O le ā le Puapuaga Tele?

Tali a le Tusi Paia

O le puapuaga tele o se taimi o le a tutupu ai ni mea e sili ona mataʻutia e leʻi tutupu muamua, ma o le a aafia ai tagata uma. E tusa ai ma valoaga a le Tusi Paia, o le a tupu le puapuaga tele i “aso e gata ai,” po o “taimi o le iʻuga.” (2 Timoteo 3:1; Tanielu 12:4) O le a “leai sona tusa talu le amataga o foafoaga na foafoaina e le Atua seʻia oo mai i lea taimi, ma e lē toe tupu foʻi se mea faapea.”​—Mareko 13:19; Tanielu 12:1; Mataio 24:21, 22.

Mea e tutupu i le puapuaga tele

• Faaumatiaina o lotu sesē. O le a matuā faateʻia tagata i le faaumatiaina faafuaseʻi o lotu sesē uma. (Faaaliga 17:​1, 5; 18:​9, 10, 21) O le a faataunuuina e Malo Aufaatasi lea e faaata mai ai malo faapolotiki le finagalo o le Atua, ina ia faaumatia lotu sesē uma.​—Faaaliga 17:​3, 15-​18.a

• Le osofaʻia o le tapuaʻiga moni. O loo faasino atu se tuufaatasiga o Malo i a “Koku mai i Makoku” lea o loo taʻua i le tusi o Esekielu. O le a taumafai lenā tuufaatasiga o Malo e faaumatia tagata o le tapuaʻiga moni. Peitaʻi o le a puipuia e le Atua ona tagata tapuaʻi.​—Esekielu 38:​1, 2, 9-​12, 18-​23.

• Le faamasinoina o tagata o le lalolagi. O le a faamasinoina e Iesu tagata uma ma “tuueseeseina, e pei ona tuueseeseina e se leoleo mamoe o mamoe ma ʻoti.” (Mataio 25:31-​33) E faavae le faamasinoga a Iesu i le lagolagoina po o le lē lagolagoina e tagata taʻitoʻatasi o ona “uso,” o ē o le a latou pule faatasi ma ia i le lagi.​—Mataio 25:34-​46.

• Le aoaoina o pule o le Malo. O tagata faamaoni ua filifilia mai i le lalolagi e pule faatasi ma Iesu, pe a maliliu e faatutūina i latou e ola i le lagi.​—Mataio 24:31; 1 Korinito 15:50-​53; 1 Tesalonia 4:​15-​17.

• Amaketo. O le “taua o le aso tele o le Atua o Lē e ona le malosi uma lava” e taʻua foʻi o le “aso o Ieova.” (Faaaliga 16:14, 16; Isaia 13:9; 2 Peteru 3:​12) E faaumatia i latou e taʻusalaina e Iesu i lana faamasinoga. (Sefanaia 1:​18; 2 Tesalonia 1:​6-​10) E aofia iā i latou na malo faapolotiki uma o le lalolagi lea o loo faaata mai e se manufeʻai e fitu ona ulu o loo taʻua i le Tusi Paia.​—Faaaliga 19:19-​21.

Mea e tutupu pe a uma le puapuaga tele

• Lokaina o Satani ma ana temoni. O le a lafoina e le agelu sili Satani ma ana temoni “i le tō,” ua faaata mai ai le lē toe mafai ona latou toe faia so o se gaoioiga e pei ua feoti. (Faaaliga 20:​1-3) E pei o loo faafalepuipui Satani i lenā tō, e lē mafai ona ia toe taaʻina so o se tagata i le lalolagi.​—Faaaliga 20:7.

• Amata le Afe Tausaga. O le a amata le pulega o le Malo a le Atua mo le 1,000 tausaga, lea o le a maua ai e tagata le anoanoaʻi o faamanuiaga (Faaaliga 5:​9, 10; 20:​4, 6) O le a “sao mai le puapuaga tele” le “motu o tagata e toʻatele,” ma o le a latou molimauina le amataga o le pulega mo le Afe Tausaga i le lalolagi.​—Faaaliga 7:​9, 14; Salamo 37:​9-​11.