Pe e Tuuaʻia le Atua mo o Tatou Mafatiaga?

Tali a le Tusi Paia

O le tali mautinoa a le Tusi Paia, e leai! E leʻi aofia mafatiaga i le fuafuaga a Ieova le Atua mo tagata. Peitaʻi na fouvale le uluaʻi ulugalii i le pule a le Atua, i le filifili lea o a laʻua lava tapulaa i le lelei ma le leaga. Na la fulitua i le Atua ma mafatia ai i iʻuga leaga.

I aso nei, ua tatou aafia i iʻuga o la laʻua filifiliga leaga. Ae e leʻi faapogaia lava e le Atua mafatiaga o tagata.

Ua faapea mai le Tusi Paia: “Pe a faaosoosoina se tasi, aua neʻi manatu: ‘⁠Ua faaosoosoina aʻu e le Atua.’ E lē mafai ona faaosoosoina le Atua i mea leaga. E lē faaosooso atu foʻi o ia i se tasi.” (Iakopo 1:13) E mafai ona aafia so o se tasi i mafatiaga, e oo lava iā i latou e finagalo malie i ai le Atua.