Ua faaosoosoina se talavou ina ua vaai i se tama ma sana uō teine o loo talanoa fetosinaaʻi, o tama e toʻalua o loo tilotilo i se masini faaonapōnei, ma se teine o loo savali ane

UA FESILI MAI TALAVOU

E Faapefea Ona Ou Teena Faaosoosoga?

Na tusi le aposetolo o Paulo: “Pe a ou loto atu e fai le mea lelei, ae ua iā te aʻu le leaga.” (Roma 7:21) Pe sa e manatu faapena? Afai o lea, e fesoasoani lenei mataupu e teena ai faaosoosoga ina ia faia faanaunauga sesē.

Le mea e tatau ona e iloa

O omiga mai isi talavou, e masani ona faaosoosoina ai oe e faia ni gaoioiga lē lelei. Ua taʻua i le Tusi Paia, “o aumea leaga e faaleagaina ai mea lelei ua masani ai tagata.” (1 Korinito 15:33) O omiga mai isi po o faafiafiaga, e mafai ona tupu aʻe ai faanaunauga i lou loto, lea e mafai ona taʻitaʻia atu ai i se tulaga e faaosoosoina ai, ma oo ai ina e “mulimuli i le toʻatele ina ia faia mea leaga.”—Esoto 23:2.

“O le faanaunauga ina ia fiafia mai isi iā te oe, e mafai ona taʻitaʻia ai oe i le faia o mea o loo faia e isi, ina ia latou fiafia mai ai.”—Jeremy.

Mafaufau i le manatu lenei: Aiseā e ono faigatā ai ona teena faaosoosoga, pe a e soona popole tele i manatu o isi e faatatau iā te oe?—Faataoto 29:25.

O le manatu autū: Aua le faatagaina omiga mai i au aumea e faaleagaina ai tapulaa o loo e ola ai.

Le mea e mafai ona e faia

Iloa ou talitonuga. Pe a e lē iloa ou talitonuga, o le a pei oe o se pepe meataalo e faatonutonu e isi. E sili atu la ona lelei le mulimuli i le fautuaga a le Tusi Paia: “Ia tofotofo i mea uma; ia taofimau i le mea e lelei.” (1 Tesalonia 5:21) O le tele e te malamalama ai i ou talitonuga, o le faigofie foʻi lenā ona e taofimau i ai, ma teena ai faaosoosoga ia e feteenaʻi ma ou talitonuga.

Mafaufau i le manatu lenei: Aiseā e te talitonu ai o tapulaa tauamio a le Atua e mo lou lelei?

“Ua ou iloa o taimi uma ou te tausisi ai i oʻu talitonuga ma teena faaosoosoga, e faaaloalogia ai aʻu e isi.”—Kimberly.

Faaaʻoaʻoga faale-Tusi Paia: Tanielu. A o talavou Tanielu, “na maumauaʻi [o ia] i lona loto” e usitaʻi i tulafono a le Atua.—Tanielu 1:8.

O se talavou o loo nonoa ona vae ma lima i manoa, e pei o se pepe meataalo o loo faatonutonu e isi. — Pe a e lē iloa ou talitonuga, o le a pei oe o se pepe meataalo e faatonutonu e isi

Iloa ou vaivaiga. O loo taʻua i le Tusi Paia “tuʻinanauga masani o talavou.” E matuā malolosi nei faanaunauga a o talavou. (2 Timoteo 2:22) E lē gata i tuʻinanauga taufeusuaʻiga, ae o le faanaunauga foʻi ina ia talia e isi ma le faanaunauga fia tutoʻatasi mai i ou mātua.

Mafaufau i le manatu lenei: Ua taʻua i le Tusi Paia “ua faaosoosoina tagata taʻitoʻatasi ona ua tosina ma maileia i ona lava tuʻinanau.” (Iakopo 1:14) O lē fea faanaunauga e masani ona faaosoosoina ai oe?

“Ia e iloa lelei le faaosoosoga e masani ona e lolo atu i ai. Ia fai ni saʻiliʻiliga i le auala e teena ai na faaosoosoga, ma tusi i lalo ni manatu e mafai ona e faatatauina. O le faia faapea, o le a e iloa ai le auala e teena ai lenā faaosoosoga pe a toe tupu.”—Sylvia.

