O le ā le Tusi Paia?

Tali a le Tusi Paia

O le Tusi Paia o se tuufaatasiga o tusi e 66. Na tusia i se vaitaimi e pe ā ma le 1,600 tausaga. O loo iai i le Tusi Paia se feʻau mai i le Atua po o “le afioga a le Atua.”—1 Tesalonia 2:13.

I lenei mataupu

Mea moni e faatatau i le Tusi Paia

O ai na tusia le Tusi Paia? O le Atua le Tusitala o le Tusi Paia, ae na ia faaaogāina tane e pe ā ma le 40 e tusiaina. O nisi o nei tane e aofia ai Mose, tupu o Tavita, Mataio, Mareko, Luka, ma Ioane.a Na tuu e le Atua ona manatu i mafaufau o nei tane, ina ia mafai ai ona latou faamauina lana feʻau.—2 Timoteo 3:16.

Ina ia faataʻitaʻi: Pe a faatonu e se faipisinisi lana failautusi e tusia se tusi mo ia, atonu e na o manatu autū e na te faailoaina atu, ae e taʻua lava lenā tusi o le tusi a le tagata faipisinisi. O lea, e ui na faaaogā e le Atua ni tane e tusia lana feʻau, ae o ia o le Tusitala o le Tusi Paia.
O le ā le uiga o le upu “Tusi Paia”? I le tele o gagana, o le upu ua faaliliuina “Tusi Paia” e sau mai i le upu Eleni biblia, lea e uiga atu i le “tamaʻi tusi.” A o faagasolo taimi, na iʻu ina faaaogā le upu biblia e faamatala ai le tuufaatasiga o tamaʻi tusi ia ua fai aʻe ai le Tusi Paia.
O anafea na tusia ai le Tusi Paia? Na amata ona tusiaina le Tusi Paia i le 1513 T.L.M. ma na māeʻa i le silia i le 1,600 tausaga mulimuli ane, i le pe tusa o le 98 T.A.
O fea o iai uluaʻi tusitusiga o le Tusi Paia? E lē o toe maua uluaʻi tusitusiga o le Tusi Paia. E māfua ona sa tusia le Tusi Paia i mea e faigofie ona pala na maua i na taimi, e pei o paʻu o laau ma paʻu o manu. Peitaʻi, na tusia ma le faaeteete e ni tusiupu atamamai ni kopi o le Tusi Paia a o faagasolo senituri, ma faasaoina mai ai pea le feʻau o loo iai, ina ia faitau ai isi.
O le ā le “Feagaiga Tuai” ma le “Feagaiga Fou”? O le vaega o le Tusi Paia lea e tele ina taʻua o le Feagaiga Tuai, e faasino atu i vaega o le Tusi Paia na tele ina tusia i le gagana Eperu,b ma e taʻua foʻi o Tusitusiga Paia Eperu. O le vaega e taʻua o le Feagaiga Fou e faasino atu i vaega na tusia i le gagana Eleni, ma e taʻua o Tusitusiga Paia Eleni. O nei vaega e lua e faia aʻe ai le tusi atoa, lea e taʻua foʻi o Tusitusiga Paia.c
O ā faamatalaga o loo maua i le Tusi Paia? O loo maua i le Tusi Paia faamatalaga e faatatau i le talafaasolopito, tulafono, valoaga, solo, faataoto, pese, ma tusi.—Tagaʻi i le “Lisi o Tusi o le Tusi Paia.”

O ā mea o loo tusia i le Tusi Paia?

E amata le Tusi Paia i se otootoga puupuu o le foafoaina o le lagi ma le lalolagi e le Atua e ona le malosi uma lava. E ala mai i le Tusi Paia, ua faailoa mai ai e le Atua lava ia lona suafa o Ieova, ma valaaulia tagata ina ia aʻoaʻo e faatatau iā te ia.—Salamo 83:18.

O loo taʻua i le Tusi Paia na tuuaʻia sesē le Atua, ma o loo faailoa mai ai le auala o le a ia toe faafoʻisia ai lona talaaga lelei.

O loo faailoa mai i le Tusi Paia le finagalo o le Atua mo tagata ma le lalolagi. O loo faailoa mai ai foʻi le auala o le a tafiesea ai e le Atua i le lumanaʻi le māfuaaga o mafatiaga o tagata.

O loo maua i le Tusi Paia fautuaga aogā mo le olaga i aso fai soo. O nisi nei o faataʻitaʻiga:

Faatumauina o faiā lelei. “O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.”—Mataio 7:12.

Lona uiga: E tatau ona tatou faia i isi le mea e tatou te mananaʻo e faia mai e isi iā i tatou.
Auala e feagai ai ma le popole. “Ia aua neʻi outou popole mo le aso a taeao, auā e iai foʻi popolega o le aso a taeao.”—Mataio 6:34.

Lona uiga: Nai lo o le soona popole e faatatau i mea e ono tutupu i le lumanaʻi, ia uaʻi atu tau o popolega o le asō.
Mauaina o se faaipoipoga fiafia. “Ia taʻitasi outou ma alofa i lana lava avā e pei ona ia alofa iā te ia lava; a o le avā, ia matuā faaaloalo o ia i lana tane.”—Efeso 5:33.

