UA FESILI MAI TALAVOU

E faapefea ona ou fesagaʻia gaoioiga faatosina matagā i faiga taufeusuaʻiga?

O le ā le uiga o gaoioiga faatosina matagā i faiga taufeusuaʻiga?

O gaoioiga faatosina matagā i faiga taufeusuaʻiga e aofia ai amioga e lē manaʻomia, e pei o le paʻi atu, po o le faia o faamatalaga e faatatau i faiga faaleituaiga. O nisi taimi e faigatā ona iloa le eseesega o le taufaalili, faatafai ma gaoioiga faatosina matagā i faiga taufeusuaʻiga.

Pe e te iloa le eseesega? Ia iloilo fesili o loo mulimuli mai e uiga i gaoioiga faatosina matagā i faiga taufeusuaʻiga ma e iloa ai le tali!

E faanoanoa lava, ona o le a lē muta gaoioiga faatosina matagā i faiga taufeusuaʻiga pe a e faauu mai le aʻoga. Peitaʻi, afai e te atiaʻe le mautinoa ma tomai e te manaʻomia e feagai ai ma gaoioiga faatosina matagā i faiga taufeusuaʻiga i le taimi lenei, o le a sauniunia ai oe e feagai ma na faiga pe a e faigaluega. Atonu o le a mafai ai ona e taofia lē o loo faia na gaoioiga mai le faatigā o isi!

O le ā e tatau ona ou faia pe a feagai ma gaoioiga faatosina matagā i faiga taufeusuaʻiga?

Atonu e mafai ona taofia gaoioiga faatosina matagā i faiga taufeusuaʻiga pe afai e te malamalama i ia faiga ma le auala e tali atu ai! Seʻi iloilo ni mea na tutupu se tolu ma le auala e te ono taulimaina ai na tulaga.

MEA NA TUPU:

“I le galuega, e masani ona fai mai isi tama e matutua atu iā te aʻu ou te aulelei, ma latou te moomoo o i latou o ni talavou e i lalo ifo o le taʻi 30 tausaga. Na savali mai se tasi o i latou i oʻu tua ma sogisogi i loʻu lauulu!”—Tabitha, 20.

E ono mafaufau Tabitha: ‘Pe afai ou te lē amanaʻia ma onosaia pea nei tulaga faigatā, atonu o le a taofia ai o ia.’

Māfuaaga e ono lē aogā ai: Ua faapea mai tagata atamamai, pe afai e lē amanaʻia e le tagata ua aafia fua nei gaoioiga faatosina matagā i faiga taufeusuaʻiga, o le a faaauau ma faateleina pea nei faiga e tusa pe tetee atu lē o loo aafia ai.

Ia faataʻitaʻi le mea lenei : Ia toʻa lelei ma tautala atu ma le manino i lē o loo faia mai na faiga e te lē taliaina ana faamatalaga ma ana amioga. Ua faapea mai Taryn: “Pe afai e paʻi mai se tasi iā te aʻu i se auala lē talafeagai, ou te fai atu iai e aua neʻi toe tago mai iā te aʻu.” “E masani lava ona faateʻia ai lenā tagata.” Pe afai e faaauau pea na faiga, ia maumauaʻi ma aua le faavaivai. Pe a oo i le tausia o tapulaa maualuluga tau amio, ua fautua mai le Tusi Paia: “Ia tū mausalī, ia taʻumatuaina ma ia mautinoa.” —Kolose 4:12, The New Testament in Contemporary Language.

Ae faapefea pe afai e faamataʻu oe e lē o loo faia gaoioiga faatosina matagā taufeusuaʻiga? I lenā tulaga, aua e te faia se gaoioiga e uunaʻia ai lenā tagata e faia se mea leaga iā te oe. Ia vave gaoioi , ma saʻili se fesoasoani a se tagata matua maufaatuatuaina.

