O Pese e Tatou te Vavalalata Atu ai i le Atua

O musika o se meaalofa matagofie mai iā Ieova. E mafai ona aafia ai o tatou mafaufauga, suia ai o tatou faalogona, ma uunaʻia ai i tatou. O le mea moni lenā e faatatau i a tatou fatuga. O nei fatuga e tatou te vavalalata atu ai foʻi iā Ieova.

Talu mai le 2014, ua silia ma le 70 pese o a tatou fatuga ua mafai ona saunia, ma i le taimi lenei e pe ā ma le tasi o nei pese ua mafai ona maua i gagana e 500! Ae atonu e te fesili ifo, ‘O ai e saunia nei pese, ma e faapefea ona saunia?’

Le Auala o Loo Saunia ai

E saunia e le vaega mo musika i le Auaunaga o Puʻegāleo ma Vitiō a tatou fatuga, ma e latou te galulue i lalo o le taʻitaʻiga a le Komiti Tauaʻoaʻoga a le Vaega Pule. E toʻasefulu tolu uso ma tuafāfine o loo faia aʻe ai le vaega mo musika. E fesoasoani le vaega mo musika i le fatuina o pese, faia o musika, o faasologa ma isi galuega manaʻomia. Ua faamaonia foʻi e le Komiti Tauaʻoaʻoga le faaaogāina o tagata tauofo i le lalolagi aoao, e fesoasoani i lenei galuega. E aofia ai tagata fatu pese, tagata fai musika ma tagata pepese. E faaaogāina e nei uso ma tuafāfine lotomaulalo a latou taleni e aunoa ma le mananaʻo e faalauiloa i latou.

E faapefea ona saunia se pese o a tatou fatuga? Muamua, e filifili e le Komiti Tauaʻoaʻoga le faavae faale-Tusi Paia mo se pese ma faalogona e tatau ona i ai, ona saunia lea e le vaega o musika le tusiaina o upu ma le fatuina o lenā pese. E latou te puʻeina se pese faataʻitaʻi, ona siaki lea e le Komiti Tauaʻoaʻoga ma saunia nisi fautuaga. Pe a uma, ona fai lea e le vaega o musika ni fetuunaʻiga i le pese, ma puʻe loa le pese saʻo e tatau ona iai. E tele nofoaga e puʻe ai lenā pese e aofia ai lālā ma fale puʻeleo o uso ma tuafāfine.

E faaaogā e o tatou uso le tele o polokalame puʻeleo faakomepiuta e fatu ma puʻeina ai pese o a tatou fatuga. O lenei galuega e manaʻomia ai foʻi ona faaaogā meafaifaaili, meafaigaluega e tuufaatasi ai le pese, mea faaleotele leo, sipika ma maikorofoni. E amata mai i le $100 seʻia oo i le $1,000 tālā Amerika le tau o se maikorofoni. I le 2020, e pe ā ma le $116,000 tālā Amerika ua faaaluina i meafaigaluega e puʻe ai musika.

O ā taumafaiga ua fai ina ia faasaoina ai foaʻi tauofo? Nai lo le faamaopoopoina o se vaega toʻatele o tagata fai musika i le Peteli, ae ua faaaogā le toʻatele o le ʻautauofo o loo galulue mai i o latou lava aiga. E lē gata i lea, nai lo le faapotopoto ma puʻe se ʻau faaili toʻatele i se nofoaga se tasi, ae ua faaaogā e o tatou uso polokalame puʻeleo faakomepiuta e saunia ai leo eseese o meafaifaaili.

“Ua Faamalosia ai Aʻu Faaleagaga”

E matuā fiafia uso ma tuafāfine e faalogologo i a tatou fatuga. Ua faapea mai Tara e nofo i Siamani: “E fesoasoani nei pese ou te maua ai le toʻafilemu pe a ou popole. O le faalogologo i na pese i laʻu lava gagana ou te lagona ai e pei o loo opoina aʻu e Ieova.” Ua faapea mai le uso o Dmitry e nofo i Kazakhstan: “Ou te fiafia ona ua mafai ona ou faalogologo i pese, e aunoa ma loʻu popole po o talafeagai ma mataupu silisili o le Tusi Paia. E lē gata i lenā, ae ua fesoasoani na pese ou te uaʻi atu ai pea i mea faaleagaga.”

Ua faamatalaina e Delia mai i Aferika i Saute ona faalogona e faatatau i a tatou fatuga: “O na pese ua faamalosia ai aʻu faaleagaga. Pe a ou lagona le lotovaivai pe fesagaʻia se luʻi, e iai lava se pese e fetaui lelei ma loʻu tulaga. E lava ā le fati o pese e suia ai oʻu faalogona!”

O nisi pese o a tatou fatuga ua avea ma pese e sili ona fiafia i ai isi. Ua faapea mai Lerato e sau foʻi mai Aferika i Saute: “O le pese ‘Toe Nei o se Aga’ ma ‘Le Lalolagi Fou o le a Oo Mai,’ ua fesoasoani iā te aʻu e faaata ai le taimi o le a ou faafeiloaʻia ai loʻu tinā pele. O taimi uma ou te faalogo ai i na pese, e pei lava o loo oʻu vaai atu iā te ia o momoʻe mai e opo atu aʻu.”

Na matuā fesoasoani tele se tasi o a tatou fatuga i se talavou i Sri Lanka. Na ia faapea mai: “Na inainā ma otegia aʻu e loʻu faiaʻoga faasaienisi i luma o le vasega, ona o le avea o aʻu ma se tasi o Molimau a Ieova. Na ou fefe ma ou lē iloa se tala e fai atu. Ina ua ou taunuu i le fale na faalaeiau aʻu e loʻu tinā e faalogo i le pese ‘Suʻesuʻe E te Malosi Ai.’ Na fesoasoani lenā pese iā te aʻu e iloa ai le tāua o le faia o suʻesuʻega ma sauniuni se tali. I le aso na sosoo ai, na ou talanoa ai i loʻu faiaʻoga. Na ia faalogologo lelei ma na faamatala mai foʻi lona talisapaia o talitonuga o Molimau a Ieova. Ou te faafetaia le faalapotopotoga a Ieova mo le saunia o nei pese faalaeiau mo i tatou.”

O fea e tatou te maua ai tupe e saunia ai nei pese? E ala i foaʻi tauofo mo le galuega i le lalolagi aoao. O le tele o na foaʻi e faia i auala o loo taʻua i le donate.jw.org. Faafetai lava mo lo outou limafoaʻi.