O le ā le Aʻoaʻoga a le Tusi Paia i le Tautatala i Gagana Eseese?
Tali a le Tusi Paia
O le “tautatala i gagana eseese” e uiga atu i se tomai na faavavega ona maua e uluaʻi Kerisiano, lea na mafai ai ona latou tautatala i gagana eseese e aunoa ma lo latou aʻoaʻoina. (Galuega 10:46) Na faigofie ona malamalama le tagata e iloa na gagana, ina ua tautatala atu Kerisiano o le uluaʻi senituri i a latou gagana. (Galuega 2:4-8) O le tautatala i gagana eseese o se tasi lea o meaalofa a le agaga paia o le Atua na tuuina atu i nisi o Kerisiano o le uluaʻi senituri.—Eperu 2:4; 1 Korinito 12:4, 30.
O fea ma o anafea na amata ai ona tautatala tagata i gagana eseese?
Na muamua tupu lenei vavega i Ierusalema i le taeao o le Tausamiga faa-Iutaia o le Penetekoso 33 T.A. E pe ā ma le 120 soo o Iesu na faapotopoto faatasi ma na ‘faatutumuina i latou uma i le agaga paia, ma amata ai ona tautatala i gagana eseese.’ (Galuega 1:15; 2:1-4) E toʻatele se motu o tagata mai i “atunuu uma i lalo o le lagi” na faapotopoto faatasi ma na “taʻitasi ma faalogo atu iā i latou o tautala i lana lava gagana.”—Galuega 2:5, 6.
O le ā le fuafuaga o le tautatala i gagana eseese?
Ina ia faaalia ai na lagolagoina e le Atua Kerisiano. I taimi ua mavae, na faailoa mai ai e le Atua ni faailoga faavavega e faamaonia ai na ia lagolagoina ona tagata faamaoni e pei o Mose. (Esoto 4:1-9, 29-31; Numera 17:10) E faapena foʻi le tautatala i gagana eseese, e faamaonia ai na lagolagoina e le Atua le faapotopotoga fou faa-Kerisiano. Na tusi le aposetolo o Paulo: “O le tautala i gagana eseese o se faailoga lea e lē i tagata talitonu, ae i ē e lē talitonu.”—1 Korinito 14:22.
Ina ia mafai ai e Kerisiano ona avatu se molimau māeʻaeʻa. Na faapea mai i latou na faalogo i soo o Iesu o tautatala i gagana eseese i le aso o le Penetekoso: “Ua tatou faalogo atu iā i latou o tautatala mai i a tatou lava gagana, e uiga i mea matagofie a le Atua.” (Galuega 2:11) O lea la, o le isi fuafuaga autū o lenā vavega ina ia mafai ai e Kerisiano ona avatu se “molimau māeʻaeʻa” ma “fai tagata o nuu uma lava ma soo,” e pei ona faatonuina ai i latou e Iesu. (Galuega 10:42; Mataio 28:19) E pe ā ma le 3,000 i latou na molimauina lenā vavega ma faalogo i le feʻau na talaʻi atu na avea ma soo i lenā aso.—Galuega 2:41.
Pe e tatau ona faaauau pea ona tautatala i gagana eseese?
Leai. O meaalofa a le agaga paia e aofia ai le tautatala i gagana eseese o se fuafuaga e lē tumau. Ua taʻua i le Tusi Paia: “Afai e iai meaalofa e fai ai valoaga, o le a faalēaogāina ia; pe e tautala i gagana eseese, o le a mavae ia.”—1 Korinito 13:8.
O anafea na faamuta ai ona tautatala i gagana eseese?
Na masani lava e faasafua atu meaalofa a le agaga paia i isi Kerisiano a o iai le ʻauaposetolo. E faaee atu lima o le ʻauaposetolo i uso talitonu. (Galuega 8:18; 10:44-46) E foliga mai o i latou na faasafua atu i ai e le ʻauaposetolo meaalofa a le agaga paia, e leʻi mafai ona latou tuuina atu na meaalofa i isi. (Galuega 8:5-7, 14-17) O se faataʻitaʻiga, e mafai e se tagata o le malo ona tuuina atu i se tasi se laisene ave taavale, ae e leai se pule i lenā tagata e tuuina atu ai se laisene ave taavale i se isi. O le mea moni, na faamuta le tautatala i gagana eseese ina ua maliliu le ʻauaposetolo, ma i latou na tuuina atu i ai lenā meaalofa.
Ae faapefea le tautatala i gagana eseese i aso nei?
O le meaalofa o le tautatala i gagana eseese na faamuta i le taufaaiʻuiʻuga o le senituri muamua. E leai se tasi i aso nei e mafai ona faapea mai, ua mafai ona tautala i gagana eseese ona o le mana o le Atua.a
E mafai faapefea ona iloa Kerisiano moni i aso nei?
Na fetalai Iesu o le alofa faataulaga e iloa ai ona soo moni. (Ioane 13:34, 35) Na aʻoaʻo foʻi e Paulo o le alofa o le faailoga tumau lea e iloa ai Kerisiano moni. (1 Korinito 13:1, 8) Na taʻua foʻi e Paulo e fesoasoani le agaga paia o le Atua i Kerisiano ina ia atiaʻe “le fua o le agaga,” po o uiga eseese lea o loo faamuamua ai le alofa.—Kalatia 5:22, 23.
a Tagaʻi i le mataupu, “Pe e Mai i le Atua le Tautala i Gagana Eseese?”