O se tama talavou e lē fiafia i le auala o loo ia faaaogāina ai lona taimi, e taalo soka ma matamata i le TV faatoʻā fai ai ana meaaʻoga

UA FESILI MAI TALAVOU

E Faapefea Ona Faaaogā Lelei Loʻu Taimi?

Aiseā e tatau ai ona faaaogā lelei lou taimi?

E tai pei le taimi o tupe. Pe a e faamaʻimauina tupe, e oo ane i le taimi e te manaʻomia ai ua leai se tupe. I le isi itu, pe a faasoasoa lelei lou taimi, o le a iai taimi e totoe e fai ai isi mea e te fiafia i ai.

Mataupu silisili o le Tusi Paia: “E manaʻonaʻo le tagata paiē ae e leai se mea iā te ia. Peitaʻi o i latou e galulue malosi e tino lelei i latou.”—Faataoto 13:4.

Manatu autū: O le faaaogāina lelei o lou taimi e faateleina ai lou saʻolotoga, ae e lē faaitiitia ai.
O le lelei ona faaaogā o le taimi, o se tomai tāua e manaʻomia pe a avea oe ma tagata matua. A lelei ona faaaogā lou taimi, o le a e tumau ai i lau galuega, ae a lē lelei, e ono tuli ai oe mai i le galuega. O lea, pe afai o oe o le pule o se pisinisi, pe e te manaʻo e faafaigaluega pea se tagata e tuai soo i le galuega?

Mataupu silisili o le Tusi Paia: “O le tagata e faamaoni i nai mea itiiti, e faamaoni foʻi o ia i mea e tele.”—Luka 16:10.

Manatu autū: O le tomai i le faaaogāina lelei o le taimi e iloa ai le ituaiga tagata e iai oe.

Ae o le mea moni, e lē faigofie le faaaogā lelei o le taimi. Seʻi talanoaina ni luʻi.

Luʻi #1: Uō

“Pe a fai mai aʻu uō e matou te tafafao faatasi, e toetoe o taimi uma e matou te ō ai e ui ou te lē o avanoa. Ou te mafaufau, ‘Ou te oo loa i le fale, tope loa aʻu feʻau.’ Ae e lē taitai iʻu lelei, ma e uma ane ua tele faafitauli e tutupu ai.”—Cynthia.

Luʻi #2: O mea e tosina ese ai

“E tai pei le TV o se vacuum. E tosina atu e le TV oe e matamata i polokalame ma ata, ma e matuā faigatā lava ona teena.”—Ivy.

“E mafai ona tele itula e maʻimau i laʻu masini faaonapōnei. E faatoʻā tuu a pe a pē le maa o le masini, ma e lē lelei ai oʻu faalogona.”—Marie.

Luʻi #3: Faimeatuu

“Ou te faimeatuu i aʻu meaaʻoga ma isi mea e manaʻomia ona fai. Ou te faamaʻimauina loʻu taimi i mea e lē aogā, ae faatoʻā fai lava aʻu meaaʻoga i le taimi e manaʻomia moni ai ona fai, o lea, e lē o se faaaʻoaʻoga lelei lea o le faaaogāina o le taimi.”—Beth.

O se tama talavou o loo fiafia i le auala o loo ia faaaogāina ai lona taimi, muamua na faitau lana tusi, fai ana meaaʻoga, ma na maua pea lona taimi e taalo soka ai — O le faaaogāina lelei o lou taimi e **faateleina** ai lou saʻolotoga, ae e lē **faaitiitia** ai

Mea e mafai ona e faia

Fai se lisi o mea e tatau ona fai. E aofia ai au feʻau i le fale ma meaaʻoga. Ia tusi le aofaʻi o le taimi e te manaʻomia e faauma ai nei mea taʻitasi i le vaiaso.

Mataupu silisili o le Tusi Paia: “Ia outou faamautinoa o mea e sili ona tāua.”—Filipi 1:10.
Fai se lisi o galuega e te manaʻo e fai i lou taimi avanoa. E ono aofia ai gaoioiga e pei o le faaaogāina o le initaneti ma le matamata i le TV. O lea, ia tusi foʻi itula e te faaaluina i nei gaoioiga taʻitasi e te faia i le vaiaso.

Mataupu silisili o le Tusi Paia: “Ia outou savavali pea ma le atamai . . . . ia outou faaaogā tatau le taimi.”—Kolose 4:5.
Ia fai se faasologa. Ia toe tagaʻi i lisi e lua na e faia. Po o lava le taimi ua faatulagaina mo mea e sili ona tāua? Pe e manaʻomia ona faaitiitia le taimi e alu i faafiafiaga ina ia maua ai le taimi mo mea e sili ona tāua?

Fesoasoani: Ia fai e lē aunoa se lisi o mea e fai i le aso, ma maka na mea taʻitasi pe a uma ona fai.

Mataupu silisili o le Tusi Paia: “O fuafuaga a le tagata toʻaga e manuia ai o ia.”—Faataoto 21:5.
Ia pipii i le faasologa: Atonu e lē manaʻomia ona e taliaina se valaaulia i taimi uma, ina ia fai ai mea e sili ona tāua. O lea, o le a e iloa ai o le a tele lou taimi e fai ai isi mea ma faateleina ai lou fiafia.

Mataupu silisili o le Tusi Paia: “E manaʻonaʻo le tagata paiē ae e leai se mea iā te ia. Peitaʻi o i latou e galulue malosi e tino lelei i latou.”—Faataoto 13:4.
Ia e tauia oe mo au galuega lelei ae aua le vave ona fai. Na faapea mai se teine talavou e igoa iā Tara, “O nisi taimi ou te faia ai ni mea se lua mai i laʻu lisi o mea e tatau ona fai, ona ou mafaufau lea, ‘Manaia la, seʻi matamata le TV mo sina 15 minute ona toe fai lea o aʻu galuega.’ E uma ane le 15 minute ua 30 minute, ma o lenā 30 minute e uma ane ua itula, ma faatoʻā ou iloa mulimuli ane, ua maʻimau le lua itula lea na ou matamata ai i le TV.”

O le ā le vaifofō? Ia manatu i faafiafiaga o se taui ona ua māeʻa au galuega, ae e lē o se mea e otometi ona e faia i le aso.

Mataupu silisili o le Tusi Paia: ‘E leai se mea e sili i le tagata nai lo o le iloa e ia o mea lelei ona o lana galuega mamafa.’—Failauga 2:24.

Tala a isi talavou

“E iai laʻu faasologa ua uma ona tusi, ou te iloa ai mea e manaʻomia ona fai. E faatulaga foʻi le taimi ou te ‘mālōlō ai ina ia toe maua ai le malosi.’ O le iai o se faasologa, ua ou iloa ai mea e manaʻomia ona ou maumauaʻi e fai ma mea e ao ona ou fetuutuunaʻi ai.”—Cheyenne.

“Ua ou iloa e tatau ona ou fai atu leai i mea e lē mafai ona ou faia. E faigatā ona ou fai atu e leai, ma e leai a se isi na ita ina ua ou faamatala ai o le māfuaaga ou te lē fesoasoani atu ai, ona e lē mafai ona ou uaʻi atoatoa i se galuega e fai.”—Samuel.

“Pe afai e matuā pisi a laʻu faasologa, ua ou lē lava ai laʻu moe ma lē faamalositino ai. O nisi taimi pe a faaopoopo se itula ou te moe pe faamalositino ai, o le a tele ai mea ou te faia ma ou matuā fiafia ai i le aso e sosoo ai. E tāua le tausiaina lelei o lou soifua mālōlōina.”—Brooklyn.