E Faapefea i le Taulaga a Iesu Ona Avea o se “Togiola mo Tagata e Toʻatele”?
Tali a le Tusi Paia
O le taulaga a Iesu, o le auala lea e faasaʻoloto pe laveaʻiina ai e le Atua tagata mai i le agasala ma le oti. O loo faasino atu e le Tusi Paia le toto maligi o Iesu o se tau o le togiola. (Efeso 1:7; 1 Peteru 1:18, 19) O lea, na taʻua e Iesu na afio mai “e foaʻi atu lona ola e fai ma togiola mo tagata e toʻatele.”—Mataio 20:28, King James Version.
Aiseā na manaʻomia ai se “togiola mo tagata e toʻatele”?
Sa foafoaina le uluaʻi tagata o Atamu e lelei atoatoa pe leai se agasala. Na ia maua le faamoemoe o le ola e faavavau, ae na toe melea ina ua ia lē usiusitaʻi i le Atua. (Kenese 3:17-19) Ina ua maua le fanau a Atamu na ia tuufaasolo atu le agasala iā i latou. (Roma 5:12) O le pogai lea ua taʻua ai i le Tusi Paia, na “faatauina atu” e Atamu o ia lava ma lana fanau e fai ma pologa i le agasala ma le oti. (Roma 7:14) Talu ai e lē lelei atoatoa i latou uma, e leai la se tasi e mafai ona toe totogia le mea na melea e Atamu.—Salamo 49:7, 8.
Na alofa mutimutivale le Atua i ē na tupuga mai iā Atamu ona ua leai so latou faamoemoe. (Ioane 3:16) Peitaʻi, ona o ana tapulaa o le faamasinotonu e lē manatu māmā ai o ia i a latou agasala, pe faamagaloina foʻi e aunoa ma se māfuaaga tatau. (Salamo 89:14; Roma 3:23-26) O le alofa o le Atua i tagata, ua ia saunia ai se auala faaletulafono e lē gata e faamagaloina ai a latou agasala, ae aveesea atoatoa ai foʻi. (Roma 5:6-8) O lenā auala faaletulafono, o le togiola.
O a aogā o le togiola?
I le Tusi Paia o le upu “togiola” e aofia ai vala nei e tolu:
O se tau e totogi ai.—Numera 3:46, 47.
E faasaʻoloto pe tatalaina ai.—Esoto 21:30.
E fetaui lelei ma le tau o le mea o loo totogi pe ufiufi ai.a
Seʻi iloilo pe faapefea ona faatatau atu nei vala e tolu i le taulaga togiola a Iesu Keriso.
Tau e totogi ai. O loo taʻua i le Tusi Paia e “taugatā le tau na faatauina ai” Kerisiano. (1 Korinito 6:20; 7:23) O lenā tau o le toto o Iesu, lea na ia “faatauina mai ai tagata mo le Atua mai i ituaiga uma, ma gagana uma, ma nuu uma, ma atunuu uma.”—Faaaliga 5:8, 9.
Faasaʻoloto. O le taulaga a Iesu ua ‘faasaʻolotoina ai e ala i le togiola’ tagata mai i le agasala.—1 Korinito 1:30; Kolose 1:14; Eperu 9:15.
E fetaui lelei. Sa fetaui lelei le taulaga a Iesu i le mea lea na melea e Atamu, o le ola lelei atoatoa. (1 Korinito 15:21, 22, 45, 46) O loo taʻua i le Tusi Paia: “E pei ona agasala le toʻatele ona o le lē usiusitaʻi o le tagata e toʻatasi [Atamu], e faapea foʻi ona taʻuamiotonuina le toʻatele ona o le usiusitaʻi o le tagata e toʻatasi [Iesu Keriso].” (Roma 5:19) O loo faamatalaina i lenei mau, pe faapefea i le maliu o le tagata e toʻatasi ona totogi ai le togiola mo le toʻatele o tagata agasala. O le mea moni, o le taulaga a Iesu o se “togiola e fetaui lelei mo tagata uma,” o ē e faia gaoioiga manaʻomia e maua ai aogā mai i lenā taulaga.—1 Timoteo 2:5, 6.
a I le Tusi Paia o uluaʻi upu na faaliliu i le “togiola” e uiga atu i se tau po o se mea tāua e tatau ona totogi. O se faataʻitaʻiga, o le veape Eperu ka·pharʹ o lona uiga o se “ufiufi.” E masani lava ona faasino atu i le ufiufi o se agasala. (Salamo 65:3) E fesootaʻi atu iai le nauna o le koʹpher lea e uiga atu i le tau e totogi ina ia ufiufi pe togiola ai. (Esoto 21:30) I se tulaga talitutusa, o le upu Eleni lyʹtron lea e masani ona faaliliu “togiola,” e mafai foʻi ona faaliliuina “o se tau e totogi ina ia faasaʻolotoina ai.” (Mataio 20:28; The New Testament in Modern Speech, tusia e R. F. Weymouth) Na faaaogā e tusitala Eleni lenā upu, e faamatala ai le tupe e totogi mo le togiolaina o se pagota o le taua, pe tatalaina ai se pologa.