“O Oe o Sē ua Matuā Faapelepeleina”!

1-2. O le ā e fesoasoani iā i tatou e mautinoa ai e tautele i tatou i le silafaga a Ieova?

O LE mea moni, e iai nisi o auauna pele a Ieova o loo tauivi ma faalogona e leai so latou aogā, pe e manatu e leai so latou tāua. Atonu e māfua ona o le siʻomaga na ola aʻe ai, pe e leʻi lelei foʻi le auala na feutagaʻi ai isi ma i latou. Afai o loo e tauivi ma faalogona faapena, o le ā e fesoasoani iā te oe e mautinoa ai e tautele oe i le silafaga a Ieova?

² O se tasi o fesoasoani, o le iloiloina o faaaʻoaʻoga faale-Tusi Paia o loo faamatilatila mai ai le auala e silasila ai Ieova i tagata. Na feutagaʻi lona Alo o Iesu ma tagata i se auala agalelei ma faaaloalo. O le faia faapea, na faaatagia mai ai e tautele iā Ieova ma Iesu, tagata lotomaulalo o ē na manatu e leai so latou aogā. (Ioa. 5:19; Epe. 1:3) I lenei suʻesuʻega, o le a tatou talanoaina ai: (1) auala na fesoasoani ai Iesu i tagata e iloa lo latou tāua, ma le (2) auala e faatalitonuina ai i tatou lava e tautele i tatou i le silafaga a le Atua.—Ha. 2:7.

NA FAAMAUTINOA ATU E IESU I ISI E TAUTELE I LATOU

3. O le ā le auala na feutagaʻi ai Iesu ma tagata Kalilaia?

³ A o faagasolo le talaʻiga a Iesu i Kalilaia, na lolofi atu ai tagata iā te ia e faalogologo i ana aʻoaʻoga, ma ia faamālōlōina i latou. Na silasila Iesu iā i latou e pei o ni “mamoe ua faamanuʻalia ma agaleagaina, ua leai so latou leoleo mamoe.” (Mata. 9:36) Na vaai maulalo taʻitaʻi lotu iā i latou na, ma manatu i ai o tagata ua “faamalaiaina.” (Ioa. 7:​47-49) Peitaʻi, na faaalia e Iesu le agalelei ma le faaaloalo, e ala i le aʻoaʻoina o i latou ma faamālōlōina o latou maʻi. (Mata. 9:35) Na saunia foʻi e Iesu le fesoasoani mo tagata, e ala i le toleniina o ona aposetolo e folafola atu le tala lelei, ma tuuina atu iā i latou le pule e faamālōlōina ai so o se ituaiga o maʻi.—Mata. 10:​5-8.

4. O le ā e tatou te aʻoaʻoina mai i le auala na feutagaʻi ai Iesu ma i latou na vaai maulalo i ai isi?

⁴ Na feutagaʻi Iesu ma lana ʻaufaalogologo i se auala agalelei ma faaaloalo. O lona faia faapea, na faaatagia atu ai e matuā pele iā i laʻua ma lona Tamā, ē na vaai maulalo i ai tagata lautele. Pe afai o loo e auauna iā Ieova ae o loo e masalosalo pe e iai sou aogā, ia manatunatu i le auala na feutagaʻi ai Iesu ma tagata faatauvaa. O le faia faapea, o le a fesoasoani iā te oe e iloa ai e matuā pele ma tautele oe i le silafaga a Ieova.

5. Ia faamatala le tulaga o se fafine na feiloaʻi ai Iesu i Kalilaia.

⁵ Na uaʻi foʻi Iesu i le aʻoaʻoina ma le fesoasoani i tagata taʻitoʻatasi. O se faataʻitaʻiga, a o talaʻi Iesu i Kalilaia, na ia feiloaʻi ai i se fafine ua 12 tausaga talu ona maʻi i le punatoto. (Mare. 5:25) O lona tulaga na lē mamā ai o ia e tusa ma le tulafono, ma o so o se tasi e paʻi atu iā te ia o le a lē mamā foʻi. Atonu o le tele o taimi na faifaimea ai na o ia, auā na ʻalofia o ia e tagata ona o lona maʻi. Sa lē mafai foʻi ona ia faatasitasi ma ona aiga ma uō i taimi o tausamiga, faapea taimi o tapuaʻiga i le sunako. (Levi. 15:​19, 25) E lē gata la na pagatia lenei fafine i maʻi o le tino, ae na mafatia foʻi i le itu tau faalogona.—Mare. 5:26.

