Aiseā e Ese ai le Auala e Faamanatu ai e Molimau a Ieova le Talisuaga a le Alii Mai i Isi Lotu?

E matou te piiama i le Tusi Paia i le auala e faamanatu ai le Talisuaga Afiafi a le Alii, lea e taʻua foʻi o “le talisuaga a le Alii,” le Talisuaga Mulimuli, ma le Faamanatuga o le maliu o Iesu. (1 Korinito 11:20; Tusi Paia Samoa-Lomiga 1969) Peitaʻi, o le tele o talitonuga ma tū a isi lotu e faatatau i le faamanatuga e lē faavae mai i le Tusi Paia.

Fuafuaga

O le fuafuaga o le Talisuaga Afiafi a le Alii o le manatua lea o Iesu, ma faaalia lo tatou lotofaafetai mo lana taulaga sa faia mo i tatou. (Mataio 20:28; 1 Korinito 11:24) O le faamanatuga e lē o se sakalameta po o se tū faalotu e faia ina ia maua ai le finagalo malie o le Atua, po o le faamagaloina o agasala.a Ua aʻoaʻoina i le Tusi Paia e mafai ona faamagaloina a tatou agasala e ala i le faatuatua iā Iesu, ae e lē auala mai i se tū faalotu.​—Roma 3:​25; 1 Ioane 2:​1, 2.

O le ā le tele e faia ai le Faamanatuga?

Na faatonuina e Iesu ona soo e faamanatu le Talisuaga Afiafi a le Alii, ae e na te leʻi taʻua patino po o le ā le tele e faia ai faapea. (Luka 22:19) E manatu nisi e tatau ona faamanatuina i masina taʻitasi, ae e faamanatuina e isi i vaiaso taʻitasi, aso taʻitasi, taimi eseese a o faagasolo le aso, pe faamanatuina foʻi i le tele e manaʻo i ai le tagata. Peitaʻi, o nisi nei o manatu e tatau ona iloiloina.

Na faavaeina e Iesu le Talisuaga Afiafi a le Alii i le aso o le Paseka faa-Iutaia, ma na maliu o ia i se taimi mulimuli ane o lenā lava aso. (Mataio 26:​1, 2) E lē o se mea na teʻi lava ua tupu. O loo faatusaina e le Tusi Paia le taulaga a Iesu i le tamaʻi mamoe o le Paseka. (1 Korinito 5:​7, 8) Na faatasi lava i le tausaga ona faamanatuina le Paseka. (Esoto 12:​1-6; Levitiko 23:5) I se tulaga talitutusa, na faatasi i le tausaga ona faamanatuina e uluaʻi Kerisianob le Faamanatuga o le maliu o Iesu, ma o loo mulimuli foʻi Molimau a Ieova i lenā faatulagaga faale-Tusi Paia.

Aso ma le taimi

O le faavae na faataatia e Iesu, e fesoasoani e iloa ai e lē gata o le tele e tatau ona fai ai le Faamanatuga ae o le aso ma le taimi foʻi e fai ai. Na ia faavaeina le faamanatuga ina ua mavae le goto o le lā iā Nisani 14 i le 33 T.A., e tusa ai ma le kalena faaletausaga a le Tusi Paia. (Mataio 26:18-​20, 26) O loo faaauau pea ona matou faamanatuina le Faamanatuga i lea aso i tausaga taʻitasi, e pei ona sa faia e uluaʻi Kerisiano.c

E ui lava o Nisani 14 i le 33 T.A. o se Aso Faraile, ae e ono ese le aso o le vaiaso i tausaga taʻitasi e paʻū ai le aso o le Faamanatuga. E matou te tau le aso e paʻū ai Nisani 14 i tausaga taʻitasi e ala i le faaaogāina o le auala e tasi lea sa faaaogā i taimi o Iesu, nai lo o le faaaogā o le auala o loo i le kalena faa-Iutaia i aso nei.d

Areto ma le uaina

Na faaaogā e Iesu i le faamanatuga le areto e lē faafefeteina ma le uaina mūmū lea na totoe mai i le talisuaga o le Paseka. (Mataio 26:26-​28) E matou te mulimuli i le faaaʻoaʻoga a Iesu e ala i le faaaogāina o le areto e lē o iai se fefete, pe faaopoopo foʻi i ai isi mea. E matou te faaaogāina foʻi le uaina mūmū ae e lē o se sua fou o vine lea e faasuamalie pe sui.

