Ioane 15:13—“E Le Sili Lava le Alofa o se Tasi i Lenei”

“E leai lava se tasi e sili atu lona alofa nai lo o lenei, o le foaʻiina atu lea e se tasi o lona ola mo ana uō.”—Ioane 15:13, Faaliliuga a le Lalolagi Fou.

“E le sili lava le alofa o se tasi i lenei alofa, ia tuuina atu e se tasi lona ola mo ana uo.”—Ioane 15:13, Tusi Paia Samoa—Lomiga 1969.

Uiga o le Ioane 15:13

Na fesoasoani Iesu i ona soo ina ia latou malamalama e tatau ona malosi lo latou alofa, lea e mafai ai ona lotomalie le tasi e oti mo le isi.

Muamua atu, na ia fetalai i ona aposetolo e faapea: “O laʻu poloaʻiga lenei, ia outou alolofa o le tasi i le isi e pei ona ou alofa atu iā te outou.” (Ioane 15:12) O le ā le ituaiga alofa na faaalia e Iesu iā i latou? O le alofa faataulaga e lē manatu faapito. A o iai i lana faiva i le lalolagi, na ia faamuamua manaʻoga o ona soo ma isi nai lo o ona lava manaʻoga. Na ia faamālōlō maʻi o tagata, ma aʻoaʻo i latou e faatatau i le Malo o le Atua.a Na ia faia foʻi ni galuega faatauvaa ina ia maua ai e isi aogā. (Mataio 9:35; Luka 22:27; Ioane 13:3-5) Ae i le Ioane 15:13, na faasino atu ai Iesu i se gaoioiga sili o le alofa. I ni nai itula talu ona ia fetalai i na upu, na ia faailoa mai lenā alofa sili ina ua ia lotomalie e foaʻi mai “lona ola e fai ma togiola e sui aʻi tagata e toʻatele.” (Mataio 20:28; 22:39) Na ia faailoa mai i se auala mataʻina e sili atu lona alofa mo isi nai lo o ia lava.

E alofa Iesu i tagata aemaise i latou e mulimuli i ana aʻoaʻoga. Na ia silasila i ona soo o ni ana uō vavalalata, ona na latou usitaʻi i ana faatonuga ma faatasi pea ma ia i ona puapuaga. (Luka 22:28; Ioane 15:14, 15) O lea, na iai le māfuaaga e sili atu na ia faataulaga ai lona ola mo i latou.

Na faatatau e Kerisiano i le uluaʻi senituri fetalaiga a Iesu, ma na latou lotomalilie foʻi e faataulaga o latou ola mo isi. (1 Ioane 3:16) O lea, o le alofa lē manatu faapito na faaalia e Iesu, o le faailoga sili lea e iloa ai Kerisiano moni.—Ioane 13:34, 35.

Siʻomaga o le Ioane 15:13

I le mataupu 13 i le 17 o le Evagelia a Ioane, o loo faamauina ai fautuaga a Iesu i ona aposetolo faamaoni e toʻa 11, ma e aofia ai lana tatalo faaiʻu ma i latou. E leʻi umi ae maliu loa o ia. I le mataupu e 15, na faataʻitaʻi mai ai le manaʻomia e ona soo ona auaufaatasi ma ia, e faamaonia ai lo latou mulimuli iā te ia, ma na faatusa foʻi e Iesu ona soo i lālā e fua mai o se vine. Na faalaeiauina i latou ia “saga fua tele mai.” (Ioane 15:1-5, 8) O se tasi o auala e faia ai faapea, o le faaalia lea o le alofa faataulaga mo isi, e aofia ai le talaʻia o le feʻau lea na talaʻia e Iesu, o le “tala lelei o le Malo o le Atua.”—Luka 4:43; Ioane 15:10, 17.

Ia matamata i lenei vitiō puupuu o loo aumai ai se aotelega o le tusi o Ioane.