6. O le ā na faia e le fafine ina ia mapu mai ai i lona maʻi?

⁶ Talu ai na fia maua e lenei fafine se mapusaga, na naunau ai e faamālōlōina o ia e Iesu. Peitaʻi, e na te leʻi talosaga tuusaʻo atu iā Iesu e faia faapea. Aiseā? Atonu na ia lagona le māsiasi ona o lona maʻi, pe atuatuvale foʻi ina neʻi teena o ia e Iesu i le alu atu i le mea o loo tumutumu ai tagata, ae e lē o mamā. O lea, na ia paʻi atu ai i le ofu o Iesu ma lona mautinoa o le a faamālōlōina o ia, ma na tauia lona faatuatua. (Mare. 5:​27, 28) Peitaʻi, na faateʻia o ia ina ua faliu atu Iesu ma fesili po o ai na paʻi i lona ofu. Na faailoa atu e le fafine o ia lea na faia faapea. O le ā le auala na tali atu ai Iesu?

7. O le ā le auala na feagai ai Iesu ma lenei fafine lotomafatia? (Mareko 5:34)

⁷ Na feagai Iesu ma lenei fafine i se auala agalelei ma faaaloalo. O le manatu mamafa o Iesu i faalogona o le fafine, na ia fetalai atu ai iā te ia i se auala alofa. Na ia faapea atu, “loʻu afafine.” O lenei faaupuga e faaatagia atu ai le faaaloalo ma le māfana o faalogona o Iesu mo lenei fafine. (Faitau le Mareko 5:34.) E na o le pau lea o le taimi i le Tusi Paia ua taʻua tuusaʻo ai e Iesu se fafine, “loʻu afafine.” Atonu na māfua ona faia faapea e Iesu, ona na ia mātauina lona matuā ʻfefe ma le tetemū.’ (Mare. 5:33) E mautinoa na avea fetalaiga a Iesu ma mea na lagona ai e le fafine le fiafia ma le faafouina, e pei ua matuu atu se avega mamafa! Pe ana faapea e lē talanoa atu Iesu i se auala faapelepele, semanū e tusa lava pe e faamālōlōina lona maʻi, ae o le a leaga ona faalogona ma nofosala ona o lana gaoioiga na fai. Peitaʻi, na fesoasoani Iesu iā te ia ina ia iloa, e matuā tautele o ia ma o se afafine pele a Ieova le Atua!

8. O ā luʻi na feagai ma se tasi o tuafafine i Pasili?

⁸ I aso nei, ua aafia foʻi nisi o auauna faamaoni a le Atua i maʻi o le tino, lea e aafia ai o latou faalogona pe manatu ai e leai so latou aogā. O se faataʻitaʻiga o Maria,a o se paeonia sauatoa i Pasili na fanau mai e leai ni ona vae ma e leai sona lima agavale. Na ia faapea mai: “I le aʻoga, e masani ona ula mai tamaiti iā te aʻu, pe valaau aʻu i ni igoa faifai ma faatigā. E oo lava i tagata o loʻu aiga, na vaai maulalo iā te aʻu.”

9. O le ā na fesoasoani iā Maria e na te iloa ai e tautele o ia i le silafaga a Ieova?

⁹ Na faapefea ona maua e Maria le fesoasoani? Ina ua avea o ia ma Molimau a Ieova, na faamāfanafana ma fesoasoani uso ma tuafāfine iā te ia, ina ia vaai iā te ia lava e pei o le silasila a Ieova. Na faapea mai Maria: “E lē lava upu e faamatala ai loʻu lotofaafetai mo le toʻatele o uso ma tuafāfine na fesoasoani iā te aʻu. Ou te matuā faafetai iā Ieova mai i le taʻele o loʻu fatu, i lona saunia o se aiga faaleagaga e alolofa moni iā te aʻu.” E manino mai i inei, na fesoasoani le faapotopotoga iā Maria e na te iloa le tautele o ia i le silafaga a Ieova.

10. O ā tulaga e sili ona faigatā na fetaiaʻi ma Maria le Makatala? (Tagaʻi foʻi i ata.)

¹⁰ O se isi faaaʻoaʻoga o se tagata na fesoasoani i ai Iesu, o Maria le Makatala lea na ulufia e temoni e toʻafitu. (Luka 8:2) O aafiaga o taaʻiga a temoni, atonu na ia faia ai ni gaoioiga e lē masani ai, ma ʻalofia ai e tagata le faifaimea faatasi ma ia. I lenā taimi pagatia o lona olaga, atonu na ia lagona ua peiseaʻī e leai sona faamoemoe, ma e leai se tasi e mafai ona fesoasoani iā te ia. Peitaʻi, na faasaʻoloto o ia e Iesu mai i temoni, ma avea o tasi o ona soo faamaoni.

