E Fesoasoani Mai Ieova Ina ia Tatou Tumau

1. Aiseā e manaʻomia ai ona tatou tutumau, ma o ai e mafai ona fesoasoani mai? (1 Peteru 5:10)

I NEI aso e sili ona faigatā, ua matuā manaʻomia e tagata o Ieova ona tutumau. Atonu o loo feagai nisi o i latou ma se maʻi tugā, o le maliu o sē e pele, po o teteega foʻi mai i tauaiga po o faigāmalo. (Mata. 10:​18, 36, 37) Po o ā lava ni tulaga faigatā o loo e fesagaʻia, ia e mautinoa e fesoasoani mai Ieova iā te oe ina ia tumau.—Faitau le 1 Peteru 5:10.

2. O fea e tatou te maua ai le malosi e tumau ai o ni Kerisiano?

² O le tumau, e uiga atu i lo tatou auauna faamaoni pea ma le olioli iā Ieova e ui i tulaga faigatā, o sauāga, ma faaosoosoga. E tatou te tumau i na tulaga faigatā, ona e tatou te iloa e iai se taimi o le a faaleleia ai le tulaga o mea. Peitaʻi, e lē faalagolago lo tatou tumau o ni Kerisiano i so tatou lava malosi, ae e faalagolago iā Ieova o lē e foaʻi maia le “mana lea e sili atu i le malosi o tagata.” (2 Kori. 4:7) O le a talanoaina i lenei mataupu ni sauniuniga se fā mai iā Ieova e fesoasoani e tatou te tumau ai, faapea auala e tatou te maua atoatoa ai aogā mai i na sauniuniga.

TATALO

3. Aiseā e faapea atu ai o se vavega le tatalo?

³ O le tatalo o se sauniuniga matagofie mai iā Ieova e fesoasoani e tatou te tumau ai. E mafai ona tatou talanoa atu iā te ia e ui i lo tatou tulaga agasala. (Epe. 4:16) Seʻi mafaufau i le mea lenei: E mafai ona tatou tatalo atu iā Ieova i so o se taimi, i so o se mataupu, i so o se gagana, ma mai i so o se nofoaga, e tusa lava po ua tuua na o i tatou pe faafalepuipuiina foʻi. (Iona 2:​1, 2; Galu. 16:​25, 26) E tusa foʻi pe faigatā ona faaleo atu o tatou manatu iā Ieova, ae e malamalama lelei o ia i o tatou faalogona. (Roma 8:​26, 27) O le mea moni, o se vavega le tatalo.

4. Aiseā e faapea atu ai e ōgatusa ma le finagalo o Ieova le talosaga atu mo lana fesoasoani e tumau ai?

⁴ Ua faamautinoa mai e Ieova i lana Afioga, “po o ā lava mea e tatou te talosaga atu ai e tusa ma lona finagalo, e faafofoga mai lava o ia iā i tatou.” (1 Ioa. 5:14) Pe e ōgatusa ma le finagalo o Ieova lo tatou talosaga atu mo lana fesoasoani, ina ia tatou tumau ai? Ioe, auā o lo tatou tumau, o le a mautali ai Ieova i taufaifaiga a Satani le Tiapolo. (Faata. 27:11) E lē gata i lea, e naunau Ieova “ina ia faaali [mai] lona malosi iā i latou e atoatoa o latou loto iā te ia.” (2 No. 16:9) O lea, e iā Ieova le mana ma le faanaunauga e fesoasoani mai iā i tatou ina ia tumau ai.—Isa. 30:18; 41:10; Luka 11:13.

5. E faapefea i le tatalo ona tatou maua ai le filemu o le mafaufau? (Isaia 26:3)

⁵ Ua taʻua i le Tusi Paia, pe a tatalo faatauanau atu iā Ieova e faatatau i o tatou popolega, ona “leoleoina ai lea o o [tatou] loto ma mafaufau i le filemu mai i le Atua, lea e silisili i mea uma lava e tatou te malamalama ai.” (Fili. 4:7) E tatou te lotofaafetai ona o lenā sauniuniga. Aiseā? Pe a feagai i latou e lē auauna iā Ieova ma faigatā, e latou te ono taumafai e fai ni metotia e maua ai le filemu o le mafaufau. O se faataʻitaʻiga, e faaaogā e nisi se auala e taumafai e faateʻa ese ai manatu ma popolega uma mai o latou mafaufau, ina ia maua ai le toʻafilemu. Peitaʻi o le lamatiaga, e uma ane ua taaʻina ai o latou mafaufau e temoni. (Faatusatusa i le Mataio 12:​43-45.) E tusa lava foʻi pe e latou te maua le filemu mai i na auala, ae e lē faatusalia i le filemu moni mai iā Ieova. Pe a tatou tatalo, e faailoa atu ai lo tatou faalagolago atoatoa iā Ieova, o lē e foaʻi maia le “filemu e faaauau pea.” (Faitau le Isaia 26:3.) O se tasi o auala e foaʻi mai ai e Ieova le filemu, o le faamanatu mai lea i o tatou mafaufau o ni mau faamāfanafanaloto, lea e faamautinoa mai ai le alofa o Ieova ma lona naunau e fesoasoani mai.—Sala. 62:​1, 2.

