Po o Maria o le Tinā o le Atua?

Tali a le Tusi Paia

E leai, e lē o aʻoaʻoina i le Tusi Paia o Maria o le tinā o le Atua, pe fautuaina foʻi Kerisiano e tatau ona tapuaʻi iā Maria.a Seʻi iloilo:

E leʻi faapea mai lava Maria, o ia o le tinā o le Atua. O loo faamatalaina i le Tusi Paia na ia fanauina le “Alo o le Atua” ae lē o le Atua.—Mareko 1:1; Luka 1:32, 35
E leʻi fetalai foʻi Iesu e faapea o Maria o le tinā o le Atua, ma ua onomea ona avatu iai le tapuaʻiga. Na faasaʻoina foʻi e Iesu se fafine o lē na ia faaeaea le matafaioi a Maria i le avea ai ma ona tinā, i lona faapea atu: “E leai, Amuia i latou e faalogo i le afioga a le Atua ma tausi i ai!”—Luka 11:27, 28.
O le faaupuga “Tinā o le Atua” ma le “Theotokos” (o lē na fanauina le Atua) e lē o maua i le Tusi Paia.
O le faaupuga i le Tusi Paia o le “atua fafine o le lagi,” e lē o faasino atu iā Maria, ae o atua sesē na tapuaʻia e tagata Isaraelu na liliu ese. (Ieremia 44:15-19) O le “atua fafine o le lagi” atonu o Ishtar (Astarte), se atua o Papelonia.
E leʻi tapuaʻi uluaʻi Kerisiano iā Maria, ma latou te leʻi faamamaluina foʻi o ia. Na taʻua e se tasi o tusitala e faapea o uluaʻi Kerisiano, “na latou teena tamaʻi lotu ma atonu o le fefefe i le faauaʻi atu ia Maria e ono mapuna aʻe ai tapuaʻiga i tupua.”—In Quest of the Jewish Mary.
Ua taʻua i le Tusi Paia o le Atua e mai le vavau e oo i le faavavau. (Salamo 90:1, 2; Isaia 40:28) Talu ai e leai sona amataga, e leai foʻi la sona tinā. E lē gata i lea, e leʻi tauaveina e Maria le Atua i lona manava; o loo faamanino mai i le Tusi Paia e oo lava i le lagi e lē ofi ai o ia.—1 Tupu 8:27.

O Maria—o le Tinā o Iesu ae lē o le “Tinā o le Atua”

Na fanau mai Maria o se sui o le nuu o Iutaia, ma o ia o se tasi na tupuga mai i le Tupu o Tavita. (Luka 3:23-31) Na alofateleina o ia e le Atua ona o lona faatuatua ma lona faamaoni. (Luka 1:28) Na filifilia o ia e le Atua e fai ma tinā o Iesu. (Luka 1:31, 35) Na iai foʻi isi a la fanau ma lana tane o Iosefa.—Mareko 6:3.

E ui lava o loo taʻua i le Tusi Paia o Maria na avea ma se soo o Iesu, ae e le tele nisi faamatalaga e uiga iā te ia.—Galuega 1:14.

Aiseā ua manatu ai nisi o Maria o le tinā o le Atua?

O le uluaʻi faamaoniga o le tapuaʻi iā Maria, na amata mai i le faaiʻuga o le senituri lona fā T.A. I lenā taimi, na avea ai le Lotu Katoliko ma lotu aloaʻia a le emepaea o Roma. So o se tasi e iai sona talaaga faapaupau na mafai ona avea ma Kerisiano. Na taaʻina foʻi le lotu i le aʻoaʻoga e lē faale-Tusi Paia o le Tolutasi.

O le aʻoaʻoga o le Tolutasi na taaʻina ai manatu o tagata, ma na latou faapea mai ai pe afai o Iesu o le Atua, e tatau la na avea Maria ma tinā o le Atua. I le 431 T.A., na faalauiloa aloaʻia mai ai e le fono i Efeso le “Tinā o le Atua.” Na olaola le tapuaʻiga iā Maria ina ua māeʻa le fono i Efeso. O i latou e iai talaaga faapaupau na auai i le lotu, na faaaogāina faatusa o le taupou o Maria e sui ai le atua fafine o le uluola o meatotō, e pei o Atemisa (Diana, to the Romans) ma Isis.

I le 432 T.A., na faatonuina ai e Pope Sixtus III se lotu e faatūina i totonu o Roma, e tapuaʻi i le “Tina o le Atua.” Na fausia lenā fale i tafatafa o le uluaʻi malumalu na fai ai le tapuaʻiga iā Lucina, le atua mo le fanau tama. Na tusia e se tusitala, o lenei lotu “o se faailoga o le suiga mai i le tapuaʻiga i le Tinā Sili o faiga faapaupau, i le tapuaʻiga iā Maria ina ua oo mai le faa-Kerisiano i Roma.” —Mary—The Complete Resource

a E iai lotu ua faatāua le aʻoaʻoga o Maria o le tinā o le Atua. Latou te faasino iā te ia o le “Tupu Tamaʻitaʻi o le Lagi,” po o le upu Eleni o le Theotokos , o lona uiga “o lē na fanauina le Atua.”

Tali a le Tusi Paia

O Maria​—o le Tinā o Iesu ae lē o le “Tinā o le Atua”

O Maria—o le Tinā o Iesu ae lē o le “Tinā o le Atua”