MEA NA TUPU:

“A o ou iai i le vasega ono, na toso aʻu e ni teine se toʻalua i le auala savali. O le isi o i laʻua e feoaʻi ma le isi teine, ma na manaʻo o ia ma te ō ma te tafafao. E ui na ou teena i laʻua, ae sa faaauau pea ona la faia lea gaoioiga i le va o lea vasega ma lea vasega i aso taʻitasi. Na iʻu ina la tuleia aʻu i le puipui!”—Victoria, 18.

Sa ono mafaufau Victoria: ‘Pe a ou taʻuina i se tasi le mea lenei, o le a mafaufau nisi ou te vaivai, ma atonu e leai se isi e talitonu iā te aʻu.’

Māfuaaga e ono lē saʻo ai lenā manatu: Pe a e lē taʻuina le mea na tupu i se tasi, o le a faaauau ai pea ona faia e lea tagata ia gaoioiga.—Failauga 8:11.

Ia faataʻitaʻi le mea lenei: Saʻili se fesoasoani. E mafai ona lagolagosua mātua ma faiaʻoga iā te oe e feutagaʻi ma le tagata o loo faia na gaoioiga. Ae faapefea pe afai e latou te manatu mamā i le mea o loo e fai atu ai? Ia faataʻitaʻi: E so o se taimi lava e faia ai ia gaoioiga matagā iā te oe, ia tusia i lalo faamatalaga. Ia aofia ai le aso, taimi ma le nofoaga o mea taʻitasi na tutupu, faatasi ai ma faamatalaga a le tagata lea na faia gaoioiga faatosina matagā tau feusuaʻiga. Ona ave lea o se kopi i ou mātua po o le faiaʻoga. O le toʻatele o tagata e latou te manatu mamafa i faitioga tusitusia nai lo o faamatalaga e fai atu.

MEA NA TUPU:

“E ese ma loʻu fefe i se tama e taalo i le ʻaulakapi a le aʻoga. E toetoe 2 mita (6.5 futu) lona umi, ae 135 kilokalama (300 pauna) lona mamafa! Na ia manatu o le a mafai ona ma faia feusuaʻiga. E toetoe lava o aso uma e na te tulitulia ai aʻu, o se mea na ia faia i le tausaga atoa. I se isi aso, sa na o i maʻua lava i totonu o le potu aʻoga, ma na amata ona ia sōsō mai iā te aʻu. Na ou oso ese ma tamoʻe i fafo.”—Julieta, 18.

E ono mafaufau Julieta: ‘O uiga masani lava la o tama.’

Māfuaaga e lē aogā ai: E lē ono suia le amio a le tagata o loo faia gaoioiga faatosina matagā taufeusuaʻiga, pe a mafaufau tagata e talafeagai lana gaoioiga lea fai.

Ia faataʻitaʻi le mea lenei: Ia ʻalofia le faia o tausuaga e uiga i faiga faaleituaiga po o le ata ai foʻi i talanoaga faapena. Ae ia faamautinoa lau tali atu, e aofia ai ou foliga vaaia, ia faamanino atu i lea tagata lou talia po o lou lē taliaina foʻi o ana gaoioiga.

O le ā e tatau ona ou faia?

TALA MONI 1:

“Ou te lē manaʻo e lē faaaloalo i tagata. O lea, pe a faia mai pea e tama gaoioiga faatosina matagā taufeusuaʻiga, ou te fai atu iai soia, peitaʻi ou te leʻi maumauaʻi, ma e masani ona ou ataata a o oʻu talanoa atu iā i latou. Na latou manatu ou te faatafai.”—Tabitha.

Pe afai o oe o Tabitha, sa ono faapefea ona e feutagaʻi ma tagata na faia gaoioiga faatosina matagā taufeusuaʻiga? Aiseā?
O le ā e māfua ai ona manatu lenā tagata o loo e faatafai atu?

TALA MONI 2:

“Na amata lava i ni nai faamatalaga lē mamā a isi tama o la matou vasega. Ou te leʻi ano i mea na latou fai mai ai mo ni nai vaiaso, peitaʻi na faasolo ina leaga. Na sosoo ai ma le amata ona nonofo mai i oʻu autafa ma faauōuō aʻu. Na ou tulei ese i latou ae na latou faaauau pea ona faia lenā gaoioiga. Na oo ina tuu mai e se tama se fasi pepa o loo tusia ai ni tala lē mamā. Na ou avea i loʻu faiaʻoga. Na faamālōlō lē tumau le tama mai i le aʻoga. Na ou iloa, sa tatau lava ona ou alu i le faiaʻoga i le amataga!”—Sabina.