6. O ā mea e mafai ona faaaofia i a tatou tatalo? (Tagaʻi foʻi i le ata.)

⁶ Mea e mafai ona tatou faia. A o tatou feagai ma se tulaga faigatā, ia “lafo atu [o tatou] popolega uma iā Ieova” ma tatalo mo le filemu o le mafaufau. (Sala. 55:22) Ia tatalo foʻi mo le atamai ina ia iloa ai le auala e fesagaʻia ai se faafitauli. (Faata. 2:​10, 11) E lē gata i lea, ia aua neʻi galo ona faafetai atu iā Ieova. (Fili. 4:6) Ia mataalia i auala o loo fesoasoani mai ai Ieova ina ia tatou tumau, ma faafetai atu iā te ia mo lana fesoasoani. Aua neʻi avea faafitauli o loo tatou fesagaʻia, e puaoa ai la tatou vaai i faamanuiaga o loo tatou olioli ai.—Sala. 16:​5, 6.

TUSI PAIA

7. E faapefea i le suʻesuʻeina o le Tusi Paia ona fesoasoani e tatou te tumau ai?

⁷ Ua saunia mai e Ieova lana Afioga ina ia fesoasoani iā i tatou e tumau ai. O loo iai i le Tusi Paia le tele o mau o loo faamautinoa mai ai lana lagolagosua. O se faataʻitaʻiga, o se fetalaiga a Iesu lava ia, o lē e sili atu lona silafia o Ieova nai lo o se isi lava. Na ia fetalai i le Mataio 6:8: “Ua silafia e lo outou Tamā mea o loo outou manaʻomia, ae tou te leʻi talosaga atu.” O lea, pe a feagai ma tulaga faigatā, ia tatou mautinoa e naunau Ieova e fesoasoani mai. E tele foʻi isi mau tai faapena o loo i le Tusi Paia, e fesoasoani e faamalosia ai lo tatou tumau.—Sala. 94:19.

8. (a) O le ā se fautuaga mai i le Tusi Paia e fesoasoani iā i tatou e tumau ai? (e) O le ā e fesoasoani iā i tatou e manatua ai fautuaga faale-Tusi Paia pe a manaʻomia?

⁸ E fesoasoani fautuaga mai i le Tusi Paia e tatou te tumau ai. O na fautuaga e tatou te maua ai le atamai e faia ai filifiliga lelei. (Faata. 2:​6, 7) O se faataʻitaʻiga, o loo fautua mai le Tusi Paia ina ia faalagolago iā Ieova i aso taʻitasi, nai lo o le soona popole i mea e ono tutupu pe e lē tutupu foʻi. (Mata. 6:34) Pe a fai ma a tatou masani le faitau i le Tusi Paia ma manatunatu loloto i ai, o le a faigofie la ona tatou manatua se fautuaga faale-Tusi Paia pe a tatou manaʻomia.

9. E faapefea i tala o loo i le Tusi Paia, ona faamalosia atili ai lo tatou maufaatuatuaina o le fesoasoani a Ieova?

⁹ O loo iai foʻi i le Tusi Paia tala e faatatau i tagata e pei o i tatou, o ē na maufaatuatuaina Ieova ma tofo i lana fesoasoani. (Epe. 11:​32-34; Iako. 5:17) Pe a mafaufau loloto i na tala, o le a atili ai ona tatou mautinoa, o Ieova o lo “tatou sulufaʻiga ma lo tatou malosi, o ia o le fesoasoani sili i taimi o puapuaga.” (Sala. 46:1) O le manatunatu loloto foʻi i faaaʻoaʻoga a auauna a Ieova i le taimi ua teʻa, o ē na tutumau faamaoni e ui i tulaga faigatā, o le a faalaeiauina ai foʻi i tatou e faia faapea.—Iako. 5:​10, 11.

