E Faapefea i Mātua Ona Aʻoaʻoina a Latou Fanau e Faatatau i Feusuaʻiga?

Le Tali a le Tusi Paia

O ai e tatau ona aʻoaʻoina lau fanau e faatatau i feusuaʻiga? Ua tuu atu e le Tusi Paia i mātua lenei tiute tauave, ma e toʻatele mātua ua iloa le aogā o le mulimuli i fautuaga nei:

• Aua e te māsiasi. E tuusaʻo faamatalaga a le Tusi Paia e faatatau i feusuaʻiga ma totogasā, ma na fetalai le Atua i le nuu o Isaraelu e tatau ona aʻoaʻoina le “fanau iti” e faatatau i na mataupu. (Teuteronome 31:12; Levitiko 15:​2, 16-​19) E mafai ona e faaaogāina upu faaaloalo pe a talanoa i feusuaʻiga po o totogasā, ina ia lē avea ma mea e māsiasi ai.

• Ia faasolosolo ona aʻoaʻo. A o tuputupu aʻe lau tama e avea ma talavou, ia faasolosolo ona talanoa i ai e faatatau i feusuaʻiga e fua i lona malamalama, nai lo o le faia o se talanoaga umi.​—1 Korinito 13:11.

• Aʻoaʻo i amioga mamā. Atonu e aʻoaʻoina i aʻoga le fanau i se mataupu e talanoaina ai mea taufeusuaʻiga. Peitaʻi, o loo faalaeiau e le Tusi Paia mātua e aʻoaʻo a latou fanau e faatatau i mea taufeusuaʻiga, le vaaiga saʻo ma amioga talafeagai e tatau ona iai.​—Faataoto 5:​1-​23.

• Faalogo i lou alo. Pe a fesili atu lou alo i se mea e faatatau i feusuaʻiga, aua e te vave ita pe vave faia se faaiʻuga. Nai lo o lea, ia “faalogologo lelei . . . ae aua le vave ona tautala.”​—Iakopo 1:​19.

O auala e puipuia ai lou alo mai i tagata e faaleagaina tamaiti.

• Aʻoaʻo oe. E tatau ona e iloa le auala e gaoioi ai se tagata e faia na uiga matagā.​—Faataoto18:15; tagaʻi i le Tusi 1 mataupu 32 o le Questions Young People Ask​—Answers That Work, Volume 1.

• Ia vaai lava e oe lau tama. Aua neʻi e tuua lau tama e vaai e se isi seʻi vaganā ai ua e maufaatuatuaina lenā tagata, ma aua le tuufauina lau tama.​—Faataoto 29:15.

• Aʻoaʻo ia saʻo le auala e usitaʻi ai. E tatau ona aʻoaʻo fanau ia usiusitaʻi i o latou mātua. (Kolose 3:​20) Ae afai e te aʻoaʻoina lou alo e usitaʻi i so o se tagata matua, o le a faigofie la ona lamatia o ia mai i le faaleagaina. E mafai ona aʻoaʻo e mātua Kerisiano a latou fanau, “A fai atu se isi iā te oe e fai se mea e lē fiafia i ai le Atua, aua e te faia.”​—Galuega 5:​29.

• Faataʻitaʻi auala faigofie e puipuia ai. Ia fesoasoani i lou alo e iloa le mea e fai, pe a taumafai se isi e fai iā te ia ni uiga matagā ae e te lē o iai. O le faia o ni tamaʻi faataʻitaʻiga e faalototeleina ai lou alo e fai atu, “Aua! Ou te taʻua nei oe!” ma sola ese loa. E manaʻomia ona faamanatu pea i “lau fanau i taimi uma” auā e faigofie ona galo iā i latou.​—Teuteronome 6:7.