Aogā o Mau Faasino

O mau faasino O le Tusi Paia—O le Faaliliuga a le Lalolagi Fou, e tatou te iloa ai e lē feteenaʻi mau o le Tusi Paia, auā o loo taʻua ai mau e maua ai isi faamatalaga faaopoopo e lagolagoina ai se isi mau. E iloagofie se mau e iai mau faasino pe afai e iai se tamaʻi mataʻitusi i autafa o se upu. Pe a faaaogā le Tusi Paia i le jw.org po o le polokalame JW Library^®, ia oomi le tamaʻi mataʻitusi ina ia maua ai mau faasino. Ae pe afai o se Tusi Paia lolomi, e mafai ona maua le lisi o mau faasino i le ogatotonu o le itulau. Ia vaai i lenā lisi, po o lē fea mau faasino o loo iai le tamaʻi mataʻitusi e tutusa ma le tamaʻi mataʻitusi o loo i totonu o le fuaiupu o se mau.

O mau faasino e te maua ai isi faamatalaga faaopoopo e pei o nei:

Mau Talitutusa: E faailoa mai i se mau faasino, se isi tusi o le Tusi Paia o loo taʻua ai se tala lava e tasi o se mea na tupu po o se manatu talitutusa. O se faataʻitaʻiga, tagaʻi i le 2 Samuelu 24:1 ma le 1 Nofoaiga a Tupu 21:1.

Mau Sii: E faailoa mai i se mau faasino se isi mau o le Tusi Paia na sii mai ai se manatu po o se faaupuga. O se faataʻitaʻiga, tagaʻi i le Mataio 4:4 ma le Teuteronome 8:3.

Faataunuuga o se valoaga: Pe a e faitau i se mau o loo iai se valoaga, e mafai ona e maua i le mau faasino, le mau o loo iai le faataunuuga o lenā valoaga. O se faataʻitaʻiga, tagaʻi i le Mataio 21:5 ma le Sakaria 9:9.