Po o Valoia Mai e le Tusi Paia le Auala e Mafaufau ma Gaoioi ai Tagata i Aso Nei?

Le Tali a le Tusi Paia

Ioe, o loo valoia i le Tusi Paia o le a sili atu ona leaga le auala e mafaufau ma gaoioi ai tagata i ō tatou taimi. Ua faailoa mai i lenei suiga le teena e le toʻatele o tagata o tapulaa maualuluga tauamio, lea e fesoasoani i le ola filemu o tagata.a (2 Timoteo 3:1-5) Ae ua valoia mai foʻi e le Tusi Paia, e iai tagata o le a latou amanaʻia nei tapulaa maualuluga tauamio. E ala i le fesoasoani a le Atua, o le a latou teena ai nei aafiaga leaga ae faaōgatusa o latou mafaufauga ma gaoioiga ma lona finagalo.—Isaia 2:2, 3.

I lenei mataupu

• O le ā ua valoia mai e le Tusi Paia e faatatau i mafaufauga ma amioga a tagata i ō tatou aso?

• O le ā le aafiaga o tagata manatu faapito i isi?

• Aiseā ua matuā leaga ai amioga a tagata?

• O le ā la tatou tali atu i suiga leaga ua iai tagata?

• Po o leaga amioga a tagata uma?

• Po o le a faatumulia olaga o tagata i le sauā ma le leaga?

O le ā ua valoia mai e le Tusi Paia e faatatau i mafaufauga ma amioga a tagata i ō tatou aso?

O loo faamatalaina i le Tusi Paia amioga leaga ma gaoioiga eseese ua taatele ona o le uiga manatu faapito. Ua avea tagata ma “ē e lē amio pulea,” “alolofa iā i latou lava” ma “ē e pupū i mea faafiafia nai lo le alolofa i le Atua.”—2 Timoteo 3:2-4.

E moni lenei valoaga, auā o tagata i aso nei ua na o le mafaufau iā i latou lava, o mea e lelei iā i latou, o mea latou te fiafia i ai ma mea e latou iloa e aogā i o latou olaga, ma isi mea. E pei ona taʻua i lenā valoaga o le toatele o tagata ua manatu mo lo latou lava lelei, ma ua faasolo ina faateteleina le leaga.—2 Timoteo 3:2, 3.

O le manatu faapito o le faapogai lea o isi uiga lea na valoia i le Tusi paia ua taatele i ō tatou aso:

• Matapeʻapeʻa. O le toʻatele o tagata o ē e “mananaʻo tele i tupe” e latou te talitonu, e fua lo latou taulau manuia i le tele o latou tupe po o meafaitino.—2 Timoteo 3:2.

• Faamaualuga. E toʻatele ē e “fia tagata, faamaualuluga” ma “faafefeteina i le faamaualuga.” (2 Timoteo 3:2, 4) O tagata faapena e gugutu ma manatu o i latou ua sili atu le atamamai, tele o latou tomai ma le tamaoaiga.

• Taufaaleaga. Ua taatele “ē e fai upuleaga i isi” ma “ē e faia tala taufaaleaga i isi.” (2 Timoteo 3:2, 3) O nei faaupuga e faasino atu iā i latou e taufaifai i isi po o le Atua pe faia pepelo e faatatau iā i latou lava.

• Lotomaaa. O le toʻatele o tagata o “ē e lē faamaoni” o “ē e mumusu i maliega,”o “ē e faalata,” ma “ē e faaulumalō.” (2 Timoteo 3:2-4) Ua latou faaalia nei uiga e ala i le mumusu e soālaupule, ma galulue faatasi ma isi e saʻili se vaifofō, po o le tausisi i a latou folafolaga sa fai.

• Sauā. O le toʻatele i aso nei e “sauā” ma vave le ita, lea e masani ona iʻu atu ai i faiga po o gaoioiga sauā.—2 Timoteo 3:3.

