UA FESILI MAI TALAVOU
E Faapefea Ona Toleni Loʻu Lotofuatiaifo?
O lē fea o nei mea e mafai ona faatusatusa i ai lou lotofuatiaifo?
o se tapasā
o se faata
o se uō
o se faamasino
O le tali saʻo o mea uma e fa. O le a faamatala atu i lenei mataupu le māfuaaga.
O le ā le lotofuatiaifo?
O lou lotofuatiaifo o se faalogona lea e i totonu e iloa ai le saʻo ma le sesē. Ua taʻua i le Tusi Paia e “pei o se tulafono ua tusia i le loto o le tagata,” (Roma 2:15, Contemporary English Version) O se lotofuatiaifo lelei o le a fesoasoani iā te oe e iloilo lelei laasaga o le olaga o le a e uia, po o laasaga ua uma ona e faia.
O lou lotofuatiaifo ua pei o se tapasā. E na te taʻitaʻi oe i le ala saʻo ma ʻalofia ai faafitauli.
O lou lotofuatiaifo ua pei o se faata. E na te faaatagia atu au amioga, ma faaalia atu ai lou tagata moni i totonu.
O lou lotofuatiaifo ua pei o se uō lelei. E na te avatu fautuaga lelei ma fesoasoani atu ia e taulau manuia—pe afai e te faalogo ma utagia.
O lou lotofuatiaifo ua pei o se faamasino. E na te faasala oe pe a e faia se mea leaga.
O se lotofuatiaifo lelei e fesoasoani e te faia ai filifiliga atamai
Manatu autū: O lou lotofuatiaifo o se meafaigaluega tāua e mafai ona fesoasoani iā te oe e (1) faia ni filifiliga atamai ma le (2) faamautinoa ua e salamō ma toe faasaʻo au mea sesē.
Aiseā e toleni ai lou lotofuatiaifo?
Ua taʻu mai e le Tusi Paia iā i tatou ina “ia taofimau i se lotofuatiaifo lelei.” (1 Peteru 3:16) E faigatā ona fai lenā mea pe afai e leʻi toleniina lou lotofuatiaifo.
“Ou te pepelo i oʻu mātua ma nanā mai iā i laʻua mea ou te alu i ai. I le taimi muamua, na ōia loʻu lotofuatiaifo, ae a o faagasolo taimi, ua leai soʻu lagona e sesē laʻu mea lea e fai.”—Jennifer.
Ae na iʻu lava ina uunaʻia e lona lotofuatiaifo Jennifer e taʻu i ona mātua le mea o loo tupu ma faamuta ai lona ʻolegia o i laʻua.
Mafaufau i ai: O fea tonu le taimi na ono iloa ai e Jennifer se faailoilo mai lona lotofuatiaifo?
“E faigatā ma tigā le ola i se olaga uigalua. O le taimi lava e faataga ai e lou lotofuatiaifo oe e fai se filifiliga sesē se tasi, o le a faigofie loa ona e faia se isi filifiliga sesē.”—Matthew.
O nisi tagata ua matuā lē amanaʻia lava o latou lotofuatiaifo. Ua faapea mai le Tusi Paia, ua “lē toe lagona e i latou le mā.” (Efeso 4:19) Ua faaliliuina e le Good News Translation e faapea: “Ua matuā leai lava ni o latou faalogona māsiasi.”
Mafaufau i ai: Pe o faaleleia olaga o tagata ia e lē o lagona le nofosala ona o a latou gaoioiga sesē o loo fai? O ā ni faafitauli latou te faatalitalia?
Manatu autū: Ina ia tausia pea se lotofuatiaifo lelei, e manaʻomia ona faaaogā lou “mafaufau e iloa le mea saʻo ma le mea sesē ina ua aʻoaʻoina.”—Eperu 5:14.
E faapefea ona toleni lou lotofuatiaifo?
