Misionare i “Tuluʻiga Uma o le Lalolagi”

Na fetalai Iesu i ona soo o le a “fai outou ma molimau iā te aʻu i . . . tuluʻiga uma o le lalolagi.” (Galuega 1:8) I aso nei, o loo faataunuu ma le maelega e Molimau a Ieova lenā galuega. Ae e iai isi vaega o le lalolagi e aofia ai nofoaga tetelē, ma nofoaga e toʻatele tagata e nonofo ai e lē o mafai ona oo i ai se molimau māeʻaeʻa. A o nisi atunuu e toʻaitiiti Molimau a Ieova e nonofo ai. (Mataio 9:37, 38) O le ā o loo tatou faia ina ia mafai ona molimau atu ai i le toʻatele o tagata?

Ina ia faataunuu le faatonuga a Iesu, ua tofia ai e le Komiti o le Auaunaga a le Vaega Pule o Molimau a Ieova misionare i vaega o le lalolagi o loo tele ai le manaʻoga. I le taimi nei, e pe ā ma le 3,090 misionare i le lalolagi aoao o loo galulue i le galuega talaʻi.a O le toʻatele na latou maua toleniga mai i aʻoga faale-Tusi Paia, e pei o le Aʻoga mo Tagata Talaʻi o le Malo. E lotomalilie misionare e tuua o latou aiga ae siitia i se isi atunuu. E tatou te lotofaafetai ona o lo latou taʻumatuaina, o toleniga ua latou maua, ma lo latou poto masani ua mafai ai e nei misionare faamaoni, ona faailoa atu le tala lelei ma avea i latou ma faaaʻoaʻoga lelei i soo fou.

Fesoasoani i Misionare Ina ia Fesoasoani i Isi

I lālā taʻitasi, e galulue faatasi le Vaega mo Tagata Talaʻi i le Fanua a le Matagaluega o le Auaunaga ma le Komiti o le Lālā, e tausia manaʻoga o misionare e pei o se fale talafeagai e nonofo ai, o lo latou soifua mālōlōina, ma sina alauni laʻitiiti e faatau ai mea e latou te manaʻomia. A o faagasolo le tausaga faaleauaunaga 2020, ua faaaluina e Molimau a Ieova le toetoe $27 miliona (U.S.) e fesoasoani ai i misionare. E faafetai mo nei sauniuniga, ona ua mafai ai e nei misionare ona uaʻi atoatoa ma faaaogā lo latou malosi i le galuega talaʻi, ma faamalosia ai faapotopotoga i vaipanoa o loo galulue ai.

O ā taumafaiga aogā o loo faia e misionare i le galuega talaʻi? Na faapea mai Frank Madsen o loo galue i le Komiti o le Lālā i Malawi: “O le lototetele ma tomai o nei misionare ua mafai ai ona latou fesoasoani i faapotopotoga, ina ia talaʻi i oganuu e lē talilelei mai e pei o nofoaga e iai fale e loka pā, ma nofoaga e iai tagata e tautatala i isi gagana. O lo latou galue mamafa e aʻoaʻo le gagana ma aganuu a le atunuu o loo galulue ai, ua avea o se faaaʻoaʻoga lelei mo isi. Ua avea foʻi i latou ma faaaʻoaʻoga lelei i talavou ina ia aapa atu i le auaunaga faataimi atoa. E tatou te faafetai iā Ieova ona o nei misionare.”

Na faapea mai se sui o le Komiti o le Lālā mai i se isi atunuu: “O misionare o ni faaaʻoaʻoga lelei o le autasi o tagata o Ieova i le lalolagi aoao. E oo lava i tagata e lē ni molimau e latou te mātauina e tatou te lē fevaevaeaʻi ona o aganuu, ae ua fesoasoani aʻoaʻoga a le Tusi Paia iā i tatou e autasi ai o se ʻauuso.”

Ua faapefea ona fesoasoani misionare i tagata talaʻi? E talisapaia e Paulo mai Timor-Leste le maelega o se ulugalii misionare na tofia i lana faapotopotoga. Na ia faapea mai: “E matuā vevela lo matou atunuu. E ui o na misionare e ō mai i se atunuu malūlū, ae e lē mafai e le tau ona taofia ai i laʻua mai i le talaʻiga. O taeao uma e la te auai ai i faatasiga mo le talaʻiga. Ou te vaaia pea i laʻua o fai a la toe asiga i le aoauli i le vevela o le aso, ma le afiafi. Na la fesoasoani i le toʻatele o tagata e aʻoaʻo le upu moni, e aofia ai ma aʻu. Ua la maumauaʻi ma le maelega e faaaogā o la olaga atoa e auauna ai iā Ieova, ma ua uunaʻia ai le faapotopotoga atoa e faia le mea sili e auauna ai iā te ia.”

Na faamatala mai foʻi e Ketti o se paeonia sauatoa i Malawi, le auala na fesoasoani ai se ulugalii misionare i lona aiga: “Ina ua tofia se ulugalii misionare i le matou faapotopotoga, e na o aʻu le Molimau i lo matou aiga. Na ou maua le lagolagosua mai i lenei ulugalii, ma na māfana le ulugalii i le matou aiga. O a la faaaʻoaʻoga lelei na fesoasoani i laʻu fanau e iloa ai, o le auauna iā Ieova e maua ai le fiafia ma se olaga faamalieina. Ou te faafetai i nei misionare mo faaaʻoaʻoga lelei, ua auauna ai laʻu fanau teine e toʻatolu o ni paeonia sauatoa ma ua amata ona auai laʻu tane i sauniga.”

E faapefea ona tausia manaʻoga o misionare? E ala i foaʻi tauofo i le galuega mo le lalolagi aoao. O le tele o foaʻi ua faia e faaaogā ai le donate.jw.org. E matuā talisapaia nei foaʻi tauofo.