Faaaʻoaʻoga faale-Tusi Paia: Tavita. E iai taimi na lolo atu ai o ia i faaosoosoga mai i isi, ma ona lava faanaunauga. Ae na aʻoaʻoina e Tavita lesona mai i ana mea sesē, ma taumafai e faia le mea saʻo. Na ia tatalo iā Ieova: “Le Atua e, ia e faia se lotomamā mo aʻu, ma ia e tuu foʻi i totonu iā te aʻu se agaga fou, o se agaga e tumau.”—Salamo 51:10.

Ia e pulea oe lava. Ua faapea mai le Tusi Paia: “Aua le faatoʻilaloina oe i le leaga.” (Roma 12:21) O lona uiga, e lē tatau ona e lolo atu i faaosoosoga. Ia e filifili e fai le mea saʻo.

Mafaufau i le manatu lenei: E faapefea ona e pulea oe lava, ma ʻfaamautinoa’ e te faia le mea saʻo pe a faaosoosoina oe e faia se gaoioiga sesē?

“Ou te mafaufau i faalogona e oo iā te aʻu pe a ou lolo atu i se faaosoosoga. Pe o le a lelei oʻu faalogona? Atonu e lelei, ae mo na o sina taimi. Po o le a lelei oʻu faalogona a o faagasolo taimi? E leai, o le a atili ai ona lē lelei. Pe e tatau la ona ou lolo atu i faaosoosoga? Leai!”—Sophia.

Faaaʻoaʻoga faale-Tusi Paia: Paulo. E ui na ia taʻutino mai e iai ona faanaunauga sesē, ae na ia pulea o ia lava. Na ia tusi: “Ou te tatuʻi loʻu tino e fai ma pologa.”—1 Korinito 9:27.

O le manatu autū: O oe lava e faia le filifiliga i le auala e fesagaʻia ai faaosoosoga.

Ia manatua, e lē tumau faaosoosoga. Ua faapea mai Melissa o se talavou e 20 tausaga: “O faaosoosoga na ou vaai ai o ni mea tetele a o oʻu aʻoga, ua avea o ni mea faatauvaa i le taimi lenei. Ua faamautinoa mai ai iā te aʻu, o faaosoosoga o loo oʻu fesagaʻia i le taimi nei, o le a iai foʻi le taimi e uma ai. Pe a ou toe mafaufau i na faaosoosoga, ua ou iloa ai iʻuga lelei o le teena o na faaosoosoga.”

Manatu o au uō

“O le faia o se faaiʻuga maumauaʻi ma lototele e tausisi i ai, e fesoasoani iā te aʻu e teena ai faaosoosoga. Mo se faataʻitaʻiga, pe a ou filifili ou te lē faia se mea, ou te tausisi i lenā faaiʻuga. Ou te lē toe mafaufau e sui pe faataga foʻi faaiʻuga a isi e aafia ai.”—Olivia.

“E fesagaʻia e talavou le tele o omiga ina ia auai i patī, ma faia so o se mea e faia i na faatasiga e pei o le taumafaina o le ʻava malosi, o fualaau faasāina, ma le faia o feusuaʻiga. E fesoasoani tele iā te aʻu le saʻoloto e talanoa atu i oʻu mātua e faatatau i nei omiga. E lē gata i lea,o le faaaogā tatau o taimi avanoa e fesoasoani e ʻalofia ai faaosoosoga e faia le mea sesē.”—Jared.

“O se tasi o faaosoosoga e faigatā ona teena, o le faia o se gaoioiga e lē sesē i isi, ae ou te vaai i ai o se mea sesē, e pei o le filifilia o faafiafiaga. E tatau ona e iloa ou talitonuga ina ia ʻalofia ai na omiga, ma e manaʻomia ai le tele o le taimi ma le tomai.”—Mayan.

“Pe a faaosoosoina oe, e tatau ona e faamaoni iā te oe lava. E tatau ona e iloa lelei vaega o le Initaneti e faigofie ona faaosoosoina ai oe i amioga lē mamā, ma ia iloa le auala e gaoioi ai pe a tupu. O lou sauniuni mamao, o le a e lē lolo atu ai i na faaosoosoga.”—Julian.