Ina ia toleni lou lotofuatiaifo, e manaʻomia ona e faataatia ni taʻiala e faatusatusa i ai au gaoioiga o loo fai. Ua mulimuli nisi tagata i taʻiala ua faataatia e:
aiga ma aganuu
uō
tagata taʻutaʻua i faafiafiaga
Peitaʻi, e sili atu taʻiala i le auala e ola ai o loo maua i le Tusi Paia. E lē faateʻia ai i tatou i lenā mea, ona o le Tusi Paia “e mai i le agaga o le Atua,” o Lē na foafoaina i tatou ma e na te silafia le mea e sili ona lelei mo i tatou.—2 Timoteo 3:16.
Iloilo ni faaaʻoaʻoga.
LE TAʻIALA: “Matou te mananaʻo ina ia faia mea uma ma le faamaoni.”—Eperu 13:18.
E faapefea i lenā taʻiala ona aafia ai lou lotofuatiaifo pe a faaosoosoina oe e te kopi i se suʻega, pepelo i ou mātua, pe gaoi?
Pe a uunaʻia oe e lou lotofuatiaifo ina ia faia mea uma ma le faamaoni, e faapefea ona e maua ai aogā i le taimi nei ma le lumanaʻi?
LE TAʻIALA: “Ia sosola ese i le faitaaga.”—1 Korinito 6:18.
E faapefea i lenā taʻiala ona aafia ai lou lotofuatiaifo pe a faaosoosoina oe e te matamata i ata matagā tau feusuaʻiga, pe faia foʻi feusuaʻiga a o leʻi faaipoipo?
Pe a uunaʻia oe e lou lotofuatiaifo ina ia sola ese mai i feusuaʻiga lē mamā, e faapefea ona e maua ai aogā i le taimi nei ma le lumanaʻi?
LE TAʻIALA: “Ia agalelei le tasi i le isi, ia māfana lo outou alofa, ma ia fefaamagaloaʻi ma le lotoatoa.”—Efeso 4:32.
E faapefea i lenā taʻiala ona aafia ai lou lotofuatiaifo pe a tulaʻi mai se feeseeseaʻiga i le lua va ma sou uso faaletino, po o se uō?
Pe a uunaʻia oe e lou lotofuatiaifo ina ia faamagalo atu ma māfana lou alofa, e faapefea ona e maua ai aogā i le taimi nei ma le lumanaʻi?
LE TAʻIALA: ʻE inosia lava e Ieova le tagata e fiafia i le faasauā.’—Salamo 11:5.
E faapefea i lenā taʻiala ona aafia ai lou lotofuatiaifo pe a filifili au ata tifaga, polokalame i le TV, ma taaloga vitiō?
Pe a uunaʻia oe e lou lotofuatiaifo ina ia teena faafiafiaga sauā, e faapefea ona e maua ai aogā i le taimi nei ma le lumanaʻi?
TALA MONI: “E iai ni aʻu uō e taaalo i taaloga vitiō sauā, ma sa ou taalo ai foʻi. Ae na fai mai loʻu tamā e lē mafai ona ou toe taalo ai i na taaloga. E faatoʻā ou taalo lava la pe a ou alu i aʻu uō. E leai ma saʻu tala e faia pe a ou sau i le fale. E fesili mai loʻu tamā pe iai se mea o tupu, ae na ona ou fai atu lava o loo lelei mea uma. I se tasi aso, na ou faitauina le Salamo 11:5 ma ua amata ona lē lelei oʻu faalogona ona o aʻu mea o loo fai. Na ou iloa e tatau ona aua neʻi oʻu toe taalo i na taaloga vitiō, ma ua mafai ona tuu. Ina ua vaai se tasi o aʻu uō i laʻu faataʻitaʻiga, na uunaʻia ai o ia e lē toe taalo i taaloga sauā.”—Jeremy
Mafaufau i ai: O fea le taimi na amata ai ona gaoioi le lotofuatiaifo o Jeremy, ma o fea le taimi na amata ai ona ia amanaʻia lona lotofuatiaifo? O le ā e mafai ona e aʻoaʻoina mai le faataʻitaʻiga a Jeremy?
Manatu autū: O lou lotofuatiaifo e faailoa mai ai po o ai oe, ma mea e te talitonu i ai ma tāua iā te oe. O le ā o loo taʻu mai e lou lotofuatiaifo e faatatau iā te oe?