Fesoasoani Laveaʻi i le 2021—E lē Tuulafoaʻia o Tatou Uso ma Tuafāfine

O loo faaauau pea ona mafatia le lalolagi i le faamaʻi o le KOVITI-19, a o faagasolo le tausaga faaleauaunaga 2021.a E pei ona taʻua i le mataupu “Fesoasoani Laveaʻi mo se Faamaʻi ua Aafia ai le Lalolagi Atoa,” e faitau miliona tupe b ua faaaluina mo fesoasoani o le faamaʻi ma ua faatulagaina le silia ma le 950 Komiti o Fesoasoani mo Mala.

A o pepesi tele le faamaʻi, ae o loo aafia foʻi o tatou uso ma tuafāfine i le lalolagi aoao i mala faalenatura ma mala e māfua ona o tagata. Na faamaonia e le Komiti Sooupu a le Vaega Pule le faaaluina o le $8 miliona, e fesoasoani ai i le silia ma le 200 o na mala faatasi ai ma fesoasoani mo le KOVITI-19. Seʻi mātau le auala na faaaogā ai ā outou foaʻi e fesoasoani i ē na aafia i ni mala se lua na tutupu talu ai nei.

Pā le Mauga Mū o Nyiragongo

Iā Me 22, 2021, na pā ai le mauga mū o Nyiragongo i le Malo Faatemokalasi o Congo. Na faaleagaina ai e le lava mai i le mauga mū fale, faleaʻoga ma se nofoaga tele e faasao ai le vai. Ae e lē na o le lava le lamatiaga na iai. Na toʻulu i luga o le aai o Goma i le tele o aso le pefu oona mai i le mauga mū, ma e tele foʻi mafuiʻe lāiti na lūlū ai. E silia ma le ʻafa o le faitau aofaʻi o tagata i lenā aai, na faatonuina ina ia sosola ese. E faitau selau afe i latou na sosola ese, o nisi na sosola atu i le tuaoi ma Rwanda.

E pe ā ma le 5,000 Molimau a Ieova na sosola ese. O nisi na faaleagaina o latou fale e le mauga mū, a o isi na gaoia a latou meatotino ina ua sosola ese. Na faatulaga e Komiti o Fesoasoani mo Mala i Rwanda ma le Malo Faatemokalasi o Congo fesoasoani laveaʻi. Na lipotia mai e le lālā i Kinshasa i Congo e faatatau i se tasi o na komiti: “Na amata tufatufa e lenā komiti meaʻai, vai, mea e momoe ai, ma lavalava e ui i le tulaga vevesi i le aai, e oo lava foʻi i le taimi a o leʻi faatonuina tagata e sosola ese.” I se tasi o taulaga lea na silia ma le 2,000 o tatou uso na faapotopoto ai, na faatutū ai e se komiti faleʻie, tufatufa atu tali fofoga, ma faamatala atu auala e faaitiitia ai le aafia i le KOVITI-19 ma le cholera.

I totonu o le tolu masina a o tupu lenei mala, na tufatufaina ai e o tatou uso le silia ma le ono tone o araisa, ono tone o falaoamata, tolu tone o gaʻo fai meaʻai ma le tolu tone o vai. Na faatau e le lālā le anoanoaʻi o meaʻai mai i lenā vaipanoa, nai lo le faatau o meaʻai taugatā mai i atunuu i fafo ina ia sefe ai tupe.

Na faapea mai se tuafafine na faaleagaina lona fale e le mauga mū, “Na matou matuā lotovaivai lava ma mafatia.” Ae na maua e le aiga o le tuafafine se fesoasoani i le itu faaletino ma le faaleagaga. Na toe faapea mai o ia: “Ua matou maua mea na matou manaʻomia ona o le fesoasoani a Ieova. Ua matou molimauina le tauaveina e Ieova o la matou avega, ma ua tuuitiitia ai o matou mafatiaga.”

Paʻū Maulalo o le Tamaoaiga o Venezuela

E tele tausaga o mafatia tagata Venezuela ona o le paʻū maulalo o lo latou tamaoaiga. O loo onosaia e o tatou uso ma tuafāfine le faigatā o le olaga i lenā atunuu, utiuti o mea taumafa ma le faateleina o solitulafono. Ae e leʻi tuulafoaʻia i latou e le faalapotopotoga a Ieova.

I le tausaga faaleauaunaga ua mavae, e silia ma le $1.5 miliona le tupe na faaalu i le faatauina ma le felaʻuaʻiga o meaʻai ma fasimoli ma mea e manaʻomia e aiga mafatia. Na lipotia mai e le lālā i Venezuela: “E lē o se galuega faigofie le felaʻuaʻiga o le 130 tone o meaʻai i vaega uma o le atunuu i masina taʻitasi, ma faamautinoa ua maua uma e o tatou uso ma tuafāfine nei fesoasoani.” E auina atu e uso meaʻai e umi ona lelei. Ua faapea mai le lālā: “E matou te faatauina le anoanoaʻi o meaʻai i oloa siiatoa ma taimi e fua ai laau lea e gaosi mai ai meaʻai, ona o le taimi lenā e paʻū ai o latou tau, ona matou faaaogāina lea o auala o felaʻuaʻiga e sili ona taugofie e auina atu ai.”

Na matuā fiafia Leonel i lona tofiga, o sē na auauna i se tasi o Komiti o Fesoasoani mo Mala i Venezuela. Ua faapea mai o ia: “Na matuā faalaeiauina aʻu i lenei faaeaga talu ona maliu si aʻu avā pele i le KOVITI-19. Na ou matuā pisi lava ma ou lagona ai ua ou aogā i uso o loo manaʻomia le fesoasoani. Ua ou molimauina le faamaoni o Ieova i lana folafolaga, e na te lē tuulafoaʻia ona tagata.”

O se tasi o uso na mauaina le fesoasoani, na auauna o ia i se komiti o fesoasoani mo mala i tausaga ua mavae. Na ia faapea mai: “O aʻu lea ua manaʻomia se fesoasoani. E lē na o le fesoasoani faaletino na matou maua. Na fesoasoani foʻi uso iā te aʻu ma laʻu avā ia toʻa pea. Na latou faaalia le manatu mamafa, faamāfanafana ma faalaeiau i matou.”

O nisi mala e puupuu lava le taimi e tatou te maua ai se lapataʻiga, a o nisi e tutupu faafuaseʻi. Ae e vave lava ona saunia ma auina atu e le faalapotopotoga a Ieova fesoasoani laveaʻi. E matou te faafetaia ai ā outou foaʻi mo le galuega i le lalolagi aoao. O loo faamatalaina i le donate.jw.org isi auala e faia ai foaʻi tauofo. E matou te talisapaia lo outou aaomafola.