Aiseā e Lē Mananaʻo ai Oʻu Mātua Ou te Maua le Fiafia?

Ua valaaulia oe e au uō i se patī i le faaiʻuga o le vaiaso. E te fesili atu i ou mātua pe e mafai ona e alu, ae o le la tali, “E leai.” E lē faateʻia ai oe ona o le la tali masani lava lenā.

I lenei mataupu

• Aiseā e tali mai ai oʻu mātua “leai” i taimi uma?

• E faapefea ona ou maua le faatagaga mai i oʻu mātua?

• Tala a isi talavou

Aiseā e tali mai ai oʻu mātua “leai” i taimi uma?

Afai o le tali masani a ou mātua o le leai, atonu la e te manatu e la te lē mananaʻo e te maua le fiafia.

E faapena faalogona o se talavou e igoa iā Marie ina ua faatoʻā maua sana telefoni. Na ia faapea mai: “E filifili e loʻu tamā apps e tatau ona tuu i laʻu telefoni, o tagata e tatau ona ou fesootaʻi i ai, ma le taimi e talanoa ai i na tagata. Ae na saʻoloto aʻu uō e faia so o se mea e latou te mananaʻo i ai.”

Mea e mafaufau i ai: Pe na manaʻo moni lava le tamā o Marie e taofi o ia mai i le faia o mea e fiafia i ai? Pe na iai se isi mea na ia popole i ai?

Faataʻitaʻi: Seʻi faapea o oe o se matua, ma o lea faatoʻā maua se telefoni a lau tama. O ā ni mea o le a faapopoleina ai oe? O ā ni tulafono o le a e faia ina ia puipuia ai lau tama? O le a faapefea ona e tali atu pe a manatu lau tama e te lē manaʻo e na te maua le fiafia?

“E masani ona faapea mai loʻu tamā, ‘Taumafai e tuu oe i le tulaga o se matua.’ O loʻu faia faapea, na fesoasoani iā te aʻu e iloa ai le tāua o ana tulafono ma le māfuaaga na ia faia ai. Pe a fai saʻu fanau, ou te faatalitalia i latou e faia le mea lea na faatalitalia e loʻu tamā mai iā te aʻu.”—Tanya.

E faapefea ona ou maua le faatagaga mai i oʻu mātua?

Mea e lē tatau ona fai: Faalii, tomumu, pe toe tali atu.

“E leai se mea e maua i le soona eʻē ma tali atu. E lē gata o le a e lagona ai le lotovaivai ae faapea foʻi ou mātua. Pe a e toe tali atu, o le a iloa ai e ou mātua e te leʻi agavaa e fai au lava filifiliga, ma e lē tatau ona tuu atu iā te oe le saʻolotoga e faia ai faapea.”—Richard.

“E masani lava e iai se māfuaaga lelei e fai ai e oʻu mātua se tulafono. E la te lē o taumafai e taofiofia aʻu mai i le mauaina o le fiafia. Ae o loo la taumafai ia ou maua le fiafia moni, lea e lē iʻu atu ai i ni faafitauli.”—Ivy.

Mataupu silisili o le Tusi Paia: “O le tagata valea e na te sasaa uma mai ona faalogona, a o lē e atamai, e na te taofiofia i se auala toʻafilemu.”—Faataoto 29:11.

Mea e lē tatau ona fai: Faia o mea e aunoa ma le iloa e ou mātua.

“Ou te leʻi usitaʻi i le faatonuga a loʻu tamā i le faaaogāina o laʻu telefoni. Na ou taumafai e saʻili avanoa e lafo ai feʻau tusitusia i aʻu uō i le leva o le pō, ma tuu apps ia e leʻi faatagaina e loʻu tamā i laʻu telefoni. Na iʻu ina iloa e loʻu tamā, ma na tele atu ai isi faasāsāaga na ou maua ona ua ia lē maufaatuatuaina aʻu. E lē o se mea lelei le faia o mea e aunoa ma le iloa e mātua.”—Marie.

“Ia onosaʻi. Atonu e umi se taimi o e tau faamasani i se tulafono a ou mātua. Ae pe a la mātauina lou usitaʻi i a la tulafono, atonu o le a la tuuina atu ai le saʻolotoga e te faia ai isi mea.”—Melinda.

Mataupu silisili o le Tusi Paia: “Ia usiusitaʻi i o outou mātua i mea uma lava.”—Kolose 3:20.

Mea e lē tatau ona fai: Aua e te tauanauina ou mātua e faataga oe e fai se mea e te manaʻo ai, e ala i le taʻu atu iā i laʻua o loo faataga foʻi e isi mātua a latou fanau e fai lenā mea.

“O lou tauanauina o ou mātua e fai le mea e te manaʻo ai, e atili faafaigatā ai mea mo oe ma e te lē maua ai le mea o loo e manaʻo ai.”—Natalie.

“E mananaʻo mātua ia la iloa e mafai ona e faia ni filifiliga atamai. Pe a ou talanoa i oʻu mātua, ou te taumafai e lagolago oʻu manatu i ni māfuaaga talafeagai nai lo o le faavae mai i oʻu faalogona. Pe a ou faia faapea, e masani lava ona la faatagaina aʻu e fai le mea ou te manaʻo i ai.”—Joseph.

Mataupu silisili o le Tusi Paia: “Ia e āva i lou tamā ma lou tinā.”—Efeso 6:2.