1, 2. O le ā sa tatou faaiʻuga i le faauigaina saʻo o faaupuga o loo i le Kenese 2:3, ma o ā fesili ua lāgā ai?

UA TATOU aʻoaʻoina mai le uluaʻi mataupu o le Kenese, sa sauniunia e le Atua le lalolagi i aso faafaatusa e ono, ina ia nonofo ai tagata. I iʻuga o nei vaitaimi taʻitasi, ua faailogaina i le faaupuga: “O le afiafipō ma le taeao.” (Kene. 1:5, 8, 13, 19, 23, 31) Ae peitaʻi, e tusa ai ma le aso lona fitu, ua taʻua i le Tusi Paia: “Ona faamanuia ai lea e le Atua o le aso lona fitu ma faapaiaina ai, auā o le aso lea o loo mālōlō ai o ia mai i ana galuega uma na ia faia.”​—Kene. 2:3.

² Seʻi mātau le faaupuina o le veape e faapea “o loo mālōlō ai.” E taʻu mai ai, o le aso lona fitu​—o le “aso” e mālōlō ai le Atua—​sa faasolo mai pea i le 1513 T.L.M., ina ua tusia e Mose le tusi o Kenese. Po o faaauau pea le aso e mālōlō ai le Atua? Afai o lea, pe e mafai ona tatou ulu atu i ai i aso nei? E tāua tele ona tatou iloa tali o nei fesili.

5. O le ā le fuafuaga o le aso lona fitu, ma o afea o le a faataunuu atoatoa ai lenā fuafuaga?

⁵ Ina ia tali lenā fesili, e ao ona tatou manatua le fuafuaga o le aso lona fitu. Ua faamatala mai i le Kenese 2:3: “Ona faamanuia ai lea e le Atua o le aso lona fitu ma faapaiaina.” Na ʻfaapaiaina’—faamamaluina pe tuu ese e Ieova lenā aso—ina ia faataunuu ai lona finagalo. O lona finagalo, ia aināina ma tausia lelei e tagata usiusitaʻi le lalolagi ma meafaiola uma o loo i ai. (Kene. 1:28) O le māfuaaga lea ʻo loo galulue ai e oo mai i le aso nei,’ Ieova le Atua ma Iesu Keriso le “Alii o le Sapati,” ina ia faataunuu le finagalo o Ieova. (Mata. 12:8) O le a faaauau pea le aso o le mālōlōga a le Atua, seʻia faataunuuina atoatoa lenā fuafuaga, i le faaiʻuga o le Pulega a Keriso i le Afe Tausaga.