10. E faapefea ona tatou maua aogā mai i le sauniuniga a Ieova o le Tusi Paia?

¹⁰ Mea e mafai ona tatou faia. Ia faitau le Tusi Paia i aso taʻitasi, ma fai se lisi o mau e mafai ona fesoasoani iā te oe e tumau ai. Ua iloa e le toʻatele le aogā o le faitauina o le mau o le aso i taeao taʻitasi, ina ia latou maua ai se manatu faalaeiau e mafaufau ai a o faagasolo le aso. O le mea lenā na fesoasoani iā Mariaa e tumau ai, a o lata ina maliliu nai ona mātua na ia tausiaina, ona na maua uma i le kanesa. Na ia faapea mai: “I taeao taʻitasi, ou te faitauina ai le mau o le aso, ma manatunatu loloto i ai. O le faia faapea na fesoasoani iā te aʻu e uaʻi atu ai i mea matagofie o loo aʻoaʻo mai e Ieova i le Tusi Paia, nai lo o le uaʻi i oʻu faafitauli.”—Sala. 61:2.

ʻAUUSO KERISIANO

11. Aiseā e faamāfanafanaina ai i tatou i le iloa e lē na o i tatou o loo feagai ma tulaga faigatā?

¹¹ Ua saunia mai e Ieova le ʻauuso Kerisiano e fesoasoani iā i tatou ina ia tumau. E faamāfanafanaina i tatou i le iloa, o mafatiaga o loo tatou fesagaʻia “o mafatiaga lava ia o loo puapuagatia ai foʻi lo [tatou] ʻauuso atoa” i le lalolagi aoao. (1 Pete. 5:9) Po o ā lava la tulaga faigatā o loo tatou fesagaʻia, ia mautinoa o faigatā foʻi na o loo feagai ma le ʻauuso, ae o loo latou tumau pea. O lea, e mafai foʻi ona tatou tumau!—Galu. 14:22.

12. E faapefea ona fesoasoani mai lo tatou ʻauuso, ma e faapefea ona tatou fesoasoani iā i latou? (2 Korinito 1:​3, 4)

¹² E faalaeiauina i tatou e lo tatou ʻauuso ina ia tumau, e ala i a latou upu ma gaoioiga. Na iloa e le aposetolo o Paulo le moni o lenā manatu. E masani ona ia taʻua patino igoa o i latou na fesoasoani atu iā te ia a o saisaitia i se fale, ma faafetai atu iā i latou. Na latou faamāfanafana, faalaeiau ma avatu fesoasoani aogā iā Paulo. (Fili. 2:​25, 29, 30; Kolo. 4:​10, 11) I aso foʻi nei, e mafai ona fesoasoani mai uso ma tuafāfine ina ia tatou onosaia tulaga faigatā, ma e mafai foʻi ona tatou faia faapea iā i latou pe a latou manaʻomia le fesoasoani.—Faitau le 2 Korinito 1:​3, 4.

13. O le ā na fesoasoani i le tuafafine o Maya e tumau ai?

¹³ Na avea le ʻauuso ma puna o faamāfanafanaga mo le tuafafine o Maya mai Rusia. Na osofaʻia e leoleo lona fale i le 2020, ma mulimuli ane tulaʻi i luma o le faamasinoga ona o moliaga o le faasoa atu i isi o ona talitonuga. Na faapea mai Maya: “I lenā taimi, na ou lagona le lotovaivai, popole ma le matuā faanoanoa. Ae na masani ona vili ma tusi mai uso ma tuafāfine, ma faailoa mai lo latou alolofa tele iā te aʻu. E ui ua leva ona ou iloa e toʻatele loʻu aiga faaleagaga e alolofa iā te aʻu, ae o le mea na tupu i le 2020 na atili ai ona ou mautinoa i le moni o lenā manatu.”

14. E faapefea ona tatou maua aogā mai i le sauniuniga a Ieova, o uso ma tuafāfine? (Tagaʻi foʻi i le ata.)

¹⁴ Mea e mafai ona tatou faia. Pe a tatou feagai ma tulaga faigatā, ia ʻalofia le faaesea o i tatou mai i uso ma tuafāfine, ae ia faaalu se taimi ma i latou. Aua le faatalatū e talosaga atu i toeaina mo se fesoasoani, auā o i latou “o se lafitaga mai i le matagi, ma se mea e malu ai mai i timuga mamafa.” (Isa. 32:2) I le taimi e tasi, ia manatua o loo feagai foʻi isi uso ma tuafāfine ma faafitauli. O le fesoasoani atu iā i latou, e tatou te maua ai pea le fiafia a o tatou onosaia se tulaga faigatā.—Galu. 20:35.