11. O ā gaoioiga na faia e Iesu e faamaonia atu ai iā Maria le Makatala, e tautele o ia iā Ieova? (Tagaʻi foʻi i ata.)

¹¹ O ā isi auala na fesoasoani ai Iesu iā Maria le Makatala, e na te iloa ai lona tāua iā Ieova? Na faasafua atu e Iesu iā te ia le faaeaga e latou te malaga faatasi ai ma ona soo, e talaʻi atu i lea aai ma lea aai.b O le faia faapea, na maua ai pea e Maria aogā a o faalogologo atu i le aʻoaʻoina e Iesu o isi. E lē gata i lea, i le aso na toetū ai Iesu, na ia faaali atu ai iā Maria le Makatala. O ia o se tasi o soo na muamua fetalai atu i ai Iesu i lenā aso. Na tofia foʻi e Iesu o ia e faailoa atu i ona aposetolo, o lea ua ia toetū mai. Maʻeu le tele o faamaoniga e iloa ai e Maria le Makatala le tautele o ia iā Ieova!—Ioa. 20:​11-18.

12. Ia faamatala le māfuaaga na oo ai iā Lidia faalogona e leai sona aogā.

¹² I le pei o Maria le Makatala, e toʻatele isi i aso nei o loo tauivi foʻi ma faalogona e pei e leai so latou aogā. Na faamatala e se tuafafine mai i Sepania e igoa iā Lidia, na mafaufau lona tinā e faia le faapaʻū tama a o maʻitaga iā te ia. E oo lava i le taimi a o laʻitiiti o ia, e masani ona lē ano lona tinā iā te ia pe fai atu foʻi i ai ni tala faatigā. Ua faapea mai Lidia: “Na ou taumafai malosi ina ia alofagia ma talia aʻu e isi. I le taimi e tasi na ou mafaufau e tusa po o ā mea ou te faia, e lē taitai alofa se isi iā te aʻu, ona na ou manatu o aʻu o se tagata leaga pe a fua i tala ma gaoioiga a loʻu tinā na fai mai iā te aʻu.”

13. O le ā na fesoasoani iā Lidia ina ia talitonu ai e tautele ma pele o ia i le silafaga a Ieova?

¹³ Ina ua aʻoaʻoina e Lidia le upu moni, na fesoasoani ana tatalo, o ana saʻiliʻiliga, faapea upu ma gaoioiga agalelei a uso ma tuafāfine, e na te iloa ai le tautele o ia i le silafaga a Ieova. Na ia faapea mai: “E masani ona faamautinoa mai e laʻu tane e alofa iā te aʻu, ma faamanatu mai oʻu uiga lelei. O le mea foʻi lenā e masani ona faia mai e isi uso ma tuafāfine.” Pe e iai se isi i lau faapotopotoga o loo tauivi ma faalogona e pei o Lidia? E mafai ona fesoasoani au upu ma gaoioiga e faamautinoa atu ai i lenā tagata, e tautele ma pele o ia i le silafaga a Ieova.

IA ŌGATUSA O TATOU MANATU MA LE SILAFAGA A IEOVA

14. E faapefea ona fesoasoani mai le 1 Samuelu 16:​7, ina ia tutusa la tatou vaaiga iā i tatou lava ma le silasila a Ieova? (Tagaʻi foʻi i le pusa “Aiseā e Matuā Pele ai iā Ieova Ana Auauna?”)

¹⁴ Ia manatua e lē tutusa le silafaga a Ieova ma le vaaiga a tagata o le lalolagi. (Faitau le 1 Samuelu 16:7.) E masani lava o le vaaiga faaletagata, e fua le tāua o se tasi i ona foliga vaaia, tulaga tau tamaoaiga, po o tulaga tauaʻoaʻoga. Peitaʻi, e lē faapena le silafaga a Ieova. (Isa. 55:​8, 9) O lea, ia vaai iā te oe lava e pei o le silasila a Ieova. O loo iai i le Tusi Paia le tele o tala e faatatau i auauna a Ieova na oo foʻi i ai faalogona lē aogā, e pei o Elia, Naomi, ma Hana. A o e faitau i na tala, ia mātau faamaoniga e iloa ai le alofa faapelepele o Ieova iā i latou. Ia tusi foʻi i lalo ni mea na tutupu i lou olaga, na faamautinoa atu ai iā te oe e tautele ma pele oe iā Ieova. E lē gata i lea, ia suʻesuʻe i mataupu o loo iai i a tatou lomiga e faatatau i le auala e foʻia ai faalogona lē aogā.c

15. Aiseā na silasila ai Ieova iā Tanielu “o sē ua matuā faapelepeleina”? (Tanielu 9:23)

¹⁵ E pele oe iā Ieova ona o lou faamaoni. I se tasi taimi, atonu ua lata i le 100 tausaga o le perofeta o Tanielu, na ia lagona ai le “matuā vaivai.” (Tani. 9:​20, 21) Na faapefea ona faalaeiau o ia e Ieova? Na auina mai e Ieova le agelu o Kaperielu ina ia faamautinoa atu iā Tanielu, o ia “o sē ua matuā faapelepeleina” ma ua faafofogaina e Ieova ana tatalo. (Faitau le Tanielu 9:23.) Aiseā na alofa faapelepele ai Ieova iā Tanielu? E mautinoa ona o le tele o ona uiga lelei, e aofia ai le faia o le amiotonu ma lona tumau faamaoni. (Eseki. 14:14) Ua faamauina e Ieova lenā tala i lana Afioga, ina ia avea o se faamāfanafanaga iā i tatou. (Roma 15:4) E faafofoga mai Ieova i a tatou tatalo ma e alofa faapelepele iā i tatou, ona o lo tatou faia o le mea tonu ma auauna atu pea ma le faamaoni iā te ia.—Mika 6:​8, fpl.; Epe. 6:10.

