Pe na Soifua Moni Ioane le Papatiso?

O loo taʻua i tusi o le Evagelia se tagata e igoa iā Ioane le Papatiso, o lē na talaʻi i Iutaia e faatatau i le Malo o le Atua. Seʻi o tatou iloiloina pe e moni faamatalaga a le Tusi Paia i lenei tagata.

• O loo taʻua i le Tusi Paia: “Ua talaʻi atu . . . Ioane le Papatiso i le toafa o Iutaia, ma faapea atu: ʻInā salamō ia outou, auā ua latalata mai le Malo o le lagi.’” (Mataio 3:1, 2) Pe e faamaonia e tusitala lauiloa a le lalolagi lenei manatu? Ioe.

  O Flavius Josephus, o se tusitala o talafaasolopito o le uluaʻi senituri. Na ia taʻua i ana tusitusiga se tagata e igoa iā “Ioane, o lona faaiʻu o le Papatiso,” na “ia apoapoaʻi tagata Iutaia ina ia ola i ni olaga amiotonu,” “ia faamaoni i le Atua,” ma “ia papatisoina i latou.”—Jewish Antiquities, Tusi XVIII.

• O loo faamatala i le Tusi Paia na aʻoaʻi e Ioane ia Herota Anetipa, o le pule o le itumalo o Kalilaia ma Perea. Na manatu Herota o ia o se tagata Iutaia na usitaʻi i le Tulafono a Mose. Peitaʻi, na taʻusalaina o ia e Ioane i lona faaipoipo iā Herotia le avā a lona ʻafa uso. (Mareko 6:18) E faamaonia foʻi lenei manatu i tusitusiga e ese mai i le Tusi Paia.

  Na taʻua e le faitofā o Josephus na “alofa Anetipa iā Herotia” ma “na lē mā e talosaga iā Herotia e la te faaipoipo.” Na talia e Herotia ma tuua ai lana tane ae faaipoipo iā Anetipa.

• O loo taʻua i le Tusi Paia ʻna ō mai iā Ioane o tagata o Ierusalema ma Iutaia uma, ma le vaipanoa uma o le vaitafe o Ioritana, ma ua ia papatisoina i latou i le vaitafe o Ioritana.’—Mataio 3:5, 6.

  E lagolagoina foʻi e Josephus lenā manatu. O loo taʻua i ana tusitusiga le ō mai o “motu o tagata” e vāai iā Ioane, ma na “matuā faagaeetia i latou i ana lauga.”

E manino mai la, na talitonu Josephus o le tusitala o talafaasolopito o le uluaʻi senituri, na soifua moni Ioane le Papatiso. E tatau foʻi la ona tatou talitonu i lenā mea moni.