LO TATOU FAAMOEMOE

15. Na faapefea ona fesoasoani le faamoemoe iā Iesu, ma e faapefea ona fesoasoani iā i tatou? (Eperu 12:2)

¹⁵ Ua saunia mai e Ieova se faamoemoe mautinoa, e fesoasoani iā i tatou e tumau ai. (Roma 15:13) Seʻi mafaufau i le auala na fesoasoani ai le faamoemoe iā Iesu, e onosaia ai le taimi sili ona faigatā o lona olaga i le lalolagi. (Faitau le Eperu 12:2.) Na silafia lelei e Iesu, o lona tumau faamaoni o le a saosaolaumea i le faasilisilia o le suafa o Ieova. E lē gata i lea, na ia tulimataʻia le taimi e toe faatasi ai ma lona Tamā, faapea le taimi e pule faatasi ai ma ona uso faauuina i le Malo i le lagi. I se tulaga taitutusa, e fesoasoani foʻi lo tatou faamoemoe e ola e faavavau i le lalolagi fou, e tatou te onosaia ai so o se tulaga faigatā i lenei lalolagi a Satani.

16. Na faapefea ona fesoasoani le faamoemoe iā Ana, ma o le ā e tatou te aʻoaʻoina mai i lana faamatalaga?

¹⁶ Ia mātau le auala na fesoasoani ai le faamoemoe o le ola i le lalolagi fou, i le tuafafine o Ana mai i Rusia. Na molia ma faafalepuipuiina lana tane, e faatali ai lona faamasinoga. A o faagasolo lenā taimi, na faapea mai Ana: “Na masani ona ou tatalo ma manatunatu loloto i lo tatou faamoemoe, ma na fesoasoani e tuuitiitia ai oʻu faalogona lotovaivai. Na ou iloa e lē faaauau ai pea tulaga faigatā o loo oʻu fesagaʻia. E iai le taimi o le a faaumatia ai e Ieova ona fili, ma o le a ia tauia lo tatou tumau.”

17. E faapefea ona faaalia lo tatou talisapaia o le faamoemoe ua saunia mai e Ieova? (Tagaʻi foʻi i le ata.)

¹⁷ Mea e mafai ona tatou faia. Ia faaalu le taimi e mafaufau ai i lo tatou faamoemoe matagofie mai iā Ieova mo le lumanaʻi. Ia faaata lo tatou iai i le lalolagi fou ma faamanuiaga o le a tatou olioli ai. Po o ā lava faafitauli o loo tatou fesagaʻia i le taimi lenei, e “puupuu ma māmā” pe a faatusatusa i le olaga i le parataiso e faavavau. (2 Kori. 4:17) E lē gata i lea, ia faasoa atu i isi lo tatou faamoemoe. E mautinoa e lē faigofie iā i latou ona onosaia tulaga faigatā o loo latou fesagaʻia, aemaise e latou te lē o iloa le faamoemoe mai iā Ieova. E tusa lava pe e puupuu se taimi e talanoa ai ma i latou, ae e mafai ona tatou faaosofia lo latou naunau mo faamanuiaga o le Malo.

18. Aiseā e tatou te mautinoa ai e taunuu folafolaga a Ieova?

¹⁸ Na tumau faamaoni Iopu e ui i le tele o faigatā na ia fesagaʻia. Mulimuli ane, na ia faapea atu iā Ieova: “Ua ou iloa nei e mafai ona e faia mea uma lava, e lē mafai foʻi ona vaoia se mea e te finagalo i ai.” (Iopu 42:2) Na iloa lelei e Iopu, o so o se folafolaga e faia e Ieova e mautinoa e taunuu. O lo tatou iloaina o lenā mea, e mafai ona faamalosia ai foʻi i tatou e tumau. O se faataʻitaʻiga, seʻi mafaufau i se fafine ua tele tausaga o maʻi. E tele fomaʻi na alu i ai ae e leʻi mafai ona latou togafitia o ia, ma ua ia lagona ai le lotovaivai. Peitaʻi, ina ua ia maua se fomaʻi lelei e malamalama i lona maʻi ma le auala e togafitia ai, na vave lava ona ia lagona le fiafia. E ui lava la e umi se taimi faatoʻā toe foʻi i le mea sa iai, ae o le iloaina o le a toe faafoʻisia lona malosi, na fesoasoani iā te ia e onosaia ai tigā. I se tulaga taitutusa, o lo tatou mautinoa o le a faataunuuina folafolaga uma a Ieova o loo tatou faamoemoe i ai i le lalolagi fou, e fesoasoani iā i tatou e tumau ai.

19. O le ā e manaʻomia ona tatou faia ina ia tumau ai?

¹⁹ E pei ona tatou talanoaina, ua aumaia e Ieova sauniuniga e pei o le tatalo, le Tusi Paia, o le ʻauuso Kerisiano ma lo tatou faamoemoe, ina ia fesoasoani iā i tatou e tumau ai. Pe a tatou faaaogā tatau na sauniuniga, o le a mafai ai ona tatou tumau e ui i faigatā, seʻia oo ina tafiesea e Ieova faafitauli uma o le lalolagi a Satani.—Fili. 4:13.