Isaia 41:10—“Aua e te Fefe, Auā Ou te Faatasi ma Oe”

“Aua e te fefe, auā ou te faatasi ma oe. Aua e te vaai solo, auā o aʻu o lou Atua. Ou te faamalosi iā te oe. Ou te matuā fesoasoani iā te oe. Ou te matuā lagolagoina oe i loʻu lima taumatau o le amiotonu.”—Isaia 41:10, Faaliliuga a le Lalolagi Fou.

“Aua e te fefe, auā ou te ia te oe; aua le fetepatepai, auā o aʻu o lou Atua; ou te faamalosia oe; e moni, ou te fesoasoani ia te oe; e moni, ou te taofia oe i loʻu lima taumatau e i ai le amiotonu.”—Isaia 41:10, Tusi Paia Samoa—Lomiga 1969.

Uiga o le Isaia 41:10

O loo faamautinoa atu e Ieovaa le Atua i ona tagata tapuaʻi faamaoni, o le a ia lagolagoina i latou e tusa lava po o ā faafitauli e latou te fesagaʻia.

“Ou te faatasi ma oe.” Ua avatu e Ieova i ona tagata tapuaʻi se māfuaaga e lē tatau ai ona latou fefefe, auā e fesoasoani Ieova iā i latou. E silafia e Ieova faafitauli o loo latou fesagaʻia, ma e na te faafofogaina foʻi a latou tatalo e pei lava o loo iai faatasi ma i latou.—Salamo 34:15; 1 Peteru 3:12.

“O aʻu o lou Atua.” E faatoʻafilemuina e Ieova ona tagata tapuaʻi, e ala i le faamanatu atu iā i latou o loo avea pea o ia ma o latou Atua, ma o loo ia taliaina i latou o ona tagata tapuaʻi. E latou te mautinoa, e leai se mea e mafai ona taofia le fesoasoani a le Atua mo i latou.—Salamo 118:6; Roma 8:32; Eperu 13:6.

“Ou te faamalosi iā te oe. Ou te matuā fesoasoani iā te oe. Ou te matuā lagolagoina oe i loʻu lima taumatau o le amiotonu.” O le faaaogāina o faaupuga e tolu e faamatala ai le manatu e tasi, ua faamatilatila mai ai e Ieova le moni o lana lagolagosua mo ona tagata. Na faaaogāina e Ieova se faataʻitaʻiga e faamatala mai ai le auala e gaoioi ai, pe a manaʻomia e ona tagata se fesoasoani. Pe a paʻū se tasi, e tuu atu e Ieova lona aao taumatau e faatū ai i luga.—Isaia 41:13.

O le auala autū e faamalosia ma fesoasoani ai Ieova i ona tagata tapuaʻi, o lana Afioga le Tusi Paia. (Iosua 1:8; Eperu 4:12) O se faataʻitaʻiga, o loo i le Tusi Paia fautuaga aogā mo i latou o loo fesagaʻia tofotofoga e pei o le tulaga mativa, o maʻi po o le maliu o se tasi e pele. (Faataoto 2:6, 7) E faaaogāina foʻi e le Atua lona agaga paia po o lona mana galue, e foaʻi ai i ona tagata tapuaʻi le malosi tau faalogona ma le mafaufau e manaʻomia, ina ia onosaʻia ai tofotofoga.—Isaia 40:29; Luka 11:13.

Siʻomaga o le Isaia 41:10

O nei faaupuga, na faamāfanafanaina ai tagata Iutaia faamaoni na mulimuli ane ave faapagota i Papelonia. Na valoia e Ieova pe a lata i le taufaaiʻuiʻuga o le ave faapagotaina o tagata Iutaia, o le a iai ni tala e faatatau i se Fili o le a faatoʻilaloina Papelonia ma nuu latalata ane. (Isaia 41:2-4; 44:1-4) O lea, na matuā fefefe ma faamataʻuina Papelonia ma nuu latalata ane i na tala, ae e lē tatau ona popole tagata Iutaia auā o le a puipuia i latou e Ieova. E tolu taimi na faamautinoa atu ai e Ieova i ona tagata tapuaʻi lana puipuiga, i lona fetalai atu “aua e te fefe.”—Isaia 41:5, 6, 10, 13, 14.

E ui o fetalaiga i le Isaia 41:10 e mo tagata Iutaia faamaoni na ave faapagota i Papelonia, ae na finagalo foʻi Ieova e faamauina na fetalaiga, ina ia faamāfanafanaina ai ona tagata tapuaʻi uma. (Isaia 40:8; Roma 15:4) O loo fesoasoani Ieova iā i latou i aso nei, e pei foʻi ona ia fesoasoani i ana auauna i aso ua mavae.