• Solitulafono. Na valoʻia e Iesu “ua faatuputeleina le amioleaga” i o tatou taimi. (Mataio 24:12) Na ia valoʻia foʻi le taatele o le “fouvale.”—Luka 21:9.

• Leai se alofa i le aiga. Talu ai o le toʻatele “e lē usiusitaʻi i mātua” ma “e lē lotoaiga,” ua toʻatele ai tagata o aiga ua faileagaina ma sauāina.—2 Timoteo 3:2, 3.

• Faiga faafiaamiotonu a lotu. Ua faatuputeleina le aofaʻiga o tagata e “foliga mai e faamaoni i le Atua” (2 Timoteo 3:5) Nai lo le usitaʻi i le faia o le finagalo o le Atua, ae ua latou mulimuli i taʻitaʻiga a taʻitaʻi lotu ma fai mea e mananaʻo ai taʻitaʻi lotu.—2 Timoteo 4:3, 4.

O le ā le aafiaga o tagata manatu faapito i isi?

Talu ai ua matuā toʻatele tagata manatu faapito, ua toʻatele ai foʻi tagata ua mafatia i faafitauli tau i le mafaufau ma tau faalogona i le taimi lenei nai lo se isi lava taimi. (Failauga 7:7) O se faaaʻoaʻoga, o i latou e mananaʻo tele i tupe ua latou faasesēina isi. O ē e leai se lotoaiga, ua latou faileagaina sui o o latou aiga, ma māfua ai ona mafatia ma mananaʻo nei tagata e pule i o latou ola. O ē e faalata ma ē e lē faamaoni ua latou faapogaia mafatiaga tau faalogona i isi mo se taimi umi lava.

Aiseā ua matuā leaga ai amioga a tagata?

Ua faamatalaina i le Tusi Paia le māfuaaga moni o le suiga i tagata.

• Ua mou atu le alofa i le Atua ma tuaoi. (Mataio 24:12) O le māfuaaga lea ua faateleina ai le manatu faapito.

• Ua tuliese Satani mai le lagi ma ua lafoina mai i le lalolagi. (Faaaliga 12:9, 12) Talu mai lenā mea na tupu, ua matuā taaʻina e Satani tagata ia atili ona manatu faapito.—1 Ioane 5:19.

O le ā la tatou tali atu i suiga leaga ua iai tagata?

Ua faapea mai le Afioga a le Atua: “Ia ʻaloese mai i na tagata.” (2 Timoteo 3:5, Easy-to-Read Version) E lē uiga atu faapea e tatau ona tatou faaesea i tatou mai isi tagata. Nai lo lea, e tatau ona ʻalofia le māfana atu iā i latou e ola i ni olaga manatu faapito ma lē matataʻu i le Atua.—Iakopo 4:4.

Po o leaga amioga a tagata uma?

Leai. Na valoia i le Tusi Paia e iai nisi o “ē ua mapuitigā ma feoi ona o mea inosia uma o loo faia.” (Esekielu 9:4) Ua latou teena le manatu faapito ma ua ola e ōgatusa ma tapulaa a le Atua. O a latou upu ma gaoioiga e matuā ese mai i tagata amioleaga. (Malaki 3:16, 18) O se faaaʻoaʻoga, e latou te taumafai e tausisia le filemu ma tagata uma ma e lē auai i taua ma faiga sauā.—Mika 4:3.

Po o le a faatumulia olaga o tagata i le sauā ma le leaga?

Leai. E lē faapea o le a matuā faaleagaina olaga o tagata uma. Nai lo lea, ua toeitiiti ona aveesea lea e le Atua tagata e lē usiusitaʻi i ana tapulaa. (Salamo 37:38) O le a ia faavaeina se “lalolagi fou,” o le sosaiete fou o tagata i le lalolagi, lea o le a ola ai ē e agamalu i le filemu e faavavau. (2 Peteru 3:13; Salamo 37:11, 29) O se faamoemoe moni lava. O loo fesoasoani le Tusi Paia i tagata ina ia suia o latou olaga ia ōgatusa ma ala amiotonu a le Atua.—Efeso 4:23, 24.