O Fata Tusi “e Fai ma Molimau i Atunuu Uma”

Ua silia ma le sefulu tausaga talu ona avea fata tusi ma mea e tosina i ai le vaai a tagata i la tatou faiva. E iloagofie a tatou fata tusi i le lalolagi aoao. O fausaga o nei fata tusi e manaia i le vaai ma e faigofie ona faaaogā. Atonu e te ioe i le faamatalaga a Asenata, o se tuafafine i Polani o lē na faapea mai: “O fata tusi e lē gata e faigofie ona faaaogā, ae e manaia foʻi i le vaai a tagata. E faigofie foʻi ona faatulaga ma feaveaʻi.”

Pe na e tomānatu pe na faapefea ona maua le fausaga o le fata tusi?

O se Fausaga Lelei

I le 2001, na tuuina atu ai e le Vaega Pule le faatagaga i uso ma tuafāfine i Falani e amata ai ona faataʻitaʻi auala eseese mo le talaʻiga i le lautele, e aofia ai le faaaogāina o fata tusi. E eseese fausaga na latou faataʻitaʻia. O se faataʻitaʻiga, na latou fetuunaʻia atopaʻu ma kololi fai faatau e faalauiloa ma teu ai lomiga. Mulimuli ane, na filifilia e le lālā i Falani se fausaga e tasi lea na faaaogā e le ʻautalaʻi mo le tele o tausaga.

Na faafiafiaina uso i Falani i iʻuga o a latou taumafaiga e faataʻitaʻi na auala eseese mo le talaʻiga i le lautele. O lea, i le 2011 na faamaonia ai e le Vaega Pule se polokalame faataʻitaʻi mo le talaʻiga i le lautele i le aai o Niu Ioka i Amerika, e faaaogā ai fata tusi ma laulau. E leʻi leva ae iloa e paeonia na filifilia i lenei polokalame le tele o aogā o fata tusi e aofia ai le faigofie ona feaveaʻi. Na faailoa atu foʻi e paeonia ni fautuaga aogā i le auala e faaleleia ai le fausaga o fata tusi. Na mamafa fata tusi na faaaogā muamua ia na faia i laupapa ma faigatā ai ona feaveaʻi i luga ma lalo o faasitepu. O lea, na toe fetuunaʻi ai le fausaga o fata tusi ina ia māmā ae e lē māmā tele ina neʻi paʻuʻū i le savili. O lenei fausaga fou na aofia ai foʻi ni paʻu tetelē e malolosi lea na faigofie ai ona feaveaʻi i ala lauleaga. E lē gata i lea, na toe faaopoopo se tamaʻi pusa ina ia teu ai le tele o lomiga.

Na matuā taulau manuia le polokalame faataʻitaʻi. O lea, na faamaonia ai e le Vaega Pule i le 2012 le faaaogāina o fata tusi i le lalolagi aoao. Na maua e uso se kamupani e latou te fausiaina le tele o fata tusi e faaaogā ai ni meafaigaluega māmā ae e anagatā.

Na faia ni nai faaleleiga i le fata tusi a o faagasolo tausaga. O se faaaʻoaʻoga, i le 2015 na faaopoopo i ai se ufiufi e kilia le pito i luma e puipuia ai le fata tusi mai i le timu. O le vaega lenā e talisapaia e Dina o lē e nofo i le atunuu o Georgia. Na ia faapea mai: “E tai pei e iai lava le ofu faatimu o le fata tusi e puipuia ai lomiga.” I le 2017, na maua ai faailoilo e fai i sila i nisi o gagana. Na faapea mai Tomasz o se uso i Polani: “Na tele galuega na alu e sui ai faailoilo muamua ia na faapipii i laupapa. Ua sili atu ona lelei nei faailoilo fou e fai i sila.” I le 2019, na faia ai isi suiga i meafaigaluega ma fausaga o fata tusi ina ia atili ai ona anagatā.

Le Gaosiga o Fata Tusi

E tasi le kamupani e gaosia fata tusi ma tufatufaina atu i le lalolagi aoao. I le taimi lenei, o le tau o le fata tusi e tasi e $43 Amerika, ae e lē aofia ai le tau e auina atu ai i isi nofoaga faapea foʻi ma isi tupe faaalu. E silia ma le $16 miliona Amerika ua faaalu e totogi ai fata tusi ma e silia ma le 420,000 fata tusi ua auina atu i faapotopotoga i le lalolagi aoao.

Ina ia faaaogā lelei foaʻi tauofo, e ota e uso le tele o fata tusi i le taimi e tasi. E lē gata i lea, nai lo o le ota o ni fata tusi fou, ua mafai nei e faapotopotoga ona ota vaega faaleoleo o fata tusi ma toe faaleleia.

Faaaogā Fata Tusi e Molimau Atu Ai

E fiafia tele le ʻautalaʻi i le lalolagi aoao e faaaogā fata tusi. Ua faapea mai Martina mai i Ghana: “O le tele o vala o le tatou faiva, o i tatou e ō atu e talanoa i tagata. Ae o le mea ou te fiafia ai i le fata tusi, ona e ō mai tagata iā i tatou. E oo lava i tagata e fepasiaʻi i luma o le fata tusi, e latou te maua se molimau.”

I se tasi o atunuu Aferika, na faalatalata mai ai se tamāloa i le fata tusi ma ave lomiga i lana gagana. Na toe foʻi mai o ia i le vaiaso mulimuli ane ma faapea mai: “Ua uma ona ou faitauina lomiga, ma e ese le tāua o le feʻau o loo iai. O le a ou faailoa atu lenā feʻau i loʻu aiga i le matou nuu,” lea e pe tusa ma le 500 kilomita (311 maila) le mamao. Na toe foʻi mai o ia i le lua masina mulimuli ane ma faapea mai: “Ua uma ona faitau tagata o lo matou nuu i lomiga ma na matuā fiafia i ai. Ua fia avea i latou ma Molimau a Ieova, ae e iai a latou fesili. O se faaaʻoaʻoga, ua latou malamalama pe a papatiso se tagata, e faatofu atoa o ia i le vai. Ae e leai se vaitafe i le matou nuu. Pe e matou te ō mai la i inei e papatiso ai?” Na faafesootaʻi e le ʻautalaʻi se paeonia e tautala i le gagana a le tamāloa ina ia asiasi atu iā te ia. I le taimi lenei, o loo faaauau pea le talanoaga a le paeonia ma lenei tamāloa.

O se fiafiaga tele le vaavaai atu i le auala o loo faaaogā ai fata tusi e talaʻi atu ai “i le lalolagi atoa e fai ma molimau i atunuu uma.” (Mataio 24:14) E faapefea ona faatupe le gaosiina o fata tusi? E ala i foaʻi tauofo i le galuega i le lalolagi aoao, lea e tele ina faia e ala i le donate.jw.org. Faafetai lava mo lo outou limafoaʻi.