Lona uiga: E tāua tele le alofa ma le faaaloalo mo le mauaina o se faaipoipoga taulau manuia.

Po ua suia le feʻau o le Tusi Paia?

E leai. Na faatusatusa ma le faaeteete e le ʻaufaitofā o le Tusi Paia manusikulipi o le Tusi Paia mai anamua ma Tusi Paia i aso nei ma iloa ai, e lē o suia le feʻau o loo iai. E talafeagai lenei tulaga, auā pe afai o le finagalo o le Atua ia faitau ma malamalama tagata i lana feʻau o loo i le Tusi Paia, e na te faamautinoa la e lē suia le feʻau o loo iai.d—Isaia 40:8.

Aiseā ua tele ai faaliliuga eseese o le Tusi Paia?

O le toʻatele o tagata faitau e lē o toe malamalama i uluaʻi gagana na tusia ai le Tusi Paia. Peitaʻi, o loo iai i le Tusi Paia se “tala lelei” mo “atunuu uma, ma ituaiga uma, ma gagana uma.” (Faaaliga 14:6) O le māfuaaga lenā e manaʻomia ai e tagata se faaliliuga o le Tusi Paia i le gagana e latou te malamalama ai, ina ia mafai ona latou faitau ma malamalama lelei ai i le feʻau mai i le Atua.

Auala e tolu o loo faaliliuina ai le Tusi Paia:

O le faaliliuga i le upu i le upu e taumafai e tutusa lelei le faaliliuga ma le auala o loo faaupu ai le gagana o loo faaliliuina mai ai.
O le faaliliuga o manatu e faaaogā ai upu e faailoa mai ai le uiga o le uluaʻi gagana.
O le faaliliuga e toe faaupu ai manatu, e saʻoloto lava le toe faaupuina i se isi auala, ina ia fiafia ai tagata e faitau. Peitaʻi, o lenā saʻolotoga e toe faaupu le faaliliuga, atonu o nisi taimi e suia ai le uiga o le manatu.

O se faaliliuga lelei o le Tusi Paia, e faaaogā ai le faaliliuga i le upu i le upu faatasi ma le gagana faigofie o aso nei i se auala talafeagai, ina ia faaliliu ma le saʻo le feʻau a le Atua i tagata.e

O ai na filifilia mea e tatau ona faamauina i le Tusi Paia?

I le avea ai o le Atua ma Tusitala o le Tusi Paia, na ia filifilia mea e tatau ona faamauina ai. Na ia muaʻi filifilia le nuu o Isaraelu anamua, e “tuuina atu iā i latou afioga paia a le Atua,” e latou te tausisia le saʻo o Tusitusiga Paia Eperu.—Roma 3:2.

Pe e iai ni tusi o le Tusi Paia ua leiloloa?

E leai. Ua atoa uma tusi o le Tusi Paia, ma e leai ni tusi ua leiloloa. E ono faapea mai nisi e iai ni tusi anamua sa avea ma vaega o le Tusi Paia, ae na natia mai i tagata lautele.f Peitaʻi, e lē manaʻomia nisi tusi e faamaonia ai le saʻo aʻiaʻi o le Tusi Paia. (2 Timoteo 1:13) Talu ai o tusi o le Tusi Paia na faagaeeina e le Atua, e ōgatusa uma la faamatalaga o loo iai. E lē faapena tusitusiga anamua uma ia e faapea mai nisi o ni vaega o le Tusi Paia.g

Auala e suʻe ai mau o le Tusi Paia

Lisi o tusi o le Tusi Paia

a Ina ia maua se lisi o tusi uma o le Tusi Paia, o ē na tusia, ma le taimi na tusia ai, faamolemole tagaʻi i le vaega “Tusi o le Tusi Paia.”

b E iai vaega lāiti o le Tusi Paia na tusia i le gagana Arama, o se gagana e taitutusa ma le gagana Eperu.

c O le toʻatele o le ʻaufaitau o le Tusi Paia, e sili atu ona fiafia i faaupuga “Tusitusiga Paia Eperu” ma le “Tusitusiga Paia Eleni.” O nei faaupuga e ʻalofia ai le manatu ua lē toe aogā le “Feagaiga Tuai,” ma ua suia i le “Feagaiga Fou.”

d Tagaʻi i le mataupu “Po ua Suia e Nisi le Tusi Paia?”

e E toʻatele e fiafia e faitau le faaliliuga O le Tusi Paia—O le Faaliliuga a le Lalolagi Fou ona e saʻo aʻiaʻi ma faigofie ona faitau. Tagaʻi i le mataupu “Pe e Saʻo Aʻiaʻi le Faaliliuga a le Lalolagi Fou?”

f O le tuufaatasiga o nei tusitusiga e taʻua o le Apokerifa. E tusa ai ma le Encyclopædia Britannica, “i lomiga faale-Tusi Paia, [e faasino atu lenei upu i] tusitusiga e lē o aofia i tusitusiga paia ua taliaina,” pe e lē aofia i le lisi o tusi o le Tusi Paia ua faamaonia.

g Ina ia iloa atili, tagaʻi i le mataupu “Evagelia Faa-Apokerifa—Po o ni Upu Moni o Loo Natia e Uiga iā Iesu?”