Aiseā e Auai ai i Sauniga i se Maota mo Sauniga?

E faalua i le vaiaso ona faia sauniga a Molimau a Ieova i a latou nofoaga mo tapuaʻiga, e taʻua o Maota mo Sauniga. O ā mea e faia ai, ma e faapefea ona e maua aogā pe a e auai?

• O ā mea e faia i se Maota mo Sauniga?

• Aiseā e tatau ai ona e auai?

• Tala a isi talavou

O ā mea e faia i se Maota mo Sauniga?

O le Maota mo Sauniga o se nofoaga autū e aʻoaʻoina ai le Tusi Paia. E mafai ona fesoasoani sauniga iā te oe e:

• aʻoaʻoina le upu moni e faatatau i le Atua.

• malamalama ai i le māfuaaga o faafitauli o loo tutupu i aso nei.

• faaleleia atili ai ou uiga.

• maua ai ni uō sili ona lelei.

Aiseā e tatau ai ona e auai?

O le a fesoasoani iā te oe mataupu o loo aʻoaʻoina ai. O mataupu silisili o le Tusi Paia o loo talanoaina i sauniga a Molimau a Ieova, e fesoasoani iā te oe ina “ia maua le atamai.” (Faataoto 4:5) O lona uiga e mafai moni ona fesoasoani le Tusi Paia ia e faia filifiliga lelei i le olaga. E mafai foʻi ona fesoasoani e tali au fesili tāua o le olaga, e aofia ai fesili nei:

• O le ā le fuafuaga o le olaga?

• Pe e tuuaʻia le Atua i o tatou mafatiaga?

• O le ā e tupu pe a tatou feoti?

O nisi nei o matua o lauga e faia i sauniga i faaiʻuga o vaiaso:

• Aiseā e Taʻitaʻia ai i Tatou e le Tusi Paia?

• O Fea E te Maua ai le Fesoasoani i Taimi o Puapuaga?

• O Mea o Loo Faia e le Malo o le Atua mo i Tatou i le Taimi Nei.

“E iai saʻu uō i laʻu vasega na auai i le sauniga. Na matou nonofo faatasi ma faailoa i ai mea o loo faia i le sauniga. Ina ua māeʻa, na faailoa mai lona fiafia tele i tali a tagata i le vaega e fai ai sao o le aofia. Na ia faapea mai foʻi e leai ni talanoaga faapea e faia i lana lotu.”​—Brenda.

E te silafia? E lē totogia sauniga a Molimau a Ieova, ma e lē aoina foʻi ni peleti.

O se faatasitasiga e faalaeiauina ai oe. Ua faapea mai le Tusi Paia o se tasi o māfuaaga e tatau ai i Kerisiano ona potopoto faatasi, ina “ia fefaalaeiauaʻi” le tasi i le isi. (Eperu 10:24, 25) O le faatasitasi ma tagata e faamuamua le Atua ma isi nai lo i latou lava, e faafouina ai i tatou i lenei lalolagi manatu faapito.

“Ou te lagona le vaivai pe a uma se aso pisi, ae mafai e i latou o loo i le Maota mo Sauniga ona faaleleia oʻu faalogona. Pe a māeʻa se sauniga, ou te lagona le fiafia ma sauni e faatino galuega o le isi aso.”​—Elisa.

E te silafia? E silia i le 120,000 faapotopotoga a Molimau a Ieova i le lalolagi aoao, e faapotopoto i nofoaga e silia ma le 60,000. E pe ā ma le 1,500 Maota mo Sauniga e fausia i tausaga taʻitasi, ona o le faatupulaʻia o le numera o tagata e auai i sauniga.a