Aiseā e te manatu ai na filifili Sabina e aua neʻi alu i lona faiaʻoga i le taimi muamua? Pe e te manatu sa ia faia se faaiʻuga lelei? Aiseā e te tali mai ai ioe pe leai?

TALA MONI 3:

“Na faalatalata atu se tama i loʻu tuagane o Greg i le falelētaʻua. Na sōsō atu le tama iā Greg ma faapea atu, ‘Kisi mai iā aʻu.’ Na fai atu Greg e leai, ae leʻi alu ese le tama. Na tulei ese e Greg le tama.”—Suzanne.

Pe e te manatu na aafia fua Greg i gaoioiga faatosina matagā i faiga taufeusuaʻiga? Aiseā e te tali mai ai ioe po o le leai?
Aiseā e te manatu ai e faatalatū nisi tama e talanoa pe a faia e nisi tama iā i latou gaoioiga faatosina matagā i faiga taufeusuaʻiga?
Pe e te ioe i le tulaga na taulima ai e Greg le mea na tupu? O le a e te ono faia?

Fesili e uiga i gaoioiga faatosina matagā i faiga taufeusuaʻiga

“I le aʻoga tulaga lua, e toso e tama le pito i tua o loʻu papa ma fai mai tala lē mamā e faapea, o le a lelei oʻu faalogona pe a matou momoe.”— Coretta.

Pe e te manatu o na tama sa

A Taufaalili iā Coretta?
E Faatafai iā Coretta?
I Faia gaoioiga faatosina matagā taufeusuaʻiga iā Coretta?

“I luga o le pasi, sa fai mai e se tama ni tala lē mamā ma tago mai i se auala lē talafeagai. Na ou tago po ese lona lima ma fai i ai e alu ese. Ae tilotilo mai iā te aʻu ma manatu e leaga loʻu ulu.”—Candice.

O le ā e te manatu sa faia e lenei tama iā Candice?

A Taufaalili iā te ia?
E Faatafai iā te ia?
I O le faia o gaoioiga faatosina matagā taufeusuaʻiga iā Candice?

“I le tausaga ua teʻa, na masani ona fai mai le isi tama e fiafia iā te aʻu ma na manaʻo e ma te uō, e ui lava na ou fai i ai i taimi uma ou te lē fia uō iā te ia. O isi taimi e tago milimili loʻu lima. Ou te fai iai soia, ae lē tuua ai lana gaoioiga o loo fai. I se tasi taimi ina ua ou punou e nonoa loʻu seevae, sa tago o ia ma po loʻu nofoaga.”— Bethany.

I lou manatu, po o:

A Taufaalili e le tama Bethany?
E Faatafai le tama iā Bethany?
I Faia e le tama ni gaoioiga faatosina matagā i faiga taufeusuaʻiga iā Bethany?

O le tali saʻo nei fesili uma e tolu o le puipui I.

O le ā le eseesega o gaoioiga faatosina matagā i faiga taufeusuaʻiga, ma le faatafai po o le taufaalili? Ua faapea mai Eve: “O gaoioiga faatosina matagā i faiga taufeusuaʻiga, e lē faapea na manaʻo i ai lē ua aafia i nei faiga.” “E faaauau pea nei faiga e tusa pe e tetee atu lē o loo aafia ai. ” O nei faiga e matuiā. E mafai ona iʻu atu ai i faiga sauā taufeusuaʻiga.

Aʻoaʻo atili: Tagaʻi i le mataupu e 32, “E Faapefea Ona Puipuia Aʻu Mai i le Faaleagaina i Faiga Faaleituaiga?” i le tusi o Fesili Ua Fesili Mai ai Talavou, Tali e Aogā.