E ui lava la o loo oʻu onosaia le tulaga o maʻi i lenei taimi, ae ou te mautinoa o le a ou olioli i se olaga e aunoa ma maʻi i le lalolagi fou.”

“E LEAI SE MEA E MATITIVA AI I LATOU E MATATAʻU IĀ TE IA”

16. Aiseā na tusi ai le tupu o Tavita e faapea, “e leai se mea e matitiva ai i latou e matataʻu” iā Ieova?

¹⁶ O le mea moni, e lē faapea a auauna se tasi iā Ieova, ona faapea ai lea o le a lē feagai ma ni faafitauli. O se faaaʻoaʻoga, na feagai le tupu o Tavita ma le tele o faafitauli. Na maliliu lana fanau e toʻatolu, tuuaʻia sesē o ia, faalataina e ana uō, ma na fesolasolataʻi foʻi mo le tele o tausaga ina ua lamatia lona ola. Peitaʻi, e ui i na tulaga faigatā, ae na faapea mai o ia e faatatau iā Ieova: “E leai se mea e matitiva ai i latou e matataʻu iā te ia.” (Sala. 34:​9, 10) Aiseā na faia ai e Tavita lenā faamatalaga? Na ia iloa lelei, e ui e lē taofia e Ieova faafitauli e oo i ona tagata, ae e na te saunia le fesoasoani e latou te manaʻomia. (Sala. 145:16) E tatou te faalagolago iā Ieova e na te faamalosia i tatou i tulaga faigatā. O lea, e mafai lava ona tatou maua le lotomalie, e tusa lava po o ā faafitauli e tatou te fesagaʻia.

17. Aiseā e tatou te taumafai ai ia maua le lotomalie?

¹⁷ E finagalo Ieova ia tatou maua le faamalieina i le olaga. (Sala. 131:​1, 2) O lea, ia faia mea uma ina ia maua ai le lotomalie. Pe a tatou taumafai malosi e atiaʻe le lotofaafetai, faaalia le lotomaulalo, ma mafaufau pea i folafolaga a Ieova mo le lumanaʻi, o le a mafai ai ona tatou faapea atu: “Ioe, ua faamalieina aʻu.”—Sala. 16:​5, 6.