O nisi lotu e faaaogā le areto e iai le fefete, ae i le Tusi Paia e masani ona faaaogā le fefete e fai ma faailoga o le agasala ma le tulaga iʻuvale. (Luka 12:1; 1 Korinito 5:​6-8; Kalatia 5:​7-9) O lea e na o le areto e leai se fefete ma isi mea e faaopoopo i ai, e mafai ona avea o se faailoga talafeagai mo le tino o Keriso e leai se agasala. (1 Peteru 2:​22) O le isi faiga e lē lagolagoina e le Tusi Paia, o le suia lea o le uaina mo le sua o le vine e leʻi faaavaina. E faia e nisi o lotu lenei mea ona o a latou faasāsāaga e lē faavaea i le Tusi Paia, e faatatau i le faaaogāina o le ʻava malosi.​—1 Timoteo 5:​23.

Areto ma le uaina, ae e lē o le tino ma le toto moni

O le areto e lē faafefeteina ma le uaina mūmū lea e faaaogā i le Faamanatuga, o ni faailoga o le tino ma le toto o Keriso. E lē o suia faavavega pe faafilogia ma lona tino ma le toto moni e pei o le manatu o isi. Seʻi mātau le faavae faale-Tusi Paia o lea malamalamaga.

• Pe ana faapea na faatonuina e Iesu ona soo e inu lona toto, o lona uiga ua ia faatonuina i latou e solia le tulafono a le Atua e faatatau i le faasā ona inuina pe ʻaina le toto. (Kenese 9:4; Galuega 15:28, 29) Peitaʻi e lē mafai ona tupu lenā mea, e lē taitai faatonuina e Iesu isi ina ia solia le tulafono a le Atua e faatatau i le paia o le toto.​—Ioane 8:​28, 29.

• Pe ana faapea na inu e le ʻauaposetolo le toto moni o Iesu, semanū e na te lē fetalai “e faamaligiina” lona toto, e faaalia ai e leʻi oo i le taimi e fai ai lana taulaga.​—Mataio 26:28.

• Na “faatasi” lava ona faia le taulaga a Iesu. (Eperu 9:​25, 26) Peitaʻi pe afai la na suia le areto ma le uaina i le tino ma le toto moni o Iesu a o faia le Talisuaga Afiafi a le Alii, o lona uiga na toe faia e i latou na tagofia le areto ma le uaina lenā taulaga.

• Na fetalai Iesu: “Ia faia pea lenei mea e fai ma faamanatuga iā te aʻu,” ae lē o le “taulaga iā te aʻu.”​—1 Korinito 11:24.

O i latou e talitonu i le manatu e mafai ona liua faavavega le areto ma le uaina i le tino ma le toto o Iesu, e faavae lo latou talitonuga i le auala o loo faaupu ai lea mau i isi Tusi Paia. O se faataʻitaʻiga i le tele o faaliliuga o le Tusi Paia, o loo taʻua ai na fetalai Iesu e faatatau i le uaina e faapea: “O loʻu toto lenei.” (Mataio 26:28) Peitaʻi e mafai foʻi ona faaliliuina le fetalaiga lenā a Iesu e faapea: “O le faatusa lenei o loʻu toto,” “O le faaataga lenei o loʻu toto,” pe “O le faailoga lenei o loʻu toto.”e E pei ona masani ai, sa aʻoaʻo atu Iesu e ala i le faaaogā o se faatusatusaga.​—Mataio 13:34, 35.

O ai e tagofia le areto ma le uaina?

Pe a faamanatuina e Molimau a Ieova le Talisuaga Afiafi a le Alii, e na o se vaega toʻaitiiti o i matou e tagofia le areto ma le uaina. Aiseā?

O le toto maligi o Iesu na faavaeina ai “se feagaiga fou,” lea na suia le feagaiga na faia i le va o Ieova le Atua ma le nuu anamua o Isaraelu. (Eperu 8:​10-​13) O i latou o loo iai i lenā feagaiga fou, e latou te tagofia le areto ma le uaina. E lē aofia ai Kerisiano uma, ae e na o “i latou ua valaauina” e le Atua i se auala faapitoa. (Eperu 9:​15; Luka 22:20) O i latou nei o le a pule faatasi ma Keriso i le lagi, ma ua faapea mai le Tusi Paia e na o le 144,000 i latou o le a mauaina lenā faaeaga.​—Luka 22:28-​30; Faaaliga 5:​9, 10; 14:​1, 3.

E ese mai i le “lafu mamoe itiiti” o i latou ua valaauina e pule faatasi ma Keriso, o le isi vaega toʻatele o i matou e faamoemoe e avea o se vaega “o se motu o tagata e toʻatele,” o ē o le a maua le ola e faavavau i le lalolagi. (Luka 12:32; Faaaliga 7:​9, 10) E ui lava e lē tagofia e i matou o loo iai le faamoemoe e ola e faavavau i le lalolagi le areto ma le uaina o le Faamanatuga, ae e matou te aufaatasi i le faaalia o le lotofaafetai mo le taulaga na faia e Iesu mo i matou.​—1 Ioane 2:2.