Foafoaga po o le Evolusione?—Vaega 1: Aiseā e Talitonu ai i le Atua?

Foafoaga po o le evolusione?

Pe e te talitonu na faia e le Atua mea uma? Afai o lou manatu lenā, e tutusa la oe ma le toʻatele o isi talavou (faapea tagata matutua). Peitaʻi, ua faapea mai isi, na teʻi lava ua iai le ola ma le vateatea, e aunoa ma le foafoaina e “Sē e Silisili Ese.”

E te silafia? E masani lava, e vave ona faailoa mai e i latou e talitonu i le foafoaga ma i latou foʻi e talitonu i le evolusione, mea e latou te talitonu ai, e aunoa ma le iloa o le māfuaaga e talitonu ai i na manatu.

• O isi tagata, e pau le māfuaaga e talitonu ai i le foafoaga ona o mea na o loo aʻoaʻo i le latou lotu.

• O le toʻatele o tagata, e pau le māfuaaga e talitonu ai i le evolusione ona o le mea lenā o loo aʻoaʻoina ai i le aʻoga.

O le a fesoasoani lenei faasologa o mataupu ina ia faamalosia ai lou faatuatua i le foafoaga, ma faamatala le māfuaaga e te talitonu ai i le foafoaga. Ae muamua lava, e manaʻomia ona e fesili ifo i le fesili tāua lenei:

Aiseā ou te talitonu ai i le Atua?

Aiseā e tāua ai lenā fesili? Talu ai o loo faalaeiau oe e le Tusi Paia ina ia faaaogā le “mafaufau lelei.” (Roma 12:1) O lona uiga, e tatau ona iai se faavae o ou talitonuga i le Atua, ae lē o le tau ina talitonu i ai ona o

• faalogona (Ou te lagona e iai sē e silisili ese)

• taaʻiga a isi (Na ou ola aʻe i se siʻomaga e toʻaʻaga tagata i le lotu)

• omiga (Na tausia aʻe aʻu e oʻu mātua ina ia talitonu i le Atua, ma e leai se isi mea)

Nai lo lea, e tatau ona e talitonu oe lava ia o loo soifua moni le Atua, ma ia iai ni māfuaaga maumaututū e te talitonu ai faapea.

Aiseā e te talitonu ai o loo soifua moni le Atua? Ia faaaogā le iloiloga o loo i le mataupu “Why Do I Believe in God?” e faamalosia ai lou faatuatua i le Atua. Atonu e aogā foʻi iā te oe le iloiloina o tali a nisi o talavou i lenā fesili.

“Pe a faamatala e le faiaʻoga i taimi o le vasega le auala e gaoioi ai o tatou tino, o i inā ou te iloa ai o loo soifua moni lava le Atua. E tofu vaega eseese o le tino ma o latou aogā, ma e masani ona gaoioi nei vaega o le tino e aunoa ma lo tatou iloa. E matuā mataʻina lava le auala e gaoioi ai le tino o le tagata!”​—Teresa.

“Pe a ou vaai i fale maualuluga, o se meli laʻu pasese, po o se taavale, ou te fesili ifo: ʻO ai na faia nei mea?’ O se faataʻitaʻiga, e faia e tagata atamamai se taavale, auā e manaʻomia ona saʻo le auala e tuufaatasi ai le tele o vaega ninii, ina ia ola lelei ai se taavale. Pe afai la na faia e se tagata le taavale, e tatau foʻi la ona iai se tasi na faia le tagata.”​—Richard.

“Pe afai ua faitau selau tausaga o taumafai tagata aupito i sili ona atamamai e suʻesuʻe ma malamalama i se vaega itiiti o le vateatea, e matuā lē talafeagai lava la le mafaufau e leai sē e atamai na foafoaina le vateatea!”​—Karen.

“O le tele ou te suʻesuʻe ai i le faasaienisi, o le tele foʻi lenā o loʻu lē talitonu i le evolusione. O se faataʻitaʻiga, e ese le mataʻina o le maopoopo o mea o le natura ma le tutasi o le tagata, faapea lo tatou manaʻoga e iloa po o ai i tatou, o fea na tatou tupuga mai ai, ma o le ā le fuafuaga o le olaga. Peitaʻi, i le faaevolusione, e latou te taumafai e faamatala nei mea uma i se auala e fesootaʻi atu i uiga o manu. E lē taitai ona faamatalaina i le faaevolusione le māfuaaga e tutasi ai le tagata. I loʻu manatu, e tele atu taumafaiga e manaʻomia e talitonu ai i le evolusione, nai lo o le talitonu i Lē na foafoaina mea.”​—Anthony.

Faamatalaina o oʻu talitonuga

Ae faapefea pe a ulagia oe e tamaiti o le tou vasega ona o lou talitonu i se mea e lē vaaia? Ae ā pe a latou faapea mai ua “faamaonia” e le faasaienisi le evolusione?

Muamua lava, ia e mautinoa i mea ua e talitonu i ai. Aua neʻi e fefe pe matamuli i ou talitonuga. (Roma 1:16) Ia manatua:

1. O loo toʻatele pea isi o loo talitonu i le Atua. E aofia ai i na tagata, nisi e sili ona atamamai. O se faataʻitaʻiga, e iai saienitisi e talitonu e iai se Atua.

2. O nisi taimi, pe a faapea mai tagata e lē talitonu i le Atua, o le uiga o lo latou manatu, e lē malamalama i le Atua. Nai lo o le taʻu mai o ni māfuaaga e latou te mafaufau ai faapena, e masani ona latou lāgā fesili e pei o le, “Afai e iai se Atua, aiseā la e mafatia ai tagata?” E tai pei ua latou suia le mataupu e faatatau i le iai o sē na foafoaina mea, i se mataupu o loo aafia ai o latou faalogona.

3. E iai i tagata se “manaʻoga faaleagaga.” (Mataio 5:3 fpl.) E aofia ai i lenei mea, le manaʻoga ina ia talitonu i le Atua. O lea, pe a faapea mai se tasi e leai se Atua, o le tiute tauave la a lenā tagata, ae lē o oe, le faamatala o le māfuaaga ua ia manatu ai faapena.​—Roma 1:​18-​20.

4. E matuā talafeagai le talitonu i le Atua. E ōgatusa lenā manatu ma faamatalaga ua faamaonia e faapea, e leʻi teʻiteʻi lava ua iai le ola. E leai ni faamaoniga e lagolagoina ai le manatu na teʻi lava ua iai le ola.

O le ā la le auala e te tali atu ai, pe a fesiligia e se tasi ou talitonuga i le Atua? Mātau nisi o auala e tali atu ai.

Pe a faapea mai se tasi: “E na o tagata e leʻi aʻoʻoga e lē talitonu i se Atua.”

E te ono tali atu: “Pe e te talitonu moni i lenā manatu? Ou te lē talitonu i ai, ona i se suʻesuʻega na faia i ni polofesa o le faasaienisi e silia ma le toʻa 1,600 mai i iunivesite e sili ona maualuluga, e silia ma le 30 pasene e leʻi faapea mai e leai se Atua, pe lē mautinoa foʻi pe iai se Atua.a Po o lona uiga la, e lē atamamai na polofesa ona e latou te talitonu i le Atua?”

Pe a faapea mai se tasi: “Afai e iai se Atua, aiseā la ua matuā tele ai mafatiaga i le lalolagi?”

E te ono tali atu: “Po o le uiga o lou manatu, e te lē malamalama i le auala e gaoioi ai le Atua, pe faapea foʻi e lē o gaoioi o ia e taofia mafatiaga o tagata? [Faatali mo se tali.] E iai se tali faamalieloto ua ou mauaina i le māfuaaga ua tele ai mafatiaga. Peitaʻi, ina ia malamalama i lenā tali, e manaʻomia ona e iloiloina nisi o aʻoaʻoga mai i le Tusi Paia. Pe e te fia talanoa atili ai?”

I le mataupu o sosoo ai o lenei faasologa o mataupu, o le a talanoaina ai le māfuaaga e faapea atu ai, e lē o aumaia e le talitonuga o le evolusione ni faamatalaga maufaatuatuaina i le auala na tatou tupuga mai ai.