16. O le ā e mafai ona fesoasoani iā te oe ina ia vaai ai iā Ieova o se Tamā alofa?

¹⁶ Ia vaai iā Ieova o se Tamā e alofa iā te oe. E lē vaavaai masei Ieova iā te oe, ae e finagalo e fesoasoani atu. (Sala. 130:3; Mata. 7:11; Luka 12:​6, 7) O le manatunatu loloto i lenā upu moni, ua matuā fesoasoani i le toʻatele o loo iai faalogona e leai so latou aogā. O se faataʻitaʻiga, o le tuafafine o Michelle mai i Sepania, lea e masani ona fai i ai e lana tane ni tala faatigā ma faaonoono mo le tele o tausaga. Na ia faapea mai: “O so o se taimi lava e oo ai iā te aʻu faalogona lē aogā, ou te taumafai e faaata o loo tauaveina aʻu e Ieova i ona aao alofa, ma o loo ia leoleoina aʻu.” (Sala. 28:9) Na taʻua foʻi e se tuafafine e igoa iā Lauren mai i Aferika i Saute, e masani ona ia mafaufau e faapea: “Pe afai na tosina mai ma le agalelei aʻu e Ieova i manoa o le alofa, iai se ma faiā vavalalata mo le tele o tausaga, ma faaaogāina aʻu e aʻoaʻoina isi e faatatau iā te ia, e mautinoa la e matuā tautele ma pele aʻu iā te ia.”—Ho. 11:4.

17. O le ā e fesoasoani iā te oe ina ia talitonu ai o loo finagalo malie Ieova iā te oe? (Salamo 5:12) (Tagaʻi foʻi i le ata.)

¹⁷ Ia e talitonu o loo finagalo malie Ieova iā te oe. (Faitau le Salamo 5:12.) Na taʻua e Tavita, o le finagalo malie o Ieova e na te puipuia ai ona tagata amiotonu e pei o se “talita telē.” O lea, o le iloaina o loo fesoasoani mai Ieova ma o loo finagalo malie iā te oe, e mafai ona avea o se puipuiga pe a lofitūina oe i faalogona e pei e leai sou aogā. E faapefea ona e mautinoa o loo finagalo malie Ieova iā te oe? O loo faailoa mai e Ieova ona faalogona e ala mai i lana Afioga le Tusi Paia. E lē gata i lea, ua ia faaaogāina toeaina, o uō vavalalata, ma isi ina ia faamanatu atu e tautele oe i lana silafaga. O le ā la le auala e ao ona e tali atu ai pe a avatu e nisi ni faalaeiauga?

18. Aiseā e ao ai ona e talia faalaeiauga mai i isi?

¹⁸ Pe a avatu e nisi e iloa oe ma alolofa iā te oe le faamālō ona o ni mea lelei sa e faia, aua e te masalosalo pe e moni la latou faamālō. Ia manatua, atonu o loo faaaogā e Ieova i latou na, ina ia fesoasoani iā te oe e iloa o loo finagalo malie mai o ia iā te oe. Ua faapea mai Michelle lea na taʻua muamua: “O loo faasolosolo lava ona ou taumafai ou te talitonu i faalaeiauga mai i isi. E ui lava e lē faigofie, ae ou te iloa e finagalo Ieova ia ou talia a latou faalaeiauga.” E tele foʻi aogā ua maua e Michelle ona o le fesoasoani agalelei a toeaina. Ua auauna nei o ia o se paeonia, ma o loo galue faavaitaimi mai i lona fale mo le Peteli.

19. Aiseā e te mautinoa ai e tautele ma e pele oe i le silafaga a Ieova?

¹⁹ Ua faamanatu mai ma le agalelei e Iesu, e matuā tāua i tatou i le silafaga a lo tatou Tamā i le lagi. (Luka 12:24) O lea, ia aua neʻi o tatou masalosalo i le tautele ma le pele o i tatou iā Ieova. Ia maumauaʻi e aua lava neʻi galo iā i tatou lenā manatu, ma faia le mea sili e tatou te mafai e fesoasoani ai i isi e iloa le tautele o i latou i